Read Tangkhul Naga ISAIAH 3 Bible Online

ISAIAH 3 - Tangkhul Naga bible

ISAIAH 3

¹Kaja yanglu, PROHO, katongawui PROHOna, Judah eina Jerusalemwui nganing khavai, ngazung khavai, kashakazā samphang khavai, tara̱ samphang khavai;

²kapinga mi eina raimila, bichar kasaa eina marānla, kazei kazanga eina khararnaola,

³hangphangāwui raithāna eina khangamala, machinme eina laivā kathemala, kala mitrang kathemabingla khuithuihaora.

⁴Kala ina mayarnao naoshinaobingli wungnao sāngasakra, kala angangnaobingna athumwuitungli mungra.

⁵Mibing akha eina akha rekharek ngarokra, ngasotnao eina ngasotnaola, khongnainao eina khongnainaola; khanuinaona khararnaoli, khangazanala khangamali machāpmimara.

⁶Avāva̱wui shimkhurli mi akhana, achināli singkhuida, “Na nawui ngavai lei, nana ithumwui kathāna sāra, kala tek-kaida shiman kahai saikora hi nawui azingli leira” da hānga;

⁷chithanghon ana matuishokta, hāngra: “I raikhame masāmara; iwui shimli kashakazāla; kashan-kachonla maleimana; nathumna ili mibingwui kathāna masā ngasakpaimara.”

⁸Kaja Jerusalem phei ngaphokhaira, kala Judah kongluihaira; khikhalajila athumwui tuimatui, kala otsak PROHOli mamayāmana, ana tekmateida khaleipam chili athumna ngaruka.

⁹Athumwui mimai khayang china chitheida lei; athumwui morei Sodomwui thada vaomalānzata, athumna chi thumkahai maleimana. Athumli kakhanang ngasaranu! Kaja athum khalattana athumwuitungli kashi [1] khuirahaira.

¹⁰Khangarongabingwui vanga, kaphā ngasāra da hānglu kaja athumwui otsak athishurda athumna kazā samphangra.

¹¹Makhayāli kakhanang ngasāranu! Awui vang kakhanang ngasāra, kaja apāng eina sākahai thāda alila sāmira.

¹²Iwui mibingwui - naoshinaobingna athumwui rekakharekana, kala sha̱naobingna athumli munga. O iwui mibing, nathumwui kathānabingna nathumli thannguiya, kala nathumwui shongfawui apong masho ngacheimiya.

¹³Kharar khavai PROHOna awui pam khuihaira, awui mili bichar sākhavai nganingdalei.

¹⁴Khararnaobing eina wungnaobingli ngasoda PROHOna bichar haophoka: “Drakhā yāmgui sākakathāna chi nathumna, kachāmbingwui ngaponkakhui chi nathumwui shimli lei.

¹⁵Iwui yurbingli kashiren khi kakhalatkhala? Kachāmbingwui mai nurkakazam hi khi kakhalatkhala?” da saikorawui PROHO VAREna hānga.

¹⁶PROHOna hānga: Khikhalajila Zionwui naongalava ngarāna hiksorsor, kui khalekta yaothuizata, kakhayak maleila mik thekzata, pheikār kashut kaseoda zata;

¹⁷PROHOna Zionwui naongalavabingwui kuili raiji shokngasakra, kala PROHOna athumwui kui tāngngasakra,

¹⁸Chithanghon PROHOna athumwui khamathā kazao, pheikom, kuirom, kuitei;

¹⁹unra̱, kazao, khungnei kachon;

²⁰pāsi, hār, sihup, thao oko, ahaikhong,

²¹shoikhutop, nātang-ngathet,

²²phanit kachon, katuma phahon, pāngkhao,

²³kala kalāra̱ngayot, khamanaka sāribing, kuihon kala kachonbing ngapaithuiserhaora.

²⁴Nganamkaphāwui mahutli kashuikhanām; shānneira̱wui mahutli khara̱; sam sekkazak kahaiwui mahutli kui khangai; khamathā kashan-kachonwui mahutli bora; khamathawui mahutli kakhayak ngasāra.

²⁵Nathumwui yaronnaobing raighai eina thira, nathumwui kapingabing raili yumra.

²⁶Awui ngaveina sifada chapngachāra kala ngachakyānghaora; ana ngaleitungli pamra.