Read Tangkhul Naga ISAIAH 42 Bible Online

ISAIAH 42 - Tangkhul Naga bible

ISAIAH 42

¹ Yanglu, ina pangkhangasaka iwui rao, ina kapangkakhua, iningna kapena; ina iwui Manglā ali sangmihaira; yurbingli ana mashun khuirāmira

²Ana mavaomara lah akhonla majuimara. lah shongfali shākhavai masāmara;

³naikazam kahai khawo ana masāthatmara, mitnanai khalei thaomei ana masāshimitmara; ana ningtongda mashun khuirāmira.

⁴Ana yāng mashimānmara lah ngachāngla machatmara, okathuili ana mashun eina mamungranglakha, shamadrupheili khaleibingna awui ain ngaraili.

⁵ Kazingram sākhuilaga mashāvā khangasaka, okathui hārshokkhame kala chiwui eina samphang khangasaka, chiwuitungli okkathuibingli khak suisangkhame, kala chiwui lungli yaokathuibingli mangla sangkhame Vare, PROHOna hithada hānga:

⁶“PROHO chi ina, ina nathumli khamashung khangarong eina hokakhuina, ina nathumli ipāng eina thara̱zatta mayonmi, ina nathumli mibingwui vang tuingashit akha sāda, yurbingwui vang kahor sangasakta,

⁷mik khangapeobingli mik rakngasak khavai, narkahaibingli zurshimwui eina khuishokmi khavai, tangkhamangli kapambingli phātopshimwui eina khuishokmi khavai hokakhuina.

⁸“I PROHOna, chi iwui mingna, Iwui tekhamatei katei khipākhali mamimana, iwui masot rukkakhui ama̱bingli mamimana.

⁹Yanglu, kharebing chi shokhaira, kala kadharabing ina lānkhamina; chibing chi mashokranglakha ina nathumli kahāngna.”

¹⁰PROHOli laa kadhar akha sālu, awui masot okathui akatangwui eina! Ngayila ngaphaoranu kala chiwui alungli khalei saikora, shamadrupheili khalei ngalei eina chiwui mibing saikorala soranu.

¹¹Ramchola kala chiwui keinungbingla vaoserranu, Kedarwui mi kapama kha̱bingla; Selali kapānbing mathānda laa sāranu, athumna kaphungton eina vaoranu.

¹²Athumna PROHOli sochikatranu, shamadrupheili awui masot hāngmiranu.

¹³PROHOna sashap-pangshapa thāda shoka, raimi thāda malung thuihaira; ana panglāk eina kaiya kala vaowa, awui yangkashebingli awui pangshap chithei.

¹⁴Kasangkhawui vang ina kasaikha pamhaira, I khalatta kasaikha khāngpamhaira; ara naokhara̱ sha̱nao thāda ina vaoshokra, ikhamor makāda ngahuira.

¹⁵Ina phungrei phungrā sākazamhaora, kala athumwui thingnā-ra̱hā theng ngasakra; Ina kongrābing yikuiram onngasakra, kala ra̱khongbing thengngasakra.

¹⁶Kala ina mik khangapeoali athumna makathei apong eina, athumna matheilak kaja shongfali thānzatra. Ina athumwui mangāli tangkhamang chi horngasakra, kokataropam ashāt sāngasakra, saikora hi ina sāserra, ina athumli mahorhailakmara.

¹⁷Sākakhui varebingli shitkasangbing meoma̱li “Na ithumbingwui varebingna.” kajibingli kashamhaida maishi ngasakra.

¹⁸Khanā khangakhokbing nganālu; kala mik khangapeobing yanglu, chithāda nathumna theipai.

¹⁹Mik khangapeoa lah khanā khangakhoka chi, ina pao phungkhangasaka chi maningmala? Iwui chigat kahaiapa thada khangapeo kala PROHOwui rao thāda khangapeo khipā lei?

²⁰Ana kachungkha theihaira, kha maphaningkhuilakmana; khanāva shai kha ana manganākhuilakmana.

²¹Awui khamashung khangarong mangā eina PROHOna ningyāngunglaka, awui ain reisangda tekmatei khavai.

²²Kha mibing hiya khalebingna ngaponkahaibingna; athum saikora akhurli manhaida phātoplungli thumserhaisai; athumli kanmi khavai makhalei ngaponkhui kahaia sāthuihaira.

²³Nathumwui ngachaili khipāna nganāsangrakhala? Rāki kaji chiwui vang khipāna majukvārakhala?

²⁴Khipāna Jacobli ngaponkazā mibingwui pāngli sangmihao, Ithumna PROHOwui mangāli morei kasā maningmala? Awui pongli makazatwui vang; kala ain makashurwui vang maningmala?

²⁵Chiwui vang eina awui malungkasā kala raiwui pangshap chi awuitungli heirora. China ali kuimareida mei chuingasaka, kha ana matheikhuimana; ali chuilala ningli maza̱mana.