Read Tangkhul Naga HĀSHOKME 8 Bible Online

HĀSHOKME 8 - Tangkhul Naga bible

HĀSHOKME 8

¹Khipana thangkhamei mi thākhala? Kala khipāna ot akhawui tuikhalat theikhala? Mi akhawui thangkhameina awui mai horngasaka, kala awui ningngaila ngachei ngasaka.

²Awungawui kakaso nganālu, kala nawui kathara tuingashitwui vang wukmakhanangalu;

³awui maiyan eina zathaolu, ringkaphā khavāt tharan mahuinganongalu, kaja ana sākhangai chi sai.

⁴Kaja awungawui tuina mataimeikapa, kala ali khipāna “Na khi kasākhala” da hangshaprakhala?

⁵Kakaso khanganā mi chi kalākashi masamphangmara, kala thangkhamei miwui ningna atam kala apong theira.

⁶Kaja ot saikorawui atamla apongla leisera, kasak china mili ritlak eina shirenhailala.

⁷Kaja ana khi rāshoknikhala da matheimana, kaja hithalakra kaji ali khipāna hangmishaprakhala?

⁸Khipākha manglā ngakhamsingkashap lah kathi zimikshowui akhavā sakashap pangshap maleimana; rai sāmahunglakha ngasāmkhuikapaila maleimana, kala makaphā sākhavai mikahaibinglila china makanmirarmana.

⁹Okathuili sāda khalei saikora, mi akhana akhali chipatta khamā zakhami, saikora hi ina iwui ning horsanglaga munlak eina yanga.

¹⁰Chieina makaphā makhayābingli chifa kahai ina thei; athumna kathara apamli shokzang sāsai, kala athumna keinungli kaphākasāwui vang masot samphanga. Hila aremana.

¹¹Khikhalajila makhayā [6] otsak kasabingli danti miki kaji chi ngalāngda makhamiwui vang, mibingwui ningli makhayāmāng sāngai.

¹²Morei kaphungana makaphā shākhashida sālaga okpeilaklala, Vareli khangacheebingli kaphā sāmira da ina thei, khikhalajila athumna Vareli ngachee;

¹³kha makaphā makhayaale chi mathāmara, awui mirinla akalā thāda masāngsangmara, khikhalajila ava Vareli mangacheemana.

¹⁴Okathuili ngarokho kahai akha lei, khangarongbingna makhayābingna awui otsak athishurda samkaphang thāda samphanga, kala makhayābingnala khangarongbingna awui otsak athishurda samkaphang thāda samphanga. Hila aremana da ina kahāngna.

¹⁵Kala iya ringphākakhui hi phameikapa jira, kaja okathuili mikumowui vang phākashak phākazā kala khalatta ringphākakhui maningla kaphā ot katei maleimana; kaja Varena ali khami hi mirin peida awui ngalangkazārli ngasovāshumra.

¹⁶Thangkhamei chi theikhavai, okathuili kashokshokla yangkhui khavai ina iningli machuklaga ngashun ngayā mina makapi hila thei;

¹⁷chieina okathuili shokta khalei Varewui otsak mina maphākhuirarmana kaji ina theikhuihaira. Mina kayākha ngalangzārda phālala ana maphashokrarmara; thangkhama mina theikhuihaira da hānglala, ana chi masamphangrarmara.