Read Tangkhul Naga ISAIAH 28 Bible Online

ISAIAH 28 - Tangkhul Naga bible

ISAIAH 28

¹Ephraimwui khamaripbingwui lāngsot kuihon, khamathā tekhamatei pa̱tāki kaji awon, ngaleikatumli pamda mariprei kahaibingna khangahon chi, kakhanang ngasāranu!

²Yanglu, PROHOwui kapang-kapinga akha lei, theihkatā thongyāng thāda, shimān khangasaka unshimui thāda, hakkhamahā tara̱ kaphong thāda, ana okathuili zakshilāk eina hortāhaora.

³Ephraimwui khamaripbing lāngso khavai kuihon chi, phei eina naikazamhaora.

⁴Khamathā tekhamatei, ngaleikatum tampākli khalei, lumkachāng marāranglakha minkhare khaorāthei thāda, mina kathei eina, apāngli singkhui khaleoda shaihaowa.

⁵Chithang saikorawui PROHOna tekhamateiwui kuihon ngasāhaora, kala awui shāk kahaiwui vang khamathāwui kuihon ngasāhaora.

⁶Mashunwui manglā chi wungpamkhongli kapama chiwui ngasāhaora. Kala pangshap chi ngaveili rai marā khangasaka chibingwui ngasāra.

⁷Hibingla drakhāra̱na marip ngasaka, zamsheina ngayit ngasaka, Pāngmonla, marānla zamsheina ngayit ngasaka, drakhāra̱na pa̱ngapā ngasaka; zamshei mangmangda khamaripa eina mahākhami theingui ngasaka, bichar kasāli konglui ngasaka.

⁸Kaja table katonga puida malosanga, makhamakhao apam maleimana.

⁹“Khipāna ali tamchitheira? Kala khipāli pao chi hāngchitheira, na̱ khamangnaolika, na̱ khareinaolirakhala?

¹⁰Kaja hi arahnaowuitungli arahnao, arahnaowuitungli arahnao, tuipengwuitungli tuipeng, tuipengwuitungli tuipeng hili kateokha, chili kateokha” na.

¹¹ Kha makathei miwui khamor eina, kala makashā miwui male eina PROHOna miyur hili matuira,

¹²ana athumli hithāda hānghaisai; “Hi ngasāmkakhuina, kachotbingli ngasāmkhui ngasaklu; hi chingri kahaina”; chithālala athumna makhuisangmara.

¹³Chieina PROHOwui tui hi athumwui vang arahnaowuitungli arahnao, arahnaowuitungli arahnao, tuipengwuitungli tuipeng, tuipengwuitungli tuipeng hili kateokha, chili kateokha; shupkhuida tamchithei; chieina athumna pheingaphokta kongluira, khalenli manda tukkhuihaora.

¹⁴Chiwui vang eina mashātkatheibing, Jerusalemwui mili khamungbing! PROHOwui tui nganālu.

¹⁵Kaja nathumna hithāda hānghaira; Ithumna katheli tuingashit sāhaira, kazeiramli mayākhangarok leihaira; hāngkhavai makhalei rekakharek rālala ithumli marāza̱mara. Kaja kakapikli ithum ngayin khavai sai. Kala mikhanamli, ithumna ngasāmkhuihaira.

¹⁶ Chiwui vang eina Proho VAREna hithāda hānga: “Yanglu, Zionwui shimphungali akhoka sākhavai mayarkazak kahai, khamakanga kala makhangatha̱a lunggui shunhaira. ‘Shitkasang khangatarbing ningnganungkhunghai.’

¹⁷Kala ina mashun eina feeta sāra; kala khangarong eina urum sāra.” Kakapikabingwui ngayin khavai chi theihna pha̱thuihaora; ngasām khavai chi tara̱na ngaphumhaora.

¹⁸Chitharan katheli tuingashit sākahai chi makānāmara; kazeiramli ngasoda mayā khangarok chi manganingrarmara; hāngkhavai makhalei rekakharek kharā tharan nali ngaphittāhaora.

¹⁹Kala chi kharā kachida nali za̱chingra; kaja chi ngathor kachida rāra, ngashunla ngayāla rāra; pao chi bhab katā tharan ngacheenāhaora.

²⁰Mashongshak eina pikhavai akhawui vanga pet chi sha̱nai; kachonla teonāhaida makhaluipaimana.

²¹ Perazim kaphungli kasā thāda, Gibeonwui tampākli kasā thāda PROHOna malungvātra; Awui sāki kaji ot chi—ngakheikhang kahai otna.

²²Chiwui vang eina ara mamana̱shialu; nali khalap kahai chi makangmeihaipaishina; kaja ngalei katonga sākazam khavai hukhum chi saikorawui PROHO Varewui eina ina shāhaira.

²³Nāshunglu, kala iwui tui khuilu; Nganālu, iwui kahāng khuisanglu.

²⁴Athā yaokhavai luikhavā china khangasām maleila lui vāchingla? Awui lui katang mavaila changchingla?

²⁵Ana ngalei chi khayām kahai eina kayanghanthā, hanshi kathā mayaomala? Kala kehu pareng eina yaolaga ngum apam chālak eina malingsangmala? Tharāthei angatātāli mamashirsangmala?

²⁶Kaja ali tamchitheitit kahaina; awui Varena tamchithei kahaina.

²⁷Kayanghanthāli mazaithing eina mazaikhuimana; hanshila gari kāngkhong eina matakmana; kha kayanghanthāli lenguinao eina zaikhui, hanshili thingnao eina ngaphitkhui.

²⁸Mina mā amathir thāda ngataila? Ana mangaposhonmana; sigui eina siguigari kātaklala akha̱ masāngasakmana.

²⁹Saikora hi saikorawui PROHOwui eina kashoksera; pangshap khaleiya china ayuk-ayān unglak eina ngarānkharik kahaina.