Read Tangkhul Naga HĀSHOKME 12 Bible Online

HĀSHOKME 12 - Tangkhul Naga bible

HĀSHOKME 12

¹Makapha atam rāhaida kala atam angasut nganaihaida “Chikathali iwui ringkapha maleimana” da kahāng atam mararanglakha yaronshaplakha nawui Kasā akhavali phaningunglu;

²zimik, kachāng, sirābing matangmangranglakha kala zingrot muiyā makhaluiranglakha;

³shim khamayona manganukkachokranglakha, kala kapangana akhum matekranglakha, kala mā kharungana teohaowada ngasām kahai, kala charfa eina yangshoklala ngamiting kahai;

⁴kala chanreipheiwui khāmong mashungranglakha; mā kharungkhon nemtā kahai tharan, vānaokhon nganāda ngakarkathui, laa kasa naongalāva̱bingli nem ngasakhaida,

⁵athumna kajuiyalila nganga, kala shongzāli khangachee lei, almond arong awon khawon, khaohna ngamen kazat kala pangshap kashimān; mina awui katang makhavai shimli khaung, chapkhangachabingna chanrei kuikazat;

⁶lupāsāwui khara̱ masāshatranglakha, sinā tengkotla masākhairanglakha, ra̱khongli tara̱hamla masākhairanglakha, ham semlakha kāngpheila matekranglakha;

⁷kala chifana ngaleili horzakta mahanungranglakha, kala manglānala Varewuili latkhaung atam marāranglakha phaningunglu.

⁸Aremawui aremana da Hāshokmena hānga; saikora hi aremana.

⁹Awui thangkhameili lāngda, Hashokmena mibingli awor kala kharit khangaveng ngaraklaga, chānjam kachāchā phākhuilaga tamchithei.

¹⁰Hāshokmena tuiyar khamathāthā phākhuilaga mashun tui chi ngaronglak eina kapiya.

¹¹Thangkhamawui hāngkahai tui hi yaokahomana hāngkahai, karhui kala yotpi shaoshantit kahaiwui chānsam chithai.

¹²Inaomayara, hili lāngkahaibing chili ningngasharlu. Lairik kachungkha kapi khavaiwui vanga katang mavaimana, kala kachungkha kapāla phasā chotkhavaina.

¹³Naomeikapta; saikora shāhaira. Vareli ngacheelu, kala awui ningkhami mayonlu; kaja hi mi akhana sāphalungki kaji otna.

¹⁴Kaja kaphāla kashila, ngathum kahai saikora bichar sāthang Varena khuishokserra.