Read Tangkhul Naga ISAIAH 1 Bible Online

ISAIAH 1 - Tangkhul Naga bible

ISAIAH 1

¹ Judahwui awungabing Uzziah, Jotham, Ahaz kala Hezekiahwui atamli Amozwui naomayara Isaiahli mahāmida ana Judah eina Jerusalemwui pongli kathei.

²Nganālu, O kazingram; nashunglu, O okathui; kaja PROHOna hānghaira; “Ina nganaokhuida naomayarabing rarhaira, kha athumna ili ngakaishiya.

³Mukkāna awui akhavāli thei, gadhāna akhavāwui khon shai; kha Israelna matheimana, iwui mibingna matheishingkhuimana.”

⁴Iyavo, morei kaphunga yur, khayonkhamāngna shiren kahai mibing, makaphā kasābingwui naotun, khamakhao otsak kasā naomayarabing! Athumna PROHOli horhaowa, athumna Israelwui Katharapā chili ningkachaihaowa, athum ma̱thuichaohaowa.

⁵Nathumna ngakaishichinghaoda shaochingrala? Kui kazānahaira, kala ning thengchaohaira.

⁶Pheimayā eina thuilaga kui kāshungda, chili tāphi kahai maleilakmana; kha khangahak kala khangator, ashee kashok khamāmānga; kasurla masurshok, kharomla marom, arila maneomana.

⁷Nathumwui ngalei ngachakyānghaira, nathumwui keinungbingla meina chuitāmihaira; nathumwui miktāli yangkashebingna nathumwui ngalei ngaponmihaira, yangkashebingna yuihaida chi ngachakyānghaira.

⁸Kala Zionwui naongalāva̱li drakhālui rāmrah thāda nothāhaira, karoptheiwui luirām thāda, kala ngaponthui kahai keinung thāda.

⁹ Ashangva̱wui PROHOna ithum khani kathumli mataimihaisāsi kaja, Sodom kathā kala Gomorrah kathā ngasāhairara.

¹⁰Sodom ngalei khamunga nathum! PROHOwui tui nganālu, Ithumwui Varewui hāngkachithei nganālu, Gomorrahwui mibing nathum!

¹¹ “Nathumna kachungkha pha̱kaphayā chi iwui vang khikhala?” da PROHOna hānga; Yaovābingwui rikkatā kachigat sānhaira kala keimathao kahai sha̱kei ina penhaira; seiwui, yaowui, mevāwui ashee ina maningchāngmana.

¹²“Nathumna khorum khavai iwui mangāli kharā tharan, khipāna nathumli hikatha hi khuiphungda iwui yāngkhupli rākārsanglu jikhala?

¹³Makānkhana kachigat makhuirāluilu; nganamkaphā ot ile ningkachai. Chāngwok phanit, sabbath khamayon, yarui kakazip, makaphā makhayāwui phanitphanao chili ina maja̱mirarmana.

¹⁴Nathumwui changwok kala nathumwui retkahai phanit phanaobing iningna yangkharinga; chibing chi iwui kharita otphun ngasāhaira, I phungsānhaira.

¹⁵“Nathumna pāng phayaikashok tharan, imik nathumwui eina thumhaora; nathumna seihā kachungkha sālala, ina manganāsangmara; nathumwui pāng asheemānga.

¹⁶Nathum khalatta pheohaolu; nathum khalatta samathākhuilu; nathumna sāda khalei makaphā otsak chi imikwui eina khuithuihaolu; makaphā kasā thāhaolu.

¹⁷Kaphā kasā tamkhuilu, mashun phālu, rekakharek mashungkhuilu, avāva̱ makhaleibingli ngākmilu, ra̱meinaowui vang phayatmilu.”

¹⁸“Ralu, ithum bhab tāda ngazekrumkhuisa, da PROHOna hānga: nathumwui morei hungpinghailala, horam thāda charshihaora; ashee thāda hungshihailala, sāhāh kachar thāhaora.

¹⁹Nathumna mayāngaida kahāng nganaakha, ngalei chiwui kaphā athei shaira;

²⁰Kha nathumna mamayāmada ngakaishiakha, raighai shaira; kaja PROHOwui khamor eina hānghaira.”

²¹Ningtongda shitkasanga keinung chi kathāda khayorva̱̱ sha̱nao ngasāhaokhala, mashuna kapemva̱ chi! Khamashung khangarong ali ngasāmkhuisai, kha ara khayumabingmānghaira.

²²Nathumwui lupāsa maripai sāthuiserhaira, drakhāra̱la tara̱ manāthaira.

²³Nathumwui wungnaobing ngakaikashe kala khalebingwui ngasotnaona. Mi kachiva̱na pheizā ningchānga, kala khalem eina khamili kharomzata. Avāva̱ makhaleibingli manganingmimana, kala ra̱meiva̱wui kasakli mayangsangmimana.

²⁴Chiwui vang eina PROHO, saikorawui PROHO, Israelwui Pangshapa china hānga, “Ah, iwui malungkhavāt iwui yangkashibingwuitungli tāraphalung, kala iwui pheiva̱bingli I khalattana athut ha̱ngsangra.

²⁵Ipāng nathumwui shong khareiungra kala reti eina maripai kashutkor kahai thāda, nathumli khamanāt chi sāmathākhuira.

²⁶Kharewui thāda nathumwui bicharwobing hanmiluira, hāngkachitheibingla haokaphokwui thāda mira. Naoda nathumli khamashung khangarongwui keinung hora, ningtongda shitkasang keinung jira.”

²⁷Zionli mashun eina ngatangkhuira, kala chili khaleibingna khangarong eina ningngateiakha ngatangkhuira.

²⁸Kha ngakaikashebing eina morei kaphungbing ngarumda shimān ngasakra, kala PROHOli horkahaibing shimān ngasakra.

²⁹Kaja nathumna ningmachānkasā shirimthing chiwui vang kakhayak samphangra, nathumna kapangkhui kahai yāmgui chiwui vang khayāmalāra.

³⁰Kaja nathum thingnah ngahui kahai shirimthing thāra, kala tara̱ makhalei yāmgui thāra.

³¹Kala kapanga chi khara̱rong ngasāhaora, awui otsak meipā thāra; kala khanini chuirumda sāshimitmi khavai khipakha maleisamara.