Read Tangkhul Naga ISAIAH 48 Bible Online

ISAIAH 48 - Tangkhul Naga bible

ISAIAH 48

¹Hi nganālu, O Jacobwui shimkhur, Israelwui ming eina hokhui kahaibing, Judahwui eina kharā naothei, PROHOwui ming singda shākhi kasābing, kala Israelwui Vareli hāngkaphatlala, mashun kala angatar makhaningbing.

²Kaja athum khalatta tharkhamathenga keinungwui ming khuiya; kala athum khalatta Israelwui Vareli chihama; saikorawui PROHO kaji hi Awui mingna.

³“Khare otbing ina achālakha phongshokhaira, ikhamorwui eina shokta chibing chi theingasakhaira; chiwui thili ina hengsāda kasā eina chibing chi rāshoka.

⁴Khikhalajila nathum ningmarara kaji ina thei, kala nathumwui akahung mari thāda marara, kala khavei pithrai thai.

⁵Ina nathumli achā hānghairasai, athum marāshokranglakha ina nathumli vaosanghairasai, kaja iwui meoma̱na kasāna, yekkakhui kala heikakhui kemeona kakasona chihaipaishina da.

⁶Nathumna shāhaira, ara saikora hi yangkhuilu, laga hi maphongshokmarala? Aja eina thuilaga nathumli kadhadhar ot shāngasakra, nathumna matheilakasā ngathum kahai otbing.

⁷Athumli arui sākakhuina, atam masāngranga, ayā achāhon rida nathumna chikathā mashālakranga, yanglu, ina chibing theikahaina da nathumna hānghaipaishina da.

⁸Nathum mashālakranga, nathum matheilakranga, achālakhawui thotwui eina nathumwui khanā mawutranga. Kaja nathumna yansailak eina sāra kaji ina thei, kala pharāthang eina thuida nathumli ngakaikashe hoi.

⁹Imingwui vang eina ina malungkhavāt thāhaikasāna, iwui masotwui vang eina ina nathumli ngarin kahaina, ina nathumli makatathai khavai.

¹⁰Yanglu, ina nathumli langhaira, kha lupāsā mathāmana; Ina nathumli kakhanangwui sharkha̱li chāng yanghaira.

¹¹Iwui mingwui vang, Iwui mingwui vang, chi ina kasāna, kaja kathāda iwui ming sāmakhaopaira? Iwui tekhamatei ina khangateili mamimara.

¹² “Ina hokakhuiya, O Jacob eina Israel, ili nāshunglu. A chi ina, ina kharena kala ina khanaoana.

¹³Ipāngna okathuiwui shimphunga sākhui, kala iwui yāpang eina kazingrambing phayaishoka; ina athumli kaho tharan, athumna shoknganingngaruma.

¹⁴“Nathum saikora kazipta rānganālu! athumwui alungli kachipāna otbing hi phongshokmihairakhala? Ali PROHOna leishi; ngarān kahai athishurda Babylonli ana sāki kaji sāra, kala awui pāngna Chaldeanaobingli mamayāmara.

¹⁵I, I eina tangda ikhamor eina ali hokhui, ali ina khuiunga, kala ana awui otsakli reisangra.

¹⁶li rānganaida hi nganālu, haokaphok eina thuida ina ngathumda mamatuiranga, chi rākashok atamwui eina thuida I chili leihairasai.” Ara Proho VAREna awui manglā ili chihorāhaira.

¹⁷Nathumwui Ngatangkhame, Israelwui Katharapa, PROHOna hithāda hānga: “I PROHO nathumwui Varena, kannā khavai nathumli tamkachitheiana, nathumna vāki kaji apongli thānkazatana.

¹⁸Iyavo, nathumna iwui ningkhamibing chi nganākhuihaisāsi kaja! Nathumwui chingri kahai chi kong thāhairara. kala nathumwui khamashung shamadru khangaphao thahairara;

¹⁹nathumwui naothei situiyākhahairara, nathumwui ara̱-azā chiwui athāyakhahairara; athumwui ming makatatlakmara, iwui mangāwui eina kashimānla mashimān ngasaksamara.”

²⁰Babylonwui eina shokulu, Chaldeanaowui eina yāmulu, hi khamathānwui khon eina vaolu, chi chishātlu; okathui akatang vāshungda chihovālaga hānglu, “Awui rao Jacobli PROHOna ngatangmihaira!”

²¹Siwukli khamakān tharan athum mara̱changmana; ana athumwui vang lunghār chiwui eina tara̱ longshok ngasaka; lunghār chili ana kashao eina tara̱ kapha̱kshoka.

²² “Makaphā-makhayābingwui vang chingri kahai maleimana”