Read Tangkhul Naga HĀSHOKME 6 Bible Online

HĀSHOKME 6 - Tangkhul Naga bible

HĀSHOKME 6

¹Okathuili ina theikahai makapha [5] akha lei, kala china mibingwuitungli ritlak eina shirena:

²chiya mi akhali lan, sha̱kei kala khayākakā mida, chieina ana ningkachāng saikora mavātlakmana, kha Varena ali chi singlaga ringphākhui khavai pangshap mamimana; kha makathei mi akhana chi shichinthuihaowa; hi aremana kala kakhanang kahaka akhana.

³Mi akhana nao shākha pharākhuida kasāngkha okthuida okpeilaklapai, kha mirinwui ringkaphā masamphangakha, kala chizankhamila maleiakha, ina kahāngna, kachāng mapeila pharātāda thikahaia china ali phāmei.

⁴Kaja chi aremali rālaga tangkhamangli vāhaowa, kala aming tangkhamangna farorhai;

⁵chili lāngda nao china zimik matheimana, khikhala matheimana; kha okkapei mi chili lāngda ana ngasāmkhui.

⁶Mipa china zingkum thingkha thingkha da khani shida okthuilala kaphā ot masamphangakha — athum saikora apam akhali mavāmala?

⁷Mikumowui ngalangkazār saikora awui khamorwui vangna, kha awui zākhangai kapen mavailakmana.

⁸Thangkhameia china mangkhama̱ali mataikhamei khi leikhala? Kala kachāma mi akhana mirin hi kathada ngasungrakhala da kathei china khi phākhamei leikhala?

⁹Ning eina kakahaole mik eina katheina phāmei; hila aremana, kala masili khangahomna.

¹⁰Leikahai ot saikora rida aming phokping kahaina, kala mi hi khikhala da theikahaina, ali pangkhamei mili mangararrarmana.

¹¹Tui chungmei, makānkhanā chungmei, mina phākhamei khi lei?

¹²Kaja khaya̱ thāda, kanthui kahai aremawui mirin ringlakha miwui vang kaphā chi khikhala kaji khipāna theikhala? Kaja awui thili okathuili khi shokrakhala kaji khipāna hāngshapra?