Read Tangkhul Naga ISAIAH 25 Bible Online

ISAIAH 25 - Tangkhul Naga bible

ISAIAH 25

¹O PROHO, na iwui Varena; ina nali sora, namingli sora; kaja nana matakhak kahai otbing sāhaira, achālakha ngaranping kahai makhangachei otmānga.

²Kaja nana keinung chifa sāngasakhaira, raipan ngaruimit kahai konung macho ngasaka; yangkashewui keinung, keinung masāluimara, masākārarluimara.

³Chiwui vang kapanga yurbingna nali tekmatei ngasakra; lukhamashan makathei yurbingwui keinungna nali ngacheera.

⁴Kaja na kachāmbingwui raipana, khavāta kakhanangbingwui raipana, siphan-zingrot atamwui ngayin khavai kala zinghām atamwui khaya̱na; kaja sākashebingwui sāshāt, masina shimrāpli ungkakathang kathāna;

⁵katheng apamli zinghām khamaling kathāna. Zinghāmli muiyā shingkahai thāda yangkashebingli nana akhon mashok ngasakmana, chiwui vang eina sākashebingwui laa ngasāmhaira.

⁶Phungrei hili saikorawui PROHOna okathui miyur saikorawui vang zātkhān akha ngarānmira, aman kasaka kashakazā kala mathāmeithui kaji drakhāra̱ eina.

⁷Kala miyurbing eina yurbingli fakhamhaida khalei chonrān katha chi ana phungrei hili khuithuimihaora.

⁸ Kathi kaho chi katang mavaila ana mayuitāhaora; kala Proho VAREna mi saikorawui chāra̱ mitmira. Kala awui miyurwui kakhayak chi okathuiwui eina khuithuimihaora da PROHOna hānghaira.

⁹Chithanghon hithāda hāngra, “Yanglu, hi ithumwui Varena; ana ithumli kanmirada ithumna ali ngarai. Hi ithumna khangarai PROHOchina; ithumna awui huikhamili ringphāsa kala mathānsa.”

¹⁰ Kaja PROHOwui pāngna kaphung hili ngasāmra, kala khorchopli lanji naikakazam thāda Moabli naikazamra.

¹¹Ra̱khayāk mina pāng kakating thāda, chitharan ana pāng katingshokra; kala awui langkaso kala pāngthem chi PROHOna khikha makhaning ngasā ngasakhaora.

¹²Kala awui kajuiya phaklāng ana sakhaimihaida ngaleili akha̱ sāngasakra.