Read Tangkhul Naga ISAIAH 29 Bible Online

ISAIAH 29 - Tangkhul Naga bible

ISAIAH 29

¹Ho Ariel, Ariel, [10] Davidna rairum sāvaikasā keinung! Kumshok kumzang, kum kachida zātkhān sāshon sāthai.

²Chithālala Arielli ina khanang ngasakra, sikafa chapngachā lei ngasakra; chieina a iwui vang Ariel thāra.

³Ina nali kuimareida pamphinra, dolan eina kuiphinda, raipan sāphinhaora.

⁴Kathuka ngaleizingshongwui eina nana matuira, kapaia chifawui eina nawui tui shokra; nawui akhon ngaleizingshong eina sha̱na khamatuiwui akhon tākamra, kala nawui tuimatui chifawui eina kasupshokra.

⁵Kha nawui yangkashe shānla makakhui chi, khikha makhaning chifa thāhaora. Lukhamashan makatha̱a kachungkha chi phankazat lanji kathā ngasāhaora. Kala mik khayipkhali kashuirak eina,

⁶saikorawui PROHOna nathumli rāra; kazing-khangashum, neina̱ kakhanuk akhon panglāk eina, surkakhaning, siphan-zingrot ngasha̱da, meiwon eina ngasoda rāra.

⁷Arielli khangarar mahāngkharar yur saikora, awui raimibingli khangararbing, ali khanang khangasakbing, mangshong thāhaora, ngayāshong khamahā thāhaora.

⁸Kathai mina mangshong phazālala khamathuk tharan mathokasa thāda, ra̱kachanga mina mangshong tara̱ manglaga khamathuk tharan ra̱kao za̱laga leikasā thāda; Zion Kaphungli rākhangarar yur hupta chithāpapamra.

⁹Nathum khalatta mangma̱khuida nganingunghailu; khalatta ngapeokhuida mik ngapeolu! drakhāra̱ mamangla maripreihairanu; zamshei mamangla yuichachānghairanu.

¹⁰ Kaja PROHOna nathumwuitungli piphupkhangaiwui manglā heirorhaira, kala marānbing, nathumwui mik fakhammihaira, kala kui fakhammihaira.

¹¹Saikora khamahā hi nathumwui vang mahor namkahaiwui lairik kathā ngasāhaowa. Khikateikhada pākatheibingli, “Hi palu”, da kasoakha athumna, “Mapārarmara, hi mahor namkahaina” da hānga.

¹²Kala lairik chi mapākathei akhali “Hi pālu” da kahāng eina, “Mapātheimana.” jihaowa.

¹³ Kala PROHOna hānga, “Miyur hina khamor eina nganailaka, morchai eina ili khayāshiya; kha wuklunga iwui eina katāva̱li lei; athumna ili khangachee chiya mibingwui ningkhami eina tamkhui khamaronna.

¹⁴ Chiwui vang eina yanglu, matakhak kahai ot ina athumli saluishitra, hakkhamahā kala matakhak kahai ot; thangkhamabingwui thangmei shimānhaora; theithangkhamabingwui theithangkhamei chi ngathumihaora”.

¹⁵“Ithumli khipāna theira, khipāna machutra?” da PROHOwui eina tangkhamangli ngathumda ot kasābing, kakhanang ngasāranu!

¹⁶ Nathumna ot saikora masho-ngachei ngasakhaira! hamkasaali ngaleina jirala? Sākakhui ot china kasāpali “Ili ana masāmana” da hangrala? Kala sākakhui ot china sākakholi, “A khikha matheimana” jirala?

¹⁷Athei kachungkha matheiki kaji luili ngahongna da kaphaning, Lebanon, athei kachungkha khamathei luipam ngasāki kaji masāngmana da matheimala?

¹⁸Chitharan lairikwui tuibing hi khanā khangakhokana shāra, athumwui khangami kala tangkhamangwui eina mik khangapeoana theira.

¹⁹Malungkhanima china PROHOwui khamathān samphangra; kala miwui ngachaili kachāmabingna Israelwui Kathara Ali mathānra.

²⁰Kaja lukhamashan makatha chi khikha masā khavai ngasāhaora, kala mana̱shikazar mi chi ngalathaora, kala makaphā sākida khangaraia saikorali katathaora.

²¹Chānhān eina mibingli ning saza̱ khangasaka, machinkhameli ngaveili khalen kasanga; mashun khaleia ali kapikta nguikhangasaka athumli katathaora.

²²Abrahamli ngatangkhame PROHOna Jacob shimkhurwui pongli hithāda hānga: “Jacob makhayakluimara, amai tarātahaora.

²³Kaja iwui pāng eina semkahai awui naongarā ana theilaga athumna iming tharngasakra; athumna Jacobwui Tharkhamathenga chili tharngasakra, kala athumna Israel Varewui mangāli khayāshida nganingra.

²⁴Manglāli khayon sākahaibing china theikakhui samphangra; kakhalopbing china tamkachithei khuisangra.”