Read Tangkhul Naga SOLOMONWUI LAA 5 Bible Online

SOLOMONWUI LAA 5 - Tangkhul Naga bible

SOLOMONWUI LAA 5

¹Ina iwui yāmguili rai, izarva̱, iwui khām kahaiva̱, iwui nganamkaphāphā ot eina ngasoda ina myrrh kazipkhui, ina iwui khuihāng eina ngasoda khuira̱ shai, ina drakhāra̱ eina ngasoda seina̱ manga. Zālu O ngasotnaobing, kala manglu: kachungkha manglu, O leikashebing!

²Ina pilala iningva mapivāmana. Nganālu! iwui leikashena khāmong shaoda lei. “Izarva̱, iwui khām kahaiva̱, iwui nāsha̱nao, iwui kākashungva̱ ili shomilu; kaja, ikui ikra̱na ya̱haira, samsa̱la ngayāwui muiyāra̱na ya̱haira.”

³I kashankachon raihaira, I kathāda ngavaikhuiluira? Ipheila pheohaira, kathāda makhaoluira?

⁴Iwui leikashena khāmong rarkhavaili apāng rapokta imalung malaokai.

⁵Ipāngli myrrh ngaya̱mamānda, ipāngmarengli myrrh thao ara̱mang eina iwui leikasheli shomi khavai, khāmong rarkahai chi ina thuisinga.

⁶Iwui leikasheli ina shomi, kha ava thuihairasai. Ana khamatui tharan ining shimānkida sai. Ina ali phai, kha masamphangmana; Ina ali hoi, kha ana mangahānkāmana.

⁷Khamayonabingna keinungli yaozatlakha, athumna ili samphanga; athumna ili shaoda khamā za̱mi, iwui kachonla ngapaithuihao, phākho khamayonabing china.

⁸O Jerusalemwui naongalāva̱bing, ina kahāngna, iwui leikasheli theiakha; ali kahāngmilu, kaja I leishināhaira.

⁹Nawui leikahena khangateiwui leikasheli khi mathākhamei lei, O mathāmeikap kachiva̱? Nawui leikashena khangateiwui leikasheli khi mathākhamei leida, ithumli kachihamkhala?

¹⁰Iwui leikashe chiya horchamrihai kala maiwon shokshuna, thingtharāwui ngachaili ngateihanghai.

¹¹Akui mathāmeikap kaje sinā thai; awui samnaola nganirlaga, hangkhā thāda zika.

¹²Amik ura̱pam ngalemli khalei nāsha̱nao thai, seina̱ eina ra̱vaida charshuna,

¹³Amaisor nganamkaphā thao lingkhavaipam thai. Amorchaina myrrh ara̱ sikakhui timrāwonna.

¹⁴Awui pāngthei hirā rukkasang sinā angumna. Aphasā sapphire heikashān mafahāwui themsak thai.

¹⁵Apheina sinātungli alabaster pākra̱ khaning kahai thai. Awui azakna Lebanon thāda khamathā cedarthing kathāna.

¹⁶Awui akhon shimmeithuiya, kala tongda ningchang kapaimānga. Hi iwui leikashena, iwui khavāknaona, O Jerusalemwui naongalāva̱bing!