Read Tangkhul Naga HĀSHOKME 4 Bible Online

HĀSHOKME 4 - Tangkhul Naga bible

HĀSHOKME 4

¹Okathuili rekakharek ot kasā saikora chila ina theiluishita. Kala yanglu, rekharek kahaibingwui chāra̱, athumli ringphā khangasaka khipākha maleimana! Athumli rekakharekbingna pangshap lei, kala athumli ringphā khangasaka khipākha maleimana.

²Kala ringda khaleibingli lāngda thihaira̱kasābingna mahaimeida ina phaninga;

³kha khanini chili phakhamei chiya, mapharārang kaje, okathuili makaphā sāda khalei [1] otsak matheirang kaje mi china.

⁴Ngalangkazar hila, kathem hila khongnainaoli mikpaikashi eina kashokna da ina thei. Hila aremana, kala masili khangahomna.

⁵Mangkhama̱na pāngmasa̱da akhalattawui asā shaipama.

⁶Va̱ri kahai pāng ngashumkhana ngalangkazār kala khamasaili sākazat panghom khanili phāmei.

⁷Latluida ina okathuili arema ot theiluiya:

⁸khipākha makhangavā mi akha, anaomayarala, achināla makhalei, kha ngalang zārshon zārthaida ngasāmkakhui makhavai, kala kashāng chi amikna yanglaga shaphaira kaji makhangavā china “Ina khipāwui vang ngalang zārzatta I khalatta maringphakhui kajikhala?” da akhalatta mangahānlakmana. Hila aremana, kala maringkaphā otsak akhana.

⁹Akhale khani phamei, khikhalajila aniwui ngalangkazārwui sāman khamathā akha lei.

¹⁰Kaja akhana kongluiakha akhapāna khangmathotra; kha amānghaida konglui kahai tharan khāngmathot khavai khangatei makhalei mi chiya kalākashina.

¹¹Chili lāngda mi khani petrumakha luma; kha akhamāngna kathāda lumra?

¹²Mi akhana akhamāng kaje mi akhali yuishaplapai, mi khaniva nganurshapra. Akhara̱ kathum eina kashirei seipeng thākta machatmara.

¹³Sarkahaia mangkhama̱a, hāngkachithei makhuikasanga awungale kachāma thangkhamei yarona phamei,

¹⁴phātopwui eina wungpamkhongli rākakā misālala, lah awui wungramli chāmda pharākasang ngasāsālala.

¹⁵Okathuili zatta khalei manglākapai saikora, awui pamli nganingki kaje yarona chila ina theihaira;

¹⁶mibing saikora chi katang mavaimana, athum saikorawuitungli ana munga. Chithālala naoda rākazangabing chiya awuili ringkaphā masamphangmara. Kachangkhat hila aremana, masili khangahomna.