Read Tangkhul Naga HĀSHOKME 2 Bible Online

HĀSHOKME 2 - Tangkhul Naga bible

HĀSHOKME 2

¹I khalatta hānga, “Ara rālu, ningyāngkhaung ina mazap ngasakra; nakhalatta ringphākhuilu.” Kha yanglu, hila arema ngasasai.

²Khamana̱li “Hi kapāna” kala ningyangkhaungli “Hi khi kānāda?” da ina hānga.

³Mikumona kazingramwui azingli athumwui mirin kasha̱khawui alungli ringlakha sāphalungki kaji kaphā ot chi ina theipai khavai, kathāda mangkhama̱li singtitra̱khala kala kathāda iwui phasā, zam eina mathān ngasakrakhala da, iwui thangkhamei ning eina ngasoda phāzata.

⁴ Ina ot kahahak sai, ina shim sai, kala ikhalattawui vang drakhā yāmguila vāsanga;

⁵I khalattana yāmgui eina ngasāmphung sālaga chili atheirong yur saikora lingsanghai.

⁶Thingrong phorrāda khalei ngahong chi tara̱ chaimi khavai I khalattana ra̱khong khonkhui.

⁷ Ina rao sha̱naola mayarnaola losanga, kala iwui shimli pharākasang raola lei; Jerusalemli ili rida leikasābingli lāngda ina seishang yaoshang kachungkha ngavai.

⁸ Awungabing kala rammungabingwui sinā-lupala, lanla I khalattawui vang ina kazipkhui; laa kasā sha̱nao, mayarnao, kala mayarnaowui ningyang ungkhavai angashirva̱ kachungkhala ina hai.

⁹ Hithāda sāda I hakmahālaka, kala ili rida Jerusalemli leikasābingli ina lāngmeisera; kala iwui thangkhameila ili ngasoda leichinga.

¹⁰Kala iwui mikna ningkachāng saikorawui eina I matāthuimana; kala iwui ningna malungkachāng mathāhaimana; kaja ina kasāsā ot saikora chili ina ningyangunga; kala chi iwui ot kasā saikorawui sāmanna.

¹¹Chiwui thili ina ipāng eina sākahai saikora kala chi kasāli ngalang zangkahai saikora ina chukmaja̱yanga, kala yanglu, saikora aremana, masili khangahomna, kala okathuili tongzākapai khikha maleilakmana.

¹²Chieina ina thangkhamei, kapā kala mangkhama̱ hibingwui apongli chukmaja̱luishita; kaja awungawui pam kakā mi china khi sāshapkhala? Ana rida sākahai chimānga.

¹³Chieina kahorna tangkhamangli mataikhamei thāda thangkhameina mangkhama̱li mataimeida ina theikhui.

¹⁴Thangkhamawui kuili mik shoma; kha mangkhama̱na tangkhamangli zata; chithālala athum saikorawui angasut ngaraichāsera da theikhui.

¹⁵Chieina ina I khalattali hānga, “Mangkhama̱ali kashok chi ilila rāshokra; chithākha khisāda I hiyākha thangmeisakhala?” Ina hila aremana da I khalattali hānga.

¹⁶Kaja thangkhama alila, mangkhama̱ alila maphaningungchingmara, kaja khanao atamliva saikora hi malaikhokhaora. Mangkhama̱a thāda thangkhama ala kathāda thikhala!

¹⁷Chiwui vang eina ina mirinli yangkharinga, khikhalajila okathuili kasāsā chi ili khanang ngasaka; kaja saikora aremana kala masili khangahomna.

¹⁸Okathuili ina ngalangkazār iwui thili rāki kaje mi chili haimihaora kaji phaninglaga iwui ngalangkazār saikora yangkharinga;

¹⁹kala khipāna theira, a chi thangmeinika, mangmanikhala? Chithālala okathuili iwui thangkhamei shichinda ngalangzār kahai saikorawui akhavā ana thuisāhaora. Hila aremana.

²⁰Chieina ina ngareiung ngareivai, okathuili ina ngalangzār kahai saikora chiwui vang ngachāng chatlakhaowa;

²¹khikhalajila marakkhale mi akhana thangkhamei, theikakhui kala kathem eina ot sāsang kahai hi khikha ngalang makazar mi akhali ringphā khavai haimiser kahaila lei. Hila aremana, kala maphālak kaji akhana.

²²Mina okathuili ngalangzarlak eina chotchāngda ot kasā saikora chiwui eina khi samphangkhala?

²³ Kaja awui mirin peida kachotna pema, kala awui otva ning kakhanangna; ngayāshongla awui ning mangasāmkhuimana. Hila aremana.

²⁴ Miwui vanga, phākashak, phākazā kala awui ot kasāli ringphākakhui chili lāngda phākhamei khikha maleimana. Hila ina thei, kaja, Varivarawui eina kashokna;

²⁵kaja awui eina maningla khipāna phazā, phāshak kala ringphāshapkhala?

²⁶ Kaja ali ningyāng ungkhangasak mi chili Varena thangkhamei, awor kala khamathān mi; kha morei kaphungbingli kazipkhui khavai khami hiya, Vareli ningyāng ungkhangasaka chili mikhavaina. Hila aremana, kala khamasaili kasāna.