Read Tangkhul Naga ISAIAH 23 Bible Online

ISAIAH 23 - Tangkhul Naga bible

ISAIAH 23

¹ Tyre eina Sidonwui pongli khamarān tui: Chapngachālu, O Tarshishwui marikhongbing, kaja Tyre ramchohaira, zunkhui khavai shimla maleilui! Cyprus ngaleiwui eina hi athumli phongkhamina.

²Chingrihailu, O ngayipheili kapambing, O Sidonwui leihkhalonbing; nathumwui paophungmebing shamadru kānda

³tara̱ kachungkhawuitungli zatta lei; nathumwui shai kakhui chi Shihorwui theishiraina, Nilewui heiunna; nathum yurbingwui leihkhalona sāsai.

⁴Vaishilu, O Sidon, kaja shamadruna hānghaira, kathuka shamadru china hānga, “I nao khara̱la, kapharāla maleilakmana, I nao mayarnaola kala kachingva̱ sha̱naobingla manganaokāmana”

⁵Pao chi Egyptli rākashung eina athumna Tyrewui vang ning chotra.

⁶Tarshishli kānkalu, chaplu, O shamadrupheili kapambing!

⁷Achālakhawui eina leikasā, ngalei katāva̱li apam khavai khuivā kahaia, ringkaphā nawui keinung chi hila?

⁸Pāsi khangakhama, wungnaobingna leihkhalon, okathuina khayākashiya leihkhalonbing Tyrewuitungli hikathā khipāna shok ngasakhala?

⁹Tekkhamateiwui langsot sākhamāng khavai, okathuiwui maikhayā saikora maishi khavai, saikorawui PROHOna ngarān kahaina.

¹⁰Nile kong thāda nawui ngalei pemtha̱ ngasaklu, O Tarshishwui naongalava̱, ara pānkhavai maleiluilakmana.

¹¹Ana shamadru tungli apāng katingvāhaira, ana wungnaobingli khanukhaira, PROHOna Canaanwui pongli kasohaira, raipan sakhai khavai.

¹²Kala ana hānga: “Na khayuiwui ringkaphā maleiluimara, O singkhareng kahaia, Sidonwui kachingva̱ naongalava̱; ngakarthuilu, Cyprus kānvalu, chieina tangdalila tāphup kahai masamphangmara.”

¹³Yanglu Chaldeanaobingwui ngalei chi! Mibing chi hina Tyre maningmana. Athumna Tyre ramsābingwui vang sāngasaka. Athumna raiyot tārong sakai, keinung ngapaikhuida mei thotta athumna ali yumchao ngasaka.

¹⁴Chaplu, O Tarshishwui marikhongbing, kaja nawui raimipam acho ngasāhaira.

¹⁵Chithanghon, awunga akhawui okthot thāda, Tyreli zingkum hangshiniwui vang malaihaora. Zingkum hangshini apeilam khayorva̱̱wui laali kasā thāda Tyreli rāshokra.

¹⁶Tingteilā akha khuilu, keinung kuimareida vālu, O malai kahaiya khayorva̱̱! Ningkhamayunglaa sālu, laa kachungkha sālu, nali phaningung khavai.

¹⁷Zingkum hangshini apeilam, PROHOna Tyreli yaorāra, kala ana kharewui leihsakli latungra kala apuk-apagali khalei okathuiwui wungram saikorali khayorva̱̱ sāda leih lonra.

¹⁸Awui leihsak kala awui leihsakman chi PROHOli chigatra, makaziphaimara; kha awui leih china PROHOwui ngalemli kapam athumwui vang sorkhangasai kashakazā kala khamathā kashankachon mira.