Read Tangkhul Naga ISAIAH 35 Bible Online

ISAIAH 35 - Tangkhul Naga bible

ISAIAH 35

¹Lamhāng eina ngalei kathengna mathānra, siwukna mathānra kala awonla wonra; crocus thāda,

²tuimataida wonra, ringphāda laasak eina ngasoda mathānra. Lebanonwui tekhamatei chi chili mihaora; Carmel eina Sharonwui khayākakā chila. Athumna PROHOwui tekhamatei theira, ithumwui Varewui khayākakā chila.

³ Yāng makakābingli pangngasaklu, makathukbingli ngatarngasaklu.

⁴Ngacheekazārbingli, “Pinglu, mangacheealu; nathumwui Varena athut khuimi khavai rāra, kala sāman eina ngasoda ana nathumli huikhuira” da hānglu.

⁵ Chitharan khangapeobing mik rakra, khangakhokbingla shāhaora.

⁶Phei kathākana chaonao thāda ngalongra; khangasha̱bingnala male eina laa sāra. Kaja lamhāngwui eina tara̱ shokra, kala siwukli kong longra.

⁷Kala situi pam ra̱khong ngasāra, thengcheng kahai ngaleili ura̱ okra. Ramfawui pamkhavai chi rāpur ngasāhaora; khawona titi kala thingrong ngasāra.

⁸Kala chili chānrei akha leira, chili kathara shongfa hora. Makathara yurna chili mazatpaimara, mangkhama̱bingna machonmakānpaimara.

⁹Chili kazingkha̱ mavaimara, tukkashai sāyur maleimara, akhala maleimara; kha ngatangkhui kahaibingmāng yaothuizatra.

¹⁰Kala PROHOna ngatangkhui kahaibing laa sālaga Zionli latungra; ningli katang makhavai ringkaphā eina ngasoda, athumna ringkaphā khamathān samphangra; kakhanang sikafa thuihaora.