Read Tangkhul Naga ISAIAH 46 Bible Online

ISAIAH 46 - Tangkhul Naga bible

ISAIAH 46

¹“Belna ngakhumzanga, Nebona ngahamzanga, athumwui meoma̱ sāyur kala sha̱kei akhumli lei; nathumna phungkazat hikatha ot hi kachota sayurbingli kharita otphun sāda chiphuna.

²Meomabing chi kurzang ngakhumsanga, athum kharitphun chiwui eina mahuikhuirarmana; kha athum khalatta mingaleili narkahaiya sāda vāhaowa.

³“O Jacobshi shimkhur, Israel shimkhurwui shāk kahai saikora ili nganālu. Naopamwui eina thuida kapharā eina tangda nathumwui vang ina phungmi;

⁴nathum kasar eina tangda I chi Ana, kasārsam kashok eina tangda ina nathumli phungra. Ina sākakhuina, Ina phungra, ina phungda huimira.

⁵“Nathumna ili khipāli pāndamra, kala ili khipāli ngaraicha ngasakra, kala ngaraichaia da khipāli ngaheora?

⁶Lupākhaowui eina sina pāngtongda khuikashokbing, kala lupāsa tamkhavaili onkashok bingna; sina kasā mili masākhui kala ana vare akha sākhui; chiwui thili athumna ngakhumshāmhaida khoruma!

⁷Chi athumna yartuili khāngkāda ngava̱zata, athumna chi awuipamli khāngkhaninghai, kala china chili nganinga; chiwui eina ana mangatha̱luipaimana. Akhana ngakaolala, mangahānkāmana kala awui kakhanangwui einala mahuimirarmana.

⁸“Hi phaningkhuida majuklu, khalāng ot kasābing, hi ningli phaningkhuilu.

⁹achālakhawui kachama otbing chi phaningunglu; kaja I Varena, kala katei maleimana; I Varena, kala ikatha khipakha maleimana,

¹⁰haokaphokwui eina akatang, kala achālakha atamwui eina thuida mashokrang kaji otbing lānmida hānga, ‘Iwui hāngkachithei leichingra, kala iwui kharin saikora ungshung ngasakra,’

¹¹zingshoshong eina sāshaiwui vānao, iwui kahāng athishurda kasā mi akha katāva̱wui eina hokhuira, ina hānghaira, kala chi ina ungshung ngasakra; ina ngarānhaira, kala ina chi sālakra.

¹²“Ili nganalu, ning khamakangbing, na ngatangkhamiwui eina katāva̱li lei:

¹³Iwui ngatangkhami ina nganaimeida khuirāda lei, chi katāva̱li maleiluimana, iwui huikhami mahuinganongmara; ina Zionli huimihaora, iwui tekhamatei Israelwui vang.”