Read Tangkhul Naga ISAIAH 26 Bible Online

ISAIAH 26 - Tangkhul Naga bible

ISAIAH 26

¹Atam chitharan Judah ngaleili laa hi sāra: “Ithumwui khangazipa keinung akha lei; huikhami eina ana phākho eina raipan sāmi.

²Ngavei chi sholu, shitkasang khamayona khangaronga yur zangranu.

³Nali ning horkasanga kala nali shitkasanga a chili nana chingri eina nganaomi.

⁴PROHOli shitsanglu katang mavaila, Proho VAREna katang makhavai lunghārna.

⁵Kaja kajuipamli, khamashona keinungli kapambing, khanem pamli khuitāhaira, chifalungli horsanghaira.

⁶Kachāmabingwui phei, khavātabingwui pheikarna naikazama.

⁷Khangarongbingwui shongfa ngachamthamhai; khangarongbingwui shongfa nana tāngpat eina sāmi.

⁸Nawui bichar athishurda, O PROHO, Ithumna nali ngarai; nawui mingli phaningkhaung ithumwui manglāna kakahaona.

⁹Imanglāna nali ngayā phai; kaja okathuili nawui bichar theilaga apuk-apagawui mibingna nawui khangarong theikhui.

¹⁰Makaphā makhayā mili ngahānkhangai chitheiakha, ana khangarong matamkhuimana. Khangarongwui ngaleili ana mashongachei ngasaka kala PROHOwui tekhamatei matheimana.

¹¹ O PROHO, napāng khāngkāhaira, kha athumna chi matheimana. Nana nawui mibingli ningkasang athumli theingasakta khayakranu, nali yangkashebingwui mei china athumli shimān ngasaklu.

¹²O PROHO, nana ithumli chingri kahai mira, ithumwui ot saikora nana sāmihaira.

¹³O PROHO ithumwui Vare! namāng maningla ithumli akhavā khangateinala munghaira, kha namingmāngli ithumna shitsanga.

¹⁴Athumva thihaira, maringmara; athuma khaya̱na, mangakarthuiluimara; nana athumli shimān ngasakserhaida khipānakha maphaningungluimana.

¹⁵Kha nana yur hi mataisangmihaira, O PROHO, nana yur hi mataisangmihaira; nali sochikata; yurwui thari kuimareida haksang ngasakmi.

¹⁶O PROHO, kakhanang atamli athumna nali phai, nana hāngkhamachin tharan athumna nali seihā sai.

¹⁷Atam ungkashung tharan, sha̱naona naokhara̱wui ringkhangā thāda, PROHO ithumla nawui mangāli chithasai.

¹⁸Ithumna naokhara̱ thāda ringngai, kha kānkhanā khikha mashokmana. Okathuiwui vang ithumna huikhami ot masāmihaimana kala apuk-apagali pānda khaleibingla mapitāmana.

¹⁹ Thikahaibing athumwui phasā eina ngakarthuiluishitra. O chifali okkathuibing, ngakarthuida khamathānwui laa sālu! Kaja ikra̱na apuk-apagva̱̱li ning mathing khangasak thāda, PROHOnala achā thikahai athumli ngakarthui ngasakluishitra.

²⁰Ralu, iwui mibing malungkhavāt mavānranglakha, nathumwui kāli zangda, kala khāmong shungnamhailaga kasha̱kha yāmngathumsalu.

²¹Kaja yanglu, PROHO awui pamwui rārāli; mikumoli athumwui moreiwui vang danti mikhavai, kala okathuina awuitungli ashee tākahai chi lānchitheida, sāthat kahaibing chi mathumiluimara.