Read Tangkhul Naga ISAIAH 30 Bible Online

ISAIAH 30 - Tangkhul Naga bible

ISAIAH 30

¹PROHOna hānga: “Ngakaikashe naobing chi kalākashi ngasāranu! Athumna khangarān akha sai, kha iwui maningmana; athumna long akha sai, kha imanglāwui maningmana athumna moreitungli morei ngarumsang khavai sai.

²Athumna iwui khak makhuila Egyptli tākhavai zata; Pharaohwui makārkhami chili ngayin khavai, kala Egyptwui khaya̱li ngayinkhui khavai!

³Chithāda sāda Pharaohwui makārkhami chi nathumwui kakhayak onra; Egyptwui khaya̱li khangayin chi khayā khamalā onra.

⁴Awui phungva̱bingna Zoanli leilala, awui mathunna Hanesli vāshunglala;

⁵athumli masāmikharar yur chiwui vang mi kachiva̱ kakhayak samphangra, china khangachon kala tongkazā maningla kakhayak eina maikashi mi.”

⁶Negebwui sāyurbingwui pongli hāngkhamarān: pa̱khangapā, ringkhangā ngalei akhawui eina, kazingkha̱ ava̱ eina kazingkha̱ avā, chaoshai eina khayonga phara̱ rai; athumna athumwui lan gadhā eina phunga, athumwui lupāchum utwui angatongli phungzata. Kala athumwui vang matongzāki kaje yur akhali phungvāmi.

⁷Kaja Egyptwui khangachon che aman makhavai khamasaina; chiwui vang ina ali “Makhangatha̱va̱ Rahab” hoi.

⁸Ara athumwui mangāli lungphek akhali kapisanglu; kala lairikli kapihailu, naodawui vang china katang makhavai shākhi sāpaira.

⁹Kaja athum ngakaikashe miyurna, kakapika naobingna; PROHOwui hāngkhamachin makhanganābingna.

¹⁰Athumna khanongli “Mayanglu”, da hānga, marānbingli, “Ithumli khamashung khikhala kaji mamarānalu, ithumna shākhangai tuimāng hānglu, makakachang tui marānlu,

¹¹apong chi horhaida ngateithulu, Israelwui Katharawui tui manganāluiasa.” kajibingna.

¹²Chiwui vang Israelwui Tharkhamathengpana hithāda hānga, “Kaja nathumna tui hili ningkakachaiwui vang, rekakharek kala kakapik kakhayāngli shitsangda kachihamwui vang,

¹³khayonkhamāng hi nathumwui vangna, phākho kajuiva̱ akha ngachakkhaida worshokta kongluinanai khalei chi kashuirak mikkhayip akhawui alungli tākatung kathāna.

¹⁴Chiwui kakai chiya hamkasāwui ham ngapothamkhai kahai thāda; kala akai chiwui eina meiyaikhong sākhavai khāngmei, kala tara̱ sokkhavai kokthikai makhuikapai kathāna.”

¹⁵Kaja Israelwui Katharapa, Proho VAREna hithāda hānga, “Latungda khangasāma nathumli huimira; va̱ri kahai kala shitkasang chi nathumwui yāng ngasāra”.

¹⁶Kha nathumna hānga, “Ngga! Ithuma sigui tongtha̱ra” chiwui vang nathum yongthuihaora; kala, “Kathaka sigui tongtha̱ra” jira; chiwui vang nathumli kakharombingla thākshunra.

¹⁷Akhana khamachitli thingthing yāmra; kachungkhana machitta nathum yāmserhaora, kaphungtonli philānthing shun kahai thāda, kaphungli machut khavai sākahai thāda mashokranglakha eina tangda.

¹⁸Chiwui vang eina PROHOna nathumli lumashanmi khavai ngaraida lei; chiwui vang eina lukhamashan chithei khavai akhalatta khāngchikata. Kaja Vare hiya mashunwui Varena; ali khangaraibing kalā mahai.

¹⁹Mah Jerusalemli kapam, O Zionli khalei mibing; nathum machapluimara, nathumwui ringkhangā akhon chili ana lumashanmilakra; shākhaleoda ana ngahānkāmira.

²⁰PROHOna nathumli yangkashiwui zāt kala rekakharekwui tara̱ milala, nawui Chishutme akhalatta mangathumluimara; kha nathumwui mikna Chishutmeli theira.

²¹Khanukshong khamatui nathumwui khanāna shāra, “Hi khamashunga shongfa china, uivāk vālala, yāvāk vālala, chili zatlu.”

²²Chiwui thili lupāsa eina sākakhui meoma̱, kala sina eina sākakhui meoma̱bing chi sākhamānghaora, kala makathara ot thāda horyānghaora kala “Thuiulu!” da hāngra.

²³Kala nathumna luili khayao athā, kala ngaleiwui eina hātkakhui kashakazā chiwui vang ana kazing rotāmira; chiya hāngkhavai makhalei kala sorkhangasai ngasāra. Chitharan nathumwui sha̱keina kahaka seihomphungli phazāra;

²⁴luikhavā sei kala gadhābingna, kārphang eina samathākharik kahai, machi kazanga zāt zara.

²⁵Kala kachungkhali shaothatthang tārong pitāser kahai tharan, phungrei kajujuili, kala phungrā kachiva̱li kongrāra̱ longra.

²⁶Chili lāngda, ana khamā za̱mi kahai saikora ngahāmida raikhami eina, kachāngwui kahor chi zimikwui kahor thāra, kala zimikwui kahor, shini shida, kaja shinithangwui kahor khangarum thāda horra.

²⁷Yanglu, PROHOwui aming katāva̱ eina rāra, ngapuirut kahai meikhut kashok thāda lungvāt eina; awui morchaili sākashina pemda amale khamaringa mei thai;

²⁸awui khaksui phongkashilonga kahung kākashunga kongra̱ thai, miyurbingli kashimānwui ngayāng eina ngayāng khavai, kala shongfa thānkhanguibingli nāren sangkhavai rāra.

²⁹Kathara zātkhān khamayonwui ngayā thāda nathumna laa sāra; kala mi akhana sipa̱ khongda, Israelwui lunghar PROHOwui kaphungli khavā thāda mathānra.

³⁰Kala PROHOna awui khayākakākhon chi shāngasakra, awui pāngthei katingda theingasakra, thurshi kahai malungkhavāt kala meiwon thāda malingting kahai chi muiyā khangasui, siphan-zingrot kala theih eina ngasoda rāra.

³¹PROHOna awui lijei eina khangaphit tharan awui akhon chi Assyriabingwui vang khangachee-khangachā ngasāra.

³²PROHOna athumwuitungli tandi khamiwui khāmshui eina khangaphit kachiva̱ kortarkhon kala thingteilakhon eina ngasoda nganukra.

³³Kaja riktā khavai apam akha ngarānhaidalei; mha, awungawui vang kathuka kala khamashā meifa akha, meilā thingla sorngasaida ngarānhaidalei; PROHOwui khakkhā china mei thāda thotkāra.