Read Tangkhul Naga HĀSHOKME 7 Bible Online

HĀSHOKME 7 - Tangkhul Naga bible

HĀSHOKME 7

¹ Mingzat khamathāna aman kasaka thaoli phāmei; kala kathi zimikshona kapharā zimiksholi phāmei.

²Zātkhān kasā shimli akazangle chapkhangachāwui shimli akazangna phamei; kaja hi mi saikorawui akatangana, kala ringda khaleiana chi ningli haira.

³Wukkakhanangna khamana̱li phamei, kaja wukkakhanang maina ning mathān ngasaka.

⁴Thangkhamawui ning chapkhangachā shimkhurwui alungli lei, kha mangkhama̱wui ninga lumlao kasāwui shimli lei.

⁵Mangkhama̱wui laa khanganāle thangkhamawui khamachin khanganāna phamei.

⁶Ham azingli ka̱shātthingna khangawok thāda, mangkhama̱wui khamana̱la chithai; hila aremana.

⁷Kachangkhat eina rekakharekna thangkhamei mili mangma̱ ngasaka, kala pheizāna ning makhao ngasaka.

⁸Ot kakupana haokaphokli phāmei, kala khāngkathei ningna lāngkaso ningli phāmei.

⁹ Malung mathuithāk alu, kaja malungkhavāt hi mangkhama̱bingwui makāli kazuna.

¹⁰“Khisāda khare atamna hili phameihaokhala?” da mahānglu. Kaja nana hi khangahān hi thangkhameiwui eina khangahān maningmana.

¹¹Thangkhamei hi shimluikakā thāda phai, kharingbingwui vang kānnālaka.

¹²Kaja thangkhameiwui ngākkhami chi pheisāwui ngākkhami thai; kala theithangkhameiwui kānkhanāva aworna awui mirin phārimi.

¹³Varewui otsak machukyanglu; ana makhuida sākahai chi khipāna ngatar ngasakshaprakhala?

¹⁴Reikasang atamli mathānlu kala kalākashi atamli chukmaja̱lu; Varena akhala akhala kasāna, mikumona awui thili rāshoki kaji maphākhuipai khavaina.

¹⁵Iwui arema mirinli ina ot saikora theihaira; khangaronga mina awui khamashung khangarongli shimān kahai lei, kala makaphā sālaga okapeia makhayā mila lei.

¹⁶Mamashunghenalu, kala na khalatta mathangmeihenalu; khisāda nakhalatta sashimānrakhala?

¹⁷Mazakshinālu kala mangkhama̱la mangasālu; nawui atam maungshungranglakha khi thisānikhala?

¹⁸Hi singtit kahai phai, kala napāng machiholakalu; kaja chiwui eina Vareli khangachee mi shokra.

¹⁹Thangkhameina thangkhamei mili keinung akhawui khamunga tharāli pangkhamei yāng mi.

²⁰Kachangkhat okathuili morei masālak kaji kaphāmang kasā khangaronga mi akhala maleimana.

²¹Mina kahahāng saikora makhuisangalu, nawui raona nali khonkashi nana shāpaishina.

²²Nawuklungna thei kaja na khalattanala kateili tarākha shida khonshihaira.

²³Saikora hi ina thangkhamei eina tamyanghaira; ina hānga “I thangmeira”; kha chi iwui eina tālakhaowa.

²⁴Khalei chila, tālak eina lei, kathukla thukmatailak eina lei; khipāna phāshokrarrakhala?

²⁵Chieina ina thangkhamei phāshok khavai kala ot saikorawui apong phākhavai, kala mangkhama̱wui makaphā makhayā kala kapāwui mangkhama̱ chi theikhui khavai kapeiung kapeivai.

²⁶Kala pāngli mari khānghui, wuklungli khalen eina khailan khalei kathili lāngda khākhamei sha̱nao chi ina samphanga; Vareli ningyāng ungkhangasaka china awui eina yāmshoka, kha morei kaphunga chili ana khuithuihaowa.

²⁷Yanglu, akachanga chi phāshok khavai ot akhali akha ngarumsangda ina samphang kahai chi hina da Hāshokmena hānga,

²⁸iwui ningna latlui latluida phai, kha masamphangmana. Mi thingkhawui alungli mayarnao akha samphanga, kha saikora hiwui alungli sha̱nao akhanidala masamphangmana.

²⁹Yanglu, ina himang samphanga, kaja Varena mikumoli mashunglak eina sāmihai, kha athumna mareimarā kachungkha phashokkhuihaowa.