Read Tangkhul Naga SOLOMONWUI LAA 1 Bible Online

SOLOMONWUI LAA 1 - Tangkhul Naga bible

SOLOMONWUI LAA 1

¹Laabingwui Laa hi Solomonwuina.

²O nakhamor eina nana ili maya̱khuisi kaja! Kaja nawui leikashi drakhāra̱lila phāmei,

³nawui thao khaneo nganamphāshuna, naming thao heikashoklaka; chiwui vang ngalānaobingna nali leishi!

⁴Nali nganai ngasakmilu, ini thakusa. Awungana ili awui kāli thānzanga, ithumna mathānda nali ringphārumra; drakhāra̱li lāngda nawui leikashili ithumna sora; athumna nali leishikachangkhata.

⁵O Jerusalemwui naongalāva̱ ngarā! Iya ziklaka, kha ningshāt kai; Kedarwui kachonshim kala Solomonwui chonrān thai.

⁶Kazikwui vang ili mayangkazilu, zinghāmna zikkhangasakna. Ishāva̱wui naomayara ngarāna ili malungvāta, athumna ili drakhā yāmgui khamayona sāngasaka; kha, I khalattawui drakhā yāmgui mamayonmana!

⁷Hāngmilu, imanglāna leikashe, nawui yao kali phāchizātkhala, ngashun kali chipamkhala, kaja kachiwui vang eina ina yaokazatabing thāda nawui ngasotabingwui yaoshang ngalemli pamzatrakhala?

⁸O ngalānaobingwui ngachaili mathāmeikap kachiva̱, nana matheiakha yaoshangwui pheichon kazunda, nawui yaonaoli phāshai ngasaklu, yao kahomnaobingwui kachonshim ngalemli.

⁹Iwui leikashiva̱, ina nali Pharaohwui siguigariwui siguili pāntama.

¹⁰Namaisor ngachān sāri ngayishun, nakahungla chāra̱-chāsān pengpeng kangayishun.

¹¹Sināwui ngachān sāri, lupāsā rukkasang, ithumna nawui vang sāmira.

¹²Awungana awui petli leilakha, iwui nardwui anganam kha̱shoka.

¹³Iwui leikashe, nava iwui vanga iwui sungthei marakli kahai nganamkaphā myrrh arom thai.

¹⁴Iwui leikashe, nava iwui vanga En-gedi yāmguiwui henna asur eina khawon thai.

¹⁵Yanglu, nawui khamathā, iwui leikashiva̱; yanglu, na mathākachangkhata; namik nāsha̱nao thai.

¹⁶Yanglu, nawui khamathā iwui leikashia, mathākachangkhata, iniwui pet matekchimhai;

¹⁷ishi shimwui khangen cedar thingna, matang eina khanji sai.