Read Tangkhul Naga ISAIAH 44 Bible Online

ISAIAH 44 - Tangkhul Naga bible

ISAIAH 44

¹“Kha ara nganālu, O iwui rao Jacob, ina kapangkhui kahai Israel!

²Nali kasaa PROHO, nava̱wui wukli nali kasema kala ngachonmiki kaje china hānga: Mangacheealu, O iwui rao Jacob, ina kapangkhui kahaia Jeshurun.

³“Khikhalajila ra̱kachangpamli ina tara̱ heirorra, ngalei kathengli kong longmira; nawui atheili iwui Manglā heirorra, nawui ara̱-azāli iwui sokhami tāshungmira.

⁴Athumna tara̱pamli khawo thāda phorra, kongpheili titi kaphor thāda shokra.

⁵“Hipa hina hāngra, ‘I PROHO wuina,’ khangatei akhana khalatta Jacobwui aming eina hora, khangatei akhana apāngli, ‘PROHOwui na’ da kapisangra, kala akhalatta Israelshi shimkhur da aming phokra.”

⁶ PROHO, Israelwui Awunga kala awui Ngatangme, saikorawui PROHOna hānga: “Ina kharena kala ina khanaoana; ili lāngda vare katei maleimana.

⁷I kathā khipā lei? Ali vaomalān ngasaklu, ali lānchithei ngasaklu kala iwui mangāli khuirāranu. Shokki kaji khipāna rilak eina hānghaisa? Shokluiki kajila athumna hāngmiranu.

⁸Mangangalu, khangacheela mangacheealu; rilak eina ina hāngda lānchithei kahai maningmala? Nathum iwui shākhina! Ili lāngda Vare katei leila? Lunghar katei maleimana; I khangatei matheimana.”

⁹Meoma̱ kasābing khikha maningmana, otbing chili ning ringkapha tongkaza maleimana; athumwui shākhibing athum kakhayak samphangra kaji mik einala kala mning einala matheimana.

¹⁰Khikha makānkhanāwui vang khipāna varebing sākhui kala meoma̱ shungkhui?

¹¹Yanglu, awui ngasotabing chili khayak ngasakra, them kathembingla mikumomaya; athum saikora rākazipranu, rānganingranu, ngacheera, khayakrumra.

¹²Mari kasā mina meithātungli sai; yāmkār singda pāngthei katinglaga shaowa, ana thaida yāng maleithuwa, tara̱ mamangthuda vānhaowa.

¹³Mistryna khara̱ ngakhunlaga pencil eina khāna; aramtang eina nānlaga matam eina tamkhuida shimli haikhavai miwui azak khuida miwui khamatha thada sākhui.

¹⁴Ana cedarthing ta̱khui; lah holmthing, lah shirimthing hākhuilaga khamakanga thing sāda ngahongwui thingrongbingli phorrum ngasaka; ana cedar lingda chi zingrotna hakngasaka.

¹⁵Chiwui thili chi miwui vang meithing sāngasaka, ana chi ngayarda mei sālaga lumkhuida khamui sai; ana varebingla sākhuida chili khoruma; meoma̱la sākhuida ngakhumshām eina khoruma.

¹⁶Tangkhai mei sāpamvai kala tangkhai tungli ana sā ruishaida thokahai eina akhalatta lumkhuida hānga, “Aha I lumhaira, mei chi ina theihaira!”

¹⁷Katai chieina awui varebing, meoma̱ sākhui kala chili ngakhumshāmsangda khoruma; chili seihā sāda hānga, “Ili kahuimilu, kaja na iwui varena!”

¹⁸Athumna matheimana, theikhavai kaphāla maphāmana; kaja mathei khavai ana athumwui mik sāphinmihaowa, kala bhap tākhui khavai ning shungmihaowa.

¹⁹Khipākhala machukmaja̱mana, aworla maleimana, theikhavaila maphala, “Tangkhai ina meili riklaga chiwui meithātungli khamuila, sāla ruishaihaira, kala chiwui ajui-arui china ningkakachaiya sāvaisila? Thingum akhali ina ngakhumsangda khorumrala?” da kahāngla maleimana.

²⁰Ana hotla zai, kakapik ningna ali thannguithuihaira, kala akhalatta kahuila mahuirar lah “Iwui yāpāngli kakapik maleimala?” da kahāngla mahāngrarmana.

²¹Otbing hi phaningunglu, O Jacob eina Israel, kaja na iwui raona; nali ina sākhui, na iwui raona; O Israel, ina nali mamalaihaimara.

²²Muiya thāda nawui sakhalāng, leichui thāda nawui morei ina phanthuimihaira; ili latunglu, kaja ina nali ngatangmihaira.

²³ Laa sālu, O kazingram, kaja hi PROHOna chi sākahaina. vaolu, O okathuiwui kathukbing; laa sāphokulu, O phungreibing, O ngahongbing, kala chili khalei thingrongbing! Kaja PROHOna Jacobli ngatangkhuihaira, Israelli tekmatei ngasakra.

²⁴Nali naopamwui eina sākakhuia nawui Ngatangkhame, PROHOna hithāda hānga: “Ot saikora kasaa PROHO chi Ina, Imāngna kazingram meishoka, kala okathui phayaishoka, Ili khipā ngasosākhala?

²⁵Kakapikbingwui khamachutli ningsuitā khangasaka, varebingwui tui khamatuibingli, mangma̱ khangasaka, thangkhamabingli sa̱na̱ung khangasaka, kala athumwui theithangkhameili mangma̱ khangasakana;

²⁶awui raowui tui ungshung khangasaka, awui paomebingwui hāngkachithei tui ungshung khangasaka, Jerusalemwui pongli ‘Chili mi panluira’ da hāngkhame, Judahwui keinungbingwui apongli ‘Athum sakāluira, kala ngayāng kahai ina semkāluira’ da kahāngana.

²⁷Kathukali, ‘Thenghaolu, nawui kong ina theng ngasakra’ da kahānga,

²⁸ Cypruswui pongli, ‘A iwui yaokahomana, kala ana iwui kharin ungshungmisera’ da hānga; Jerusalemwui pongli, ‘Ali sakāluira’ kala Khorumshimwui pongli ‘Nawui shimphunga sakāluira’ da kahānga PROHO chi ina.”