Read Tangkhul Naga ISAIAH 13 Bible Online

ISAIAH 13 - Tangkhul Naga bible

ISAIAH 13

¹ Babylonwui pongli Amozwui naomayara Isaiahna kathei khamarān:

²Ngaiphui kahai kaphung akhali machut khavai akha sālu, athumli panglāk eina vaolu; khangambingwui ngaveili zangkhavai athumli pāng yaplu.

³Iwui tharchigat kahaibingli I khalattana kasohaira; iwui malungkhavāt chithei khavai iwui kapangabingli hohaira; iwui maikhayāli khamathānabing.

⁴Nganālu, mi kachungkhawui khon thāda phungreitungli ngurngur kahai chi! Nganālu, wungrambingwui khonkazar chi; miyurbingwui kazip khangarum chi! Saikorawui PROHOna rai ngarar khavai raimi ashangva̱ kazipta lei.

⁵Athum ngalei katāva̱wui eina rai, kazingram akatangwui eina, PROHO kala malungkhavātwui zeighai ngahā eina, okathui tongda shimān ngasak khavai.

⁶Chapngachālu, kaja PROHOwui zimiksho chi nganaihaira; Sāshap-pangshapawui eina sākashimān rāra!

⁷Chiwui vang saikorawui pāng tāta̱haora; mi kachiva̱wui ning shimānhaora,

⁸athum malung ringhaora. Khangashei eina kachotna athumli yuira; sha̱nao naokhara̱ thāda chotra. Athum akha eina akha chipāda yang ngarokra, athumwui mai hungpinghaora.

⁹Yanglu, PROHOwui zimiksho chi rārāli, sākashi, malungkhavāt eina malung thuilak kahai eina ngasoda, okathui ngachakyāng ngasakhaida, chiwui alungli khalei morei kaphungbing shimān ngasak khavai.

¹⁰ Kaja kazingramwui sirā kala sirāyurna athumwui kahor mamimara; zimikna kashok tharan tangmangra, kala kachāngna awui kahor machishotmara.

¹¹Apuk-apagana makaphāwui vang ina tandi mira, kala makhayābingli khayonkhamāngwui vang; khayāning khanganing langkaso ngalatmihaora, sākashewui hiksor kahai nemtā ngasakra.

¹²Tānglāk kahai khamathā sinali tāngkhamei mi ina sākhuira, kala Ophirwui sināli sakkhamei mikumo sākhuira.

¹³Chiwui vang eina ina kazingram nganuk ngasakra, okathui awui pam eina khanukshokhaora; saikorawui PROHO malungvātta awui malungthuilak kahai chitharan.

¹⁴Rengkazat chao thāda, ngakuikhame makhalei yao thāda, mi kachiva̱ kachichā mibingwuili latungra, kala mi kachiva̱ kachichāwui ramli yāmungra.

¹⁵Samkaphaphang mili topursangmira, kala tukkakhuibingli raighai eina yortāra.

¹⁶Athumwui miktāli naongarāli shirkazamra; athumwui shim ngaponmihaora, kala preiva̱̱ ngarāli sākhamāngmihaora.

¹⁷Yanglu, lupāli maningkachānga, sinali makakahao Medenaobingli ina ngatha̱ ngasakta lei.

¹⁸Athumwui malāthing eina yaronnaobingli kapthatra; athumna naopamwui athei chili malumashanmara; athumwui mikna naoshinaobingli malumashanmara.

¹⁹ Kala wungrambingwui tekhamatei, Chaldeanaobingwui maiyā khavai Babylon chi, Sodom eina Gomorrah thāhaora Varena khayui tharan.

²⁰Chili mi mapānluilakmara, thot kachida kasomla masomluimara, Arab khipākhana chili kachonshim makhaningkāluimara, Yaokahom khipānakha athumwui yao ashangva̱ chili machipammara.

²¹ Kha ramsābingna chili pira, chiwui shimbing chi kakhonga sāyurna pemra; ostrich vānaobingna chili pamra, kala chili satyrna pheichak sāra.

²²Chiwui dolanli hyenana khongra, khamathā keinungbingli ramfana khongra; chiwui atam nganaihaira; zimiksho chi masāngluimara.