Read Tangkhul Naga ISAIAH 19 Bible Online

ISAIAH 19 - Tangkhul Naga bible

ISAIAH 19

¹ Egyptwui pongli khamarān tui: Yanglu, PROHOna kathaka muiyā tongda Egyptli tai; kala Egyptwui meoma̱bing awui mangāli kathirra; kala Egyptnaobingwui wuklung khalatta menghaora.

²Kala ina Egyptnaobingna Egyptnaobingli mamayā khavai kasatra, kala mi kachivana achinangarāli, mi kachivana awui khongnaiali, keinung eina keinung, wungram eina wungram ngashao ngarokra;

³kala Egyptnaobingwui ning thenghaora, kala ina athumwui khangarān chi pa̱ngapā ngasakra; kala athumna meoma̱li kala kazeikasing khanong sākatheibingli ngasanra;

⁴kala ina athumli, sākashe akhavā akhawui pāngli horsangmira; kala sakashe awunga akhana athumwuitungli mungra, da PROHO, saikorawui PROHOna hānga.

⁵Kala Nilewui tara̱bingla thenghaora, kala kongla thenghaida ngachakkhaira;

⁶kala chiwui ra̱shongla nganamshihaora, kala Egyptwui kong Nilewui aphāngbingla suitāmamānda thenghaora, titi kala khawo kateila shuiserhaora.

⁷Nile kongpheili kala kong ngalemli, masaikok kahai apam kachungkha leira; kha Nile ngalemli yaokahai saikora kaothiserhaora. kashamhaida maleiluimara.

⁸Khai kaphābing sifada chapra, Nile kongli khaisui kasui hupta; kala tara̱lungli khailan kahorbing ning thengchaohaora.

⁹Seipeng kashireibingla, vatwui kachon kharakbingla ningngaimāserra.

¹⁰Ngalei chiwui pākra̱ kasābingla akha̱ sāhaora, kala ngalang kapheia saikora khananghaora.

¹¹Zoanwui wungnaobing mangmashuna; Pharaohwui kathema machinmebingna makānkhanā tui hāngmi. Pharaohli, “I thangkhamawui nao akhana, achālakha awunga sākasāwui nao akhana” da nana kathāda hāngpaira?

¹²Chithakha nawui thangkhamabing kali leili? Egyptwuitungli saikorawui PROHOna khi ngarānhailikhala kaji chi nali athumna hāngchitheiranu.

¹³Zoanwui wungnaobing mangma̱haira, kala Memphiswui wungnaobingli kapikhaira; shang-shangwui phungva̱bingna Egyptli thannguihaira.

¹⁴PROHOna pa̱khangapāwui ning sangmihaira; kala khamaripa mina yuichāchāng malokazat thāda; otsak saikorali athumna Egyptli ngayit ngasakhaira.

¹⁵Kala akuinala, akhameinala, khaneirong aphāngnala, titinala Egyptwui vang khikha sākashap maleimara.

¹⁶Chitharan Egyptnaobing sha̱nao thāhaora, kala athumwuitungli saikorawui PROHOna khanuk khavai pāng chili ngacheeda kathirra.

¹⁷Judahwui ngalei chi Egyptnaobingwui vang khangachee azak ngasāhaora. Saikorawui PROHOna athumwuitungli ngarān kahai chi hāngchithei kahaiya mi kachiva̱na ngacheera.

¹⁸Chitharan Egypt ngaleili Canaantui khamatui, kala saikorawui PROHOli khangashitwui shākhi kasā keinung phangā leisāra. Chiwui ngachaili akhali Zimikwui Keinung hora.

¹⁹Chithanghon Egypt ngaleiwui alungthungli PROHOwui hanphut akha, chiwui ayarli PROHOwui kathara pākra̱ akha leisāra.

²⁰China Egypt ngaleili saikorawui PROHOwui machut khavai kala shākhi akha sāra, singkakharengwui vang athumna PROHOli khangakao tharan, huikhame akha chihorāra, kala athumli kanmira.

²¹Kala PROHO akhalattana Egyptnaobingli theingasakra, kala athumna PROHOli theikhuida rikkatā pha̱kaphayā eina ngasoda khorumra. Athumna PROHOli tuingashit sāra kala chiwui athishurda sāra.

²²PROHOna Egyptli hāngmachinra, kashaola shaora, kharaila raimida athumna PROHOli latungra, kala athumwui kapo saikora shāmida raimira.

²³Chitharan Egypt eina thuilaga Assyria vāshungda chānrei akha leira; Assyriawui mibingna Egyptli rāra, Egyptnaobingna Assyriali vāra kala Egyptwui mibingna Assyriawui mibingli ngasoda khorumra.

²⁴Chithang okathuiwui alungli sokhami chi Israelna Egypt eina Assyriali ngasoda kakathuma sāda samphangra,

²⁵saikorawui PROHOna somida, “Iwui Egypt, iwui pāngsak Assyria kala iwui shimluikat Israelli ringkaphā ngasaranu.” da kahānga chili.