Read Tangkhul Naga ISAIAH 34 Bible Online

ISAIAH 34 - Tangkhul Naga bible

ISAIAH 34

¹Rānganailu, O yurbing; nganākhui khavai kala shākhui khavai O mibing, apuk-apagala, chiwui alungli khalei saikora shāserranu.

²Kaja miyur saikorali PROHOna malungvāthaira; kala katongali malungthuihaida shimān khavai sāhaira, shaothat khavai ngarānhaira.

³Athumwui shaothat kahaibingli horshokhaora, kala kashui-nganam pemhaora; athumwui ashee phungreibingli longra.

⁴ Kazingli khalei katonga shuihaora, kala kazingram lairik kakhalui thāda khaluihaora. Drakhārongna anah kaja̱ thāda, khaorārongna anah kaja̱ thāda atungshong khalei saikora tātungserhaora.

⁵ Kaja iwui raighaina kazingramli mangshap mangkhuihaira; yanglu, Edomli bichar sākhavai tāhaira, ina shimān ngasak kahaibingwuitungli.

⁶Ashee eina chirkahaiya PROHOwui raighai akha lei, athaona ngaransuihai, yao kala mebingwui ashee, yaovāwui ahanthao eina ngasoda. Kaja Bozrahli PROHOwui pha̱kaphayā akha lei, Edomli hakkhamahā taithatra.

⁷Ramseila, shimseila, mukkāli ngasoda thitrumra. Aram ngalei ashee eina rurra, athaona ngalei tumngasakra.

⁸Kaja Zionwui vang athut kakhui zimiksho, PROHOna athut hāngsangkhami zingkum lei.

⁹ Edomwui kongbing thao khalong thāda chuira, ngalei mei sāthuihaora; aram katonga thao eina kathot thāra.

¹⁰ Ngashun ngayā mamitlakmara, meikhut kha̱shon-kha̱thaira. Thot kachida khikha masāvaimara; khipākhana khanao eina tangda chili marākānmara.

¹¹Kha khalāng eina rikra̱na chili pamra, pawung eina hangkhāna chili pānra. Ana chiwuitungli pa̱khangapāwui khara̱ khānmira, wungnaobingli maphākakhui ning sangmira.

¹²Athumna apam chili Wungram Makhalei Ram hora, chiwui wungnaobing khikha makhaning ngasāhaora.

¹³Ngaveili ka̱shāt phormithaora, raipanla lenghui eina kuivāmānghaora. Ramfa yaokhavaipam ngasāra, Ostrichwui pam sāra.

¹⁴Chili ramsāyur saikora kharāngli samphangra, satyrna ngasotnaoli ngavaora, khangayeibingna chili ngasāmra.

¹⁵Pawungna athip rāsāda kapumla pumkhuira, anaola nganaokhuira; khalāngla chili rākazipra, angawor-angawor eina.

¹⁶PROHOwui lairik pālaga yangkhuilu: Tui akhala mangacheimara, khalāngbing akhanida angawor makhalei mazangmara. Kaja PROHOna akhamor eina hāngkahaina, kala awui manglāna athumli kazipkhuihaira.

¹⁷Ana kalā yangmida kachichāwui pam ngayarmihaira, apāng eina akhara̱ khānlaga tammi kahaina; athumna thot kachida chili pamchingra kala chi katang mavaila athumwui sāra.