Read Tangkhul Naga ISAIAH 37 Bible Online

ISAIAH 37 - Tangkhul Naga bible

ISAIAH 37

¹Awunga Hezekiahna chi kashā eina ana kashankachon serkhāklaga bora ngavaida PROHOwui shimli vai.

²Kala shimwui kashok-kazang yangkhame Eliakim, thuilinga Shebna kala pāngmon ararbingli bora ngavai ngasakta Amozwui naomayara Isaiahwuili chihovai.

³Athumna ali ahānga, “Hezekiahna hithāda hānga, ‘Aja zimik hi ringkashi, kakahar kala maikashi zimikshona; nao pharāki jihaira kha mapharāthukthuwa.

⁴Assyriawui awungana Rabshakehli kharinga Vareli mana̱shi khavai chihokharā chiwui tui nawui Proho VAREna shāhaira̱ra kala nawui Proho VAREna shākahai tui chili mamayāmada kahara; chiwui vang eina shākhaida khalei kharingbing hiwui vang nana seihā kasāmilu.’”

⁵Awunga Hezekiahwui raobingna Isaiahwuili khavā eina,

⁶Isaiahna athumli hānga, “Nathumwui akhavāli hānglu, ‘PROHOna hithāda hānga: Assyria awungawui raobingna ili mashitsanglakla kahang chi shālaga mangacheelu.

⁷Yanglu, ina ali manglā akha sangmira, kala chānkharop akha shāda awui ngalemli latungra; kala ina aramli khalattawui raighai eina thingasakra.’”

⁸Rabshakehna latunghaowa, kala Assyriawui awungana Libnahli ngararkasā chi ungthei. Kachiwui vangkhala kaja awungana Lachishwui eina thuihaira kaji shai.

⁹Chitharan awunga china Ethiopiawui awunga Tirhakahwui pao shai kaja, “Nali ngarar khavai thuihaira” da. Kala ana chi kashā eina Hezekiahli paophungmebing chihovāda hānga,

¹⁰“Nathumna Judahwui awunga Hezekiahli hithāda hānglu: ‘Nana chihānda khalei nawui Varena Jerusalem hi Assyria awungawui pāngli mamimara da kahāng hi nakhalattali kachipatna.

¹¹Yanglu, Assyriawui awungana zakshilāk eina sakathānda ngalei saikorawuitungli khi sāhairakhala kaji nana shāhaira laga nali kanmirala?

¹²Ishāvā ngarāna yur khangateibing Gozan, Haran, Razeph kala Telassarli khalei Edenwui mibingli sakakazam chili yur khangateibingwui varebingna kanmila?

¹³Hamathwui awunga Arpadwui awunga, Sepharvaim keinungwui awunga, Henawui awunga kala Ivvahwui awunga kali lei?’”

¹⁴Hezekiahna paophungmewui pāng eina chithi chi samphangda pāyanga; kala Hezekiahna PROHOwui shimli kāda PROHOwui mangāli hārshoka.

¹⁵Kala Hezekiahna PROHOli seihā sai:

¹⁶“O saikorawui PROHO, Israelwui Vare, Cherubimwui atungli wungpamkhongli chipamhaida khalei Israelwui Vare, okathuili khalei wungram saikorawui Vare chi nalaka, namānglaka; Nana kazing eina ngalei sai.

¹⁷O PROHO kashāmilu, namik eina katheimilu. PROHO Sennacheribna Vareli mana̱shi khavai chihokharā tui saikora chi kashāmilu.

¹⁸O PROHO kachangkhat eina Assyriawui awungana ngalei saikora arema sāngasakhaira.

¹⁹Kala athumwui varebing meili horsangmiserhaira; kaja chibing chiya varebing kachangkhat maningmana, kha mina sākakhui thing ngalungna, hiwui vang saikora chi sākazam kahaina.

²⁰Chiwui vang eina O PROHO, ithumwui Vare, arui kakanmilu. Chithāda okathuiwui wungram saikorana Vare chi namānga da theikhuira.”

²¹Chiwui thili Amozwui nao Isaiahna Hezekiahli pao chiphunvāda hānga, “Israelwui PROHO Varena hithāda hānga: Assyriawui awunga Sennacheribwui pongli nana seihā kasā athishurda,

²²awui pongli PROHO na hithāda hānga: “'Ana nali chipata kala mana̱shiya— Zionwui kachingva̱ naongalava̱; ana nakhanukli kui khayita— Jerusalemwui naongalava̱.

²³“'Na khipāli mana̱shihaira, kala khipāli temshihaira? Khipāwuitungli akhon chuihaira kala khipāwuitungli miktingda khayang? Israelwui Tharkhamathengpālilamā!

²⁴Nawui rao shichinlaga PROHOli nana mana̱shihaira; Iwui siguigari kachungkha khuiphungda kaphung kajujuili kāhaira, Lebanon akatanga ngahong vāshunghaira; chiwui juimeikap kaji cedarthing ina ta̱teka, mathāmeikap kaja cypress ta̱teka; kala vāmeikap kaja kajui chili, ngahong shāmeikap kaje chili vāshunga da hānga.

²⁵Ina ra̱khong khonmanga, kala Egypt kong saikora ipheimayā eina thengngasaka.

²⁶“Ina rilak eina machuk kahaina kaji na mashārangla? Arui ina sāda khalei hi ina rida ngarān kahaina, chiya ngaziplak eina sākahai keinung chi sakhaikachuptāda akha̱ samihaora.

²⁷Chitharan ram chiwui mibingwui yāng shimānhaida kaphaning suitāda pa̱ngapai; kala tampākwui akhar thāda, nganaozao kahai khawo thāda, shimtungli kaphora khawo maphorkhuiranglakha ngahuithat kahai thai.

²⁸“Nawui kapi-kapam, khaung-khavā, kala ili nana malungkhavāt ina thei.

²⁹Kaja nana ili malungvāta, nawui langkaso ikhanāli rāshunghaoda, iwui narenra̱ nanātangli sangmira, iwui yāchan nakhamorli sangmira; kala nana rākhavai apong chi tākam eina hanungra.”

³⁰“Kala hina nawui machutkhui khavai sāra: ajakum mā aningsasak eina kashok chi zālu, kakhane kum chiwui rongrar zālu; kakathuma kum yaosangda kahātla hātkhuilu, kala drakhā yāmgui sāda chiwui atheila shailu.

³¹Kala shāk kahai ringda khalei Judah shimkhurwui mibingna latluida ngaleilungli angayung sa̱zangra, atungshong aphāngna athei matheira.

³²Kaja Jerusalemwui eina shāk kahai akha shokra, kala Zion Kaphungwui eina ringkashoka ashangva̱ akha shokra. PROHOna sāngairereo kahai eina hi ungshung ngasakra.

³³“Chiwui vang eina Assyria awungawui pongli PROHOna hithāda hānga: ‘A keinung hili marāzangpaimara, malāla chili makāppaimara, chiwui mangāli chāngvei phunglagala marāpaimara, lah chili tukkhui khavai raipanla masākāshānpaimara.

³⁴Ana rākhavai apong chi tāzakta, chi eina latungra, kala ana keinung hili marāzangmara, da PROHOna hānga.

³⁵Kaja keinung hi I khalattawui vang kala iwui rao Davidwui vang ina ngākmira.’”

³⁶Kala PROHOwui kazingrao china vāda Assyriawui raimi lakh akha thing hangchishatta phangā shaothata; kala mibingna ngathorthakva̱ ngakarkathui tharan, yanglu, kathi angunmāng ngasāsai.

³⁷Chiwui thili Assyriawui awunga Sennacherib thuihaowa, kala shimli latungda Ninevehli apamhaowa.

³⁸Kala ana awui vare Nisrochwui shimli khorumpamda leilakha, awui naomayara Adrammelech eina Sharezerna raighai eina sāthathaowa, kala Ararat ngaleili angathumhaowa. Kala anaomayara Esar-haddonna awui pamli munghaowa.