Read Tangkhul Naga ISAIAH 38 Bible Online

ISAIAH 38 - Tangkhul Naga bible

ISAIAH 38

¹Atam chitharan Hezekiahli kazāda thinanaihaowa. Amozwui naomayara marān Isaiahna awuili rai, kala ali hānga, “PROHOna hithāda hānghaira: Nawui shim sāmathakharirikhailu, kaja na thihaora; na mashokluimara”

²Chieina Hezekiahna phākhoshong ngareizangda PROHOli seihā sai:

³“Phaningung milu, O PROHO, ina nali poli, nawui mangāli ina ningtongda shitkasang eina zathaira, kala nawui miktāli kaphā kaho chi sāhaira.” Kala Hezekiahna ningreikhasut eina chapa.

⁴Chiwui thili PROHOwui tuina Isaiahli rāhānga,

⁵“Vāda Hezekiahli ahānglu, nashāvā Davidwui PROHO Varena hithāda hānga: Ina nawui seihā kasā shāhaira, nawui chāra̱ theihaira; ina nawui mirin zingkum tharāda phangā mataisangmira.

⁶Nala, nawui keinungla Assyria awungawui pāng eina ina kanmira, kala ngākmira.”

⁷“Hi nawui vang PROHOwui eina kharā machutkakhuina kaja, PROHOna ngashit kahai chi sāmira:

⁸Yanglu, Ahazna zimikwui aka̱la eina atam yangkhavai sākahai chi pheikār tharā hanung ngasakra.” Hithāda sāda zimik tunnanai leikasā chi pheikār tharā hanung ngasaka.

⁹Judahwui awunga Hezekiahna kazālaga raikahai thili kakapi:

¹⁰Ina kahāngna, Iwui mirin nganingshaplakha, I thuiphalunghaorali; Kathewui ramwui ngaveili ili chizathaira, mangashong khalei iwui mirin.

¹¹Ina kahāngna, kharingabingwui ngaleili ina PROHOli matheiluimara; mikumoli matheiluimara, apuk-apagali kapama athumli.

¹²Iwui pamkhavai sāshimitmihaida khuithuimihaira; yaokahomawui kachonshim thāda, kachon kharaka thāda iwui mirin khaluimihaira, kachon rak khavaiwui eina katathaira. Ngathor eina thuilaga ngayā eina tangda nana ili katanga chi khuirāmihaira.

¹³Kazing mathangranglakha eina tangda ina ngachonmi khavai chapa; kazingkha̱ thāda ana iwui ara̱kui sātekmiserhaira; ngathor eina thuilaga ngayā eina tangda nana ili katanga chili khuirāmihaira.

¹⁴Yāngyao lah vārok thāda ina khonga, nāsha̱ thāda ina chapa. Yangkakā eina imik khanangzanhaira; O PROHO, ili singkharengnāhaira; na iwui ningkhanganunga ngasāmilu!

¹⁵Kha ina khi hāngrakhala? Kaja ana ili hānghaira, kala akhalattana sākahaina. Iwui pikhangai saikora yāmhaira ining khānā kahaiwui vang.

¹⁶O PROHO, otbing hi eina mibingna kharingna, kala saikora hili imanglāwui kharing khaleina. Iyavo, ili raimida kharing ngasakfalu!

¹⁷Yanglu, iwui phākhavaiwui vang kahaka kakhanang samkaphangna; kha sāshimānki kaji khorchopwui eina nana ili kanmihaira; kaja iwui morei saikora nakhanukli haimihai.

¹⁸Kaja Kathewui ramna nali maningshimara, kathena nali masot mamimara; leikhurli tāzang kahaibingna nawui mashun otsakli machihānrarmana.

¹⁹Kharinga china, kharinga china, nali ningshi; Ina aja kasā thāda; avāva̱na anao ngarāli theikhui ngasaka nawui mashun otsak chi.

²⁰PROHOna ili huimira, ithumna sipa̱, tingteilā singda laa sāra; mirin peichaoda PROHOwui shimli.

²¹Kaja Isaiahna hānghaisai, “Athumli khaorāthei akai akha akhui ngasaklu, kala chi moksā kakazā chili neo ngasaklu; chieina awui kakazā chi raihaora.

²²Hezekiahnala hānghaisai, PROHOwui shimli ina kāra kajiwui machutkakhui khi leili?”