Read Tangkhul Naga ISAIAH 47 Bible Online

ISAIAH 47 - Tangkhul Naga bible

ISAIAH 47

¹ Tālu, laga chifali pamlu; O Babylonwui kachingva̱ naongalava̱; wungpamkhong makhalei ngaleili pamlu! O Chaldeanaobingwui naongalava̱, kaja nali anuiya kala khamathava̱ maholuimara.

²Shingkhur khuida mā runglu, mairār khuitāhaolu, katuma phahon raitāhaolu, naphei suthaolu, kala kong makānzatlu.

³Nawui khamahong mafakhamara, nawui khayā khamalā theira; ina athut khuida mi khipākhalila mathāhaimara.

⁴Ithumwui Ngatangkhame, aming saikorawui PROHO kahoa chi Israelwui Kathara china.

⁵Va̱ri eina pamlu, kala tangkhamangli zanglu, O Chaldeanaobingwui naongalāva̱; kaja nali wungrambingwui akhavaiva̱ maholuimara.

⁶Iwui miyurli I malungvāthaowa, iwui shimluikatli ina mathar ngasakthuda horhaowa, athumli ina nawui pāngli horsangmi, nana athumli lukhamashan machitheimana; kasarnaoli nana nawui kharit otphun chiphuna.

⁷“Ina akhavaiva̱ sāchingra” da nana hānga, chithahaoda nana nawui ningli hikathā hi maleithu, rāki kajila maphaningthuwa.

⁸ Ara chiwui vang nganālu, lumlao ningkachāngva̱, tāphup eina kapamva̱, “Ina, ili lāngda khipākha maleiluimana; I ra̱meinao akha sāda mapamara, naongarā kashimānla matheiluimara” da naningli hithāda phaninga.

⁹Ot khani hi hunkha, thangkhawui alungli nali shokra; nawui khanong kayākha leisālala, kala nana laivā kathembingwui pangshap kayākha leilala naongarā kashimān eina ra̱mei kapam nali hakmahalāk eina rāshungchaora.

¹⁰Nawui makaphāwui alungli na tāphuphaida, “Ili khipānakha matheimana” da nana hānga; nawui thangkhamei eina aworna thānnguihaira, kala naningli hithāda hānga, “Ilaka, kala I maningla khipākha maleiluimana.”

¹¹Kha makaphā nawuitungli rāra, chi nana marunrarmara; kalāshāt nawuitungli rātāra, chiwui shāt nana mangatangrarmara; nana makathei kashimān kaho kashuirak eina nali rāra.

¹²Nawui leivā kathem kala khanong kayākha kasāli nganingtitlu, nganuilakha eina thuida sākahai chi, ungkashungla leilapai; khamachitla machitshapsālapai.

¹³Hāngkhamebingli ngasankazatna na sānhaira, kazingram sirāli yangda, khayeiung khayeivāda, changwokwui athishurda, nali khi shokra kaji hāngkhamebing athum china thuinganingda nali huikhuiranu.

¹⁴Yanglu, athum mafakung kathāna, meina chuitāhaora; meiwonwui kasā pangshap chiwui eina athum khalatta makanshokrarmara akhalatta lumpam kapai meithā, mina mangāli pamkapai mei maningmana!

¹⁵Nana sākhangarum athum chi chikathābingna, nali nganuilakhawui eina yorzākahaina; athum kachichāwui shongpongli kuizata; nali huimi khavai khipākha maleimana.