Read Tangkhul Naga ISAIAH 10 Bible Online

ISAIAH 10 - Tangkhul Naga bible

ISAIAH 10

¹Khayona tui yonda bichar sakhamebing, rekharek khavai kapida khalei kakapebing,

²khavātabingli mashunwui eina ngareithui khangasakbing, kachāma iwui mibingli athum mashunwui eina namkazābing, ra̱meinao athumwui ngaponzā khavai kasābing, kala avāva̱ makhaleibingwui eina takzā khavai kasābing, kakhanang khonkashi ngasaranu!

³Katāva̱wui eina siphan zingrotwui alungli tandi mikhavai, rāki kaji zimikshothang nathum khi sāra? Ngachonmi khavai khipāli yāmvāra, kala nathumwui lan kali nothāhaora?

⁴Phātop kazangnaobingli ngarumda khangayum maningla, sāthat kahaibingwui ngachaili pitākharum maningla khikha sākhavai maleimana. Saikora hiwui vang awui malungkhavāt mavānranga; kala awui pāng katingchingda lei.

⁵ Ah, Assyria, iwui malungkhavātwui lijei, I malung thuikhavaiwui khāmshui!

⁶vare makathei yur akhali ina ali chihovai, kala ina malungkhavāta mibingwuitungli ina ali kasoi, ngaponkhui khavai, kuinamkhui khavai, kala chānreiwui leipā thāda naikazam khavai.

⁷Kha ana chithāda mangarānmana; awui ningna chithāda maphaningmana; kha awui ningli sāshimān khavai lei, kateokha maningla yur saikorali katat khavai.

⁸Kaja ana hānga: “Iwui kathānabing awunga maningsermala?

⁹Calno hi Carchemish mathāmala? Hamathla Arpad mathāmala? Samariala Damascus mathāmala?

¹⁰Jerusalem eina Samariawuili hakkhamei meoma̱wui wungrambing chili ipāngna vākashung thāda,

¹¹Samaria eina awui meoma̱binglila kasā thāda, Jerusalem eina chiwui meoma̱bingli ina masāmarala?”

¹²PROHOna Zion Phungreili kala Jerusalemli ana sāki kaji ot saikora sākupser kahai tharan Assyriawui awungana khayāning nganingda lāngkaso chili ana tandi mira.

¹³Kaja ana hānga: “Ipangwui yāng eina kala iwui thangkhamei eina ina chi sākāhaisera; kaja ina theishingkakhui lei; Ina yurbingwui thari phurshokmihaira, kala athumwui lanbingla sākathānmihaira; wungpamkhongli kapambingli ina mukkā khuikatā thada khuitāhaira.

¹⁴Vanaothip thāda ipāngna yurbingwui lan samphanghaira; kala horhaikasā ara̱bing mina ngamuikakhui thāda ina okathui saikora kazipkhuihaira; angachāng khangatha̱ khipākha mazangmana, khamorla mamakā; kakhongla makhongmana.”

¹⁵Ngahāna thing kata̱pali langsoda matuipairala kala horaina ali kasingapali reimeipairala? Khāmshuina singkazatpali singtha̱ga kaji thāda; kala mipali khāmshuina khāngkāra kaji kathāna.

¹⁶Chiwui vang saikorawui PROHOna awui kapinga raimiwui alungli shimānkapai kazāt chihovāra; kala awui tekhamatei lungli mei chuira.

¹⁷Israelwui kahor chi mei ngasāhaora, kala awui Katharapā chi meiwon ngasāhaora, kala china ka̱shātla, phānāngla, thangkha chuitup tāhaora.

¹⁸Awui ngahongwui tekhamatei kala ngalei katum PROHOna shimān ngasakhaora, phasā manglā khanini, kakazā mina kaokhangai kakao thāhaora.

¹⁹Awui ngahongthing kateokhamāng shākhaida, naoshinao akhana shānkhuishapra.

²⁰Chitharan Israelwui shākkahai kala Jacob shimkhurwuili ringkasa china athumli kashaopa chili mashailuimara; kha Israelwui Kathara PROHO chili khamashung eina ningshaira.

²¹Jacobwui shākkahai, shākkahaia chi pangshapa Vareli latungra.

²² Kaja nawui Israel mibing shamadruwui situi yākhalala, shākkahai kateokhamāng latungra. Shimān ngasakra kaji hāngtāhaira, khamashung khangarong eina pemtha̱ra.

²³Kaja kaso kahai athishurda PROHO, saikorawui PROHOna okathui saikorawui angalat katanga chi ungshung ngasakra.

²⁴Chiwui vang eina PROHO, saikorawui PROHOna hithāda hānga, “O Zionli kapama, iwui mibing, Egyptnaobingna kasā thāda Assyriawui mibingna nathumli lijei eina shaoda kala nathumwuitungli mamayāla khāmshui kapar tharan, athumli mangacheealu.

²⁵Kaja atam kasha̱kha leilaga iwui malungkhavāt vānhaora, kala iwui malungkhavāt chi athumwui shimān khavai ngasāra.

²⁶Kala saikorawui PROHOna Orebwui lungharpamli Mediabingli kashao thāda khara̱wui lijei parra; kala awui lijei chi shamadrutungli leira, Egyptli kasā thāda ana khāngkāra.

²⁷Chitharan awui otphun kharit chi nathum yartuiwui eina ngavātāhaora, kala awui kashai nathumwui akahungwui eina sāshathaora.”

²⁸A Aiathli rāshunghaira; a Migron kānvāhaira, Michmashli awui otrom kaziphai.

²⁹Athumna makān khavai chi kānhaira, Gebali thang ngayākhawui vang ngasāma; Ramahna nganuka, Saulwui Gibeah yāmhaira.

³⁰Pangmeida vaolu, O Gallimwui naongalāva̱! Nganālu, O Laishah! Ali ngahānkālu, O Anathoth!

³¹Madmenah yāmzatta lei, Gebimli kapambing kalā mashi khavai yāmura.

³²Aja hi ana Nobli ngasāmra, Ana apāng ngashumda khanukra Zion naongalāva̱wui kaphung Jerusalemwui kaphungli.

³³Yanglu, PROHO saikorawui PROHOna khangacheewui pangshap eina ngasoda aphāngbing chi katattāhaora: Juimatailak kahaibing chi ta̱tāhaora, kala khamashona chi nemtā ngasakra.

³⁴Ngahong kashāshā chi ana ngahā eina tangtāhaora, kala Lebanonwui khayā kakā thingbingla pithui haora.