Read Tangkhul Naga ISAIAH 16 Bible Online

ISAIAH 16 - Tangkhul Naga bible

ISAIAH 16

¹Ngalei khamungali athumna yaonaobing chihovai; Selawui eina siwuk apong kānda, Zion naongalavawui kaphung vāshungda.

²Athip sākathānmi kahai yongkazat vānao thāda, Moabwui naongalava̱ ngarā Arnonwui kongpheili ngapha̱ra.

³“Kahāngchitheimilu, mashun khamilu; ngashunung ngayā thāda, nawui khaya̱ khayinkhamilu; horkahaibingli thumilu, yāmkazatbingli mayansaimialu.

⁴Moabwui ngareng kahaibing nathumli zatrumranu, sakashimānawui eina, athum ngayinkhui khavai akha ngasāmilu. Rekakhareka maleilui kaji tharan, kala sakakazam vānkahai tharan, phei eina naikagazama ngalei hiwui eina thuikahai tharan,

⁵makhangachei leikashilungli wungpamkhong akha sakāra, Davidwui kachonshimlungli ningkatong eina sakāra, bichar sakhame kala mashun ningkachānga, khamashung khangarong kasa kathāka.”

⁶Moabwui lāngkaso ithumna shāhaira, kayākha langsosākhala; awui ngamkacho, lāngkaso, kala awui maikhareo aremawui langsotsera.

⁷Chiwui vang eina Moab chapngachāranu; mi kachiva̱na Moabwui vang chapngachāranu. Wukkhananglak eina chapngachālu; Kir-haresethwui drakhāthei khamuiwui vang.

⁸Kaja Heshbonwui luibing ngahuiya, Sibmahwui drakhā theirongla; yurbingwui khamungbingna awui aphāngbing katatāmihaira, aphāngbing chi Jazer kala siwukli ngachuivai; ashon ayarli ngachuivāda shamadrutung makānvai.

⁹Chili Jazerwui chapkhangachā eina ngasoda ina chapa, Sibmahwui drakhārongwui vang; iwui chara̱na nanili tāsopmihaira, O Heshbon eina Ele-aleh; kaja naniwui theishirai eina mahā atamli raikhon rāshunghaira.

¹⁰Luiwui theishiraiwui eina ringkaphā khamathān khuithuihaira, kala drakhā yāmguili laala masāluithura, akhonla mavaothura; drakhāra̱ kasurla maleithura, drakhāthei kaphāwui akhonla va̱rihaphaira.

¹¹Chiwui vang imanglāna Moabwui vang lyre thāda ngahuiya, kala Kir-heres wui vang ining sifaya.

¹²Kala Moabna seihā sākhavai apam kajuiva̱li, chotlak eina kalāla khikha kānkhana maleimara.

¹³Hi thuikahai atamli Moabwui pongli PROHOna hāngkahai tuina.

¹⁴Kha ara PROHOna hānga, “Kum kathumwui alungli ngalangkaphei miwui zingkum thāda, Moabwui tekhamatei maishi ngasakra, awui mi sorngasailala, mathila ringkashokbing chi teomeikhamara kala khangazanla ngazanra”