Read Tangkhul Naga ISAIAH 40 Bible Online

ISAIAH 40 - Tangkhul Naga bible

ISAIAH 40

¹Ringpha ngasaklu, iwui mibingli ringpha ngasaklu, da nathumwui Varena hānga.

²Jerusalemli khanim eina hāngmilu kaja awui rai kasā ngachanghaira, awui kashong pheomihaira; awui morei sākahaikha mataida PROHOwui pāngwui eina samphanghaira.

³Akhon akhana vaowa: “Lamhāngli PROHOwui shongfa ngarānlu, siwukli Varewui chānrei ngatar ngasaklu.

⁴Leiwuk kachiva̱ juikā ngasakra, phungrei phungrā kachiva̱ nemngasakra, kajui khanem ngacham ngasakra, kokataro khayam ngasakra.

⁵Kala PROHOwui tekhamatei chi phongmira, kala chi mi saikorana theirumsera, kaja PROHO akhalattana hānghaira.”

⁶Akhon akhana “Vaolu” da hānga: Kala ina, “Khi vaorakhala?” da hānga. Asā khavai saikora khawona, kala chiwui khamathā saikora luiwui awon kathana.

⁷Thingnāna thenga, awonla ngahui, PROHOna khak suikharor tharan; mi hi khawolaka.

⁸Thingnāna thenga, awonla ngahui, kha ithum Varewui tui mashimānda leichingra.

⁹Phungrei kajuiva̱li kālu, O Zion, ringkaphā pao phungme; nawui akhon juingasaklu, O Jerusalem, ringkaphā pao phungme, juingasaklu, mangacheealu; Judahwui keinungbingli hānglu, “Nathumwui Vareli yanglu!”

¹⁰Yanglu, Varena pangshap eina ngasoda rārāli, awui pāngtheina awui vang mungra; yanglu, awui sāman awuili lei, runkhami awui mangāli lei.

¹¹ Yaokahoma thāda ana yaobingli mizāra; yaonaobing apāngli kazipkhuira; awui makāli vamzatra; kala anao khangathāna ava̱bingli ngaironda homzatra.

¹²Tara̱ khipāna pānghom eina tamyanghaira kala kazingram khipāna khāp eina tamyanghaira, okathuiwui chifa khipāna luk eina tamyanghaira, phungrei phungrābing khipāna khān tamyanghaira?

¹³ PROHOwui Manglāli khipāna chiza̱zat? Ali khipāna machinme sāda tamchithei?

¹⁴Ana sāki kajili khipāli ngasan? Mashun shongfa ali khipāna chithei? Kala ali awor eina theithangkhamei khipāna tamchitheikhala?

¹⁵Yurbing eina tangdala khongsaiwui tara̱ ngaya̱tkha kathāna, khān tamkhavaili kapaka akha̱nao kathāna; yanglu, yikuirambing chili khamanaka chifa kakhāng thāda khāngra.

¹⁶Lebanonna thing rikkhavai mangaranmirarmara, kala pha̱phayā khavai sāyurla mangachangmara.

¹⁷Yur saikora awui mangāli khikha maningmana; saikora chi ana khikha makhaning khamasaili teomeida shānkhui.

¹⁸ Chithakha Vareli khi eina pāntampaira, lah khi ngaraikachā chānsam eina ngaheopaira?

¹⁹Meoma̱va mina semkakhuina, sina kasaana sina heiror kahaina kala lupāsāwui chā sākashānna.

²⁰Kachāma mina pha̱phayā khavai mapārki kaji thing kapangkhui; kala them kathema phākhuida makhangatha̱ meoma̱ sākhui.

²¹Nathum matheirangla? Nathum mashārangla? Haokaphok atamwui eina nathumli mahāngchitheimala? Okathuiwui shimphungawui eina na theishingkakhui maleirangla?

²²Okathui kuikhamarei atungli kapama chi ana, kala chili okkathuibing khaoh kathāna; kazingramli chonlān thāda meivai, kala ngayinkhui khavai kachonshim thāda rānvai;

²³wungnaobingli ana khikha makhaning ngasā ngasaka, kala okathuiwui khamungabingli khikha makhaninga ngasā ngasaka.

²⁴Athumli malingsangphāranglakha, athumli mayaosangphāranglakha, athumwui angayungna ngaleili masa̱khuichaoranglakha, ana athumli malikharor tharan athum thenghaowa, kala thongyāngna mafakung thāda phanthuihaora.

²⁵Chithākha nathumna ili khipāli ngaheora, lah iwui ngaraikachā khipa? da Katharapa china hānga.

²⁶Namik kajuiva̱ yangkālu kala yangkhuilu: Hibing hi khipāna sākhuikhala? Saikora sākashoka kala chukkhui kahai, athum saikorali ichichāwui aming eina hoi; kaja ava yāng kālaka kala pangshapana, akha eina tangda manothāmana.

²⁷Khisāda hāngkhala, O Jacob, kala matuikhala, O Israel, “PROHOwui eina iwui shongfa saphinhaira, kala iwui mashun iwui Varena matheimithura kajila?”

²⁸Nathum matheirangla? Nathum mashārangla? PROHO katang makhavai Varena, okathui ungkashung vākashungwui Kasā akhavāna. ava kakhanang kala khavān mavaimana; awui theikakhui maphākhuirarmana.

²⁹Ana vānkahaibingli pangshap mi, kala yāng makhaleibingli pangshap mi.

³⁰Mayar ngalā eina tangda khanangra kala vānra; kala khanganuiyabingna yāng kānhaida kongluira;

³¹Kha PROHOli kachihānabingna, pangshap samphangluira; athumna khalang thāda angachāng eina yongkāra, athumna yonglala makhanangmara, athumna zatlala mavānlak mara.