Read Tangkhul Naga ISAIAH 15 Bible Online

ISAIAH 15 - Tangkhul Naga bible

ISAIAH 15

¹ Moabwui pongli khamarān: Khikhalajila Arli thangngayākha akha̱ sāmihaoda Moab kuphaira; khikhalajila Kirli thangngayākha akha̱ sāmihaoda Moab kuphaira.

²Dibonwui naongalava̱ chapngachā khavai apam kajuijuili kāhaira. Nebo eina Medebawui vang Moabna chapngachai. Kui kachiva̱ ngakokserhaira, morhā kachiva̱ sitāserhaira;

³chānreili athumna bora ngavaizata; kayāngli, shimtungli mi kachiva̱na chapta chāra̱ longtai.

⁴Heshbon eina Ele-alehna chapa, aniwui akhon Jahaz eina tangda shāvai; chiwui vang eina Moabwui khutlai kasingbingna panglāk eina chapa; awui manglā kathira.

⁵Iningli Moabwui vang chapa; awui yāmkazatbing Zoarli kala Eglath-shelishiyahli yāmvai. Kaja Luhithwui ashanli athumna chapmamānda kai; Horonaimwui shongfali athumna sākashimānwui akhon akha vaowa.

⁶Nimrimwui tara̱ ngachakyānghaira; khawo kaohaira, ashon kathar mashokrarthura; matekchim kahaila maleithura.

⁷Chiwui vang athumna sorkhangasai tongkakhui kala athumna kazipsang kahai chi, athumna Shumthing[9] wui Kongrā kānda phungkai.

⁸Kaja Moabwui lam kuimareida kachapkhon akha ngayaovāhaira, chapkhangachā chi Eglaim vāshunga, chapkhangachā chi Beer-elim vāshunga.

⁹Kaja Dibonwui tara̱ asheena pemhaira; thālala Dibonli ina chili lāngmeida khuirāra, Moabnao yāmshok kahaibingwui vang, aramli shākkahaibingwui vang, ina kazingkha̱ akha khuirāra.