Read Tangkhul Naga ISAIAH 32 Bible Online

ISAIAH 32 - Tangkhul Naga bible

ISAIAH 32

¹Yanglu, awunga akhana khamashung khangarong eina mungra; kala wungnaobingna mashun eina khayaira.

²Mi kachiva̱ masiwui eina ngayinkhui khavaipam, siphan-zingrotwui eina thummi kahai thahaora, kongra̱na katheng apamli khalong thara, kachotpamli lunghar-lungkaina khaya̱ sākhami thara.

³Chitharan mik katheibingwui mik mamikpiluimara; khanā kashābingna nganākhuira.

⁴Malung vātkazarbingna mashuning phaningkhuira; male khangapaobingla ngatarlak eina kala mathinglak eina matuira.

⁵Mangkhama̱ali khangam maholuimara, kakapik-kakhayāng mili khayākakā maholuimara.

⁶Kaja mangkhama̱ana kapātui matuira, awui ningna khalāng otmāng phaningra: Makathara otsak sākhavai, PROHOwui pongli makhangayi tui hāngkhavai, kathai mili mathokhavai, kala ra̱kachang mili mamimang khavai.

⁷Kakapikawui makaphā zakshilāka; ana makaphā awormang sai, kapikta kachāmbingli shimānkhavai sai; khangazana miwui shongrun mashunglala.

⁸Khayākakā mina khayākakā ot sai, kala khayākakā otsak eina ana nganingchinga.

⁹Ngakarthuilu, paikhareka sha̱naobing, iwui akhon nganālu; yansāngsa̱ kahai naongalava̱bing! iwui tui khuisanglu.

¹⁰Kumkhawui thili nathum nganukra, yansāngsa̱ kahai sha̱naobing nathum; kaja drakhāthei mamatheimara, theishirai heithei maungmara.

¹¹Kathirlu, paikhareka sha̱naobing nathum, nganuklu, yansangsa̱ kahaibing, kashankachon raihaida, mahonghathailu, kala bora eina shānneilu.

¹²Lui khamathāthābingwui vang, athei khamatheiya drakhārongwui vang malung kaphelu,

¹³kaja iwui mibingwui ngalei, ka̱shāt ka̱reng phorda lei; mha, khamathana keinungli khalei ringphāda leikasā shimkhurbingwui vang.

¹⁴Kaja wungnao konung chihohaora, khanganot keinung ramchohaora; kaphungla, ngashān khavai tārongla ramsāpam sāchanghaora, ram gadhābingwui ngareophung ngasāra, seishangwui seihomphung ngasāhaora;

¹⁵atungshongwui eina manglā ithumli maheirormiranglakha, lamhāng chi athei khamathei tampāk mangasāranglakha, kala athei khamatheiya tampāk chi ngahong kathā mangasāranglakha eina tangda.

¹⁶Chitharan mashunwui otsakna lamhāngli pānra, athei khamathei tampāk chili khangarongna mayonmira.

¹⁷Kala khamashung khangarongwui atheina chingri kahai ngasāra, khamashung khangarong athei chiya katang makhavai va̱ri kahai kala shitkasangna.

¹⁸Iwui mibingna chingri kahaipamli pamra; va̱ri eina ngasām khavai, khangachee makhaleipamli pamra.

¹⁹Kala ngahongna ngaikhokhaora, kala keinung nemphak ngasakhaora.

²⁰Tara̱pambingli lui vākaza nathum, mukkāli kala gadhāli ningkhān eina zat khangasakbing nathum ringkaphā ngasāranu.