Read Tangkhul Naga ISAIAH 43 Bible Online

ISAIAH 43 - Tangkhul Naga bible

ISAIAH 43

¹Kha ara O Jacob, O Israel! Nali kasaa PROHOna hithāda hānga: “Mangacheealu, kaja ina nali ngatangkhuihaira; mingsinda hokhuihaira, ara na iwuina.

²Nana tara̱lungli zatlala ina ngasomira, kongli kānlala makheithuimara; meitungli zatlala machuimara, meiwonna machuitārarmara.

³Kaja Israelwui Katharapa, Huikhame PROHO Vare chi ina. Nali ngatangman Egypt mihaira, ngatangkhui khavai Ethiopia eina Seba mihaira.”

⁴Kachiwui vangkhala kaja iwui vang na aman kasaka khayākakā sāthuda ina leishilaka. Nali mi eina ngatha̱khui, namanglā miyur eina lokhui.

⁵ Ina ngasomida lei, mangacheealu; “Nawui ara̱-azā zingsho zingtun eina kazipkhuira.

⁶Inaomayara ngarā, inaongalāva̱ ngarā, okathui achikun matiwui eina khuirāser khavai, atoli Chihohaolu, azeli Makhāmalu da hāngra.

⁷Iwui ming eina hokhui kahai saikora, iwui tekmatei khavai ina sakahaibing, ina semda sākhui kahaibing.”

⁸Mik kālaga khangapeobing, khanā kālaga khangakhokbing khuishokserlu.

⁹Yur kachiva̱, kala mi kachiva̱ kazip ngasaklu. Athumwui ngachaili khipāna phongmishapra̱ kala rida shokkahai chi khipāna chitheishapra? Athumwui shākhi khamashung khuirāda nganākazaklaga hāngshing ngasaklu.

¹⁰“Nathum iwui shākhina, kala I PROHOna kaji theishingkhuida shitsang khavai, nathum iwui kapangkakhui raona da PROHOna hānga. Ili rida kala ili naomeida vare katei maleimana.

¹¹“PROHO chi Ilaka, huikhame khangatei maleiluimana.

¹²Nathumwui ngachaili makatheia vare maleiranglakha, ina hāngchitheiya, huimiya kala vaomalānmiya; chieina nathum iwui shākhina da PROHOna hānga.

¹³I Varelaka, kala aruiwui eina thuida I A chilaka; ipāngwui eina ngapaikhuishapa khipākha maleimana; ina ot sai kala khipāna ili hapshaprakhala?”

¹⁴Nathumli ngatangkhame, Israelwui Katharapa PROHOna hānga: “Nathumwui vang ina Babylon asakhai ngasakra, kala Chaldeanaobingwui khavao chi chapchāt onngasakra.

¹⁵Nathumwui Kathara PROHO chi Ina, Israelli Kasaa nathumwui Awunga chilaka.”

¹⁶Ngayilungli apong phākhame, tara̱lungli shongfa sākhame,

¹⁷khipāna sigui, siguigari, kapingpinga raimi khuishokkhala; athumna pisanghaida mangakarthuiluirarmana, athum khuira̱ thaomei thāda sāshimithaira da PROHOna hānga.

¹⁸“Thuikahai chi malaihaolu, kachama chi machukmaja̱luialu.

¹⁹Yanglu, ina kadhara ot sādalei; shokmamāndalei kaji matheimala? Ina lamhāngli chānrei akha sāra, siwukli kong longngasakra.

²⁰Ramsābing, ramfa kala ostrichbingna ili khayā shira, kaja ina lamhāngli tara̱ mi, siwukli kong longngasaka; Iwui kapangkhui khahai mibingli tara̱ mimang khavai,

²¹I khalattawui vang sākhui kahai mibing hi chithāda sāda athumna iwui masot phongra.”

²²“Kha O Jacob, nana ili mangakaomana; O Israel, nana ili sānhaira!

²³Nana rikkatāchigatwui vang ili yaonao makhuirāmimana, lah pha̱kaphayā eina ili khayākashi ot masāmana. Pha̱kaphayā eina ina nali masān ngasakmana; lah frankincense eina nali masān ngasakmana.

²⁴Nathumna ili kashima ja̱hei pheisā eina malomimana, lah nathumna kachigatwui athao eina ili ningyāng maung ngasakmana. kha nathumwui moreibing china ili khanang ngasaka, nathumwui khayonkhamāng china ili sān ngasakhaira.

²⁵Iwui mingwui vang eina nathumwui morei pheokhame chi Ilaka, kala ina nathumwui morei maphaningungluimara.

²⁶“Ili phaningung ngasaklu, Ithum ngayatngaroksa; nathumwui tuingaphun khuirālu, chieina mashungada theikhuipai.

²⁷Navā khare china morei sai, kala nawui tuisak samebingna khayonkhamāng sai.

²⁸Chiwui vang eina kathara shimwui wungnaobingli ina ningkachaiya, chiwui vang Jacobli ina sipsā ngasakra kala Israelli chotchāng ngasakra.”