Read Tangkhul Naga ISAIAH 5 Bible Online

ISAIAH 5 - Tangkhul Naga bible

ISAIAH 5

¹ Iwui leikashewui drakhā yāmguiwui pongli ina leishātlaa akha sāga: Iwui leikashena ngalei katum kaphungtungli drakhā yāmgui akha leisai.

²Ana chi changa kala chiwui lungguibing hāshokserhailaga, drakhāthei khamathā yur lingsanga; chiwui alungli ana tārong akha sai; kala chili vaichum akhala khonhai; kala ana athei khamathei honpama, kha ramwui samkāngra̱thei matheihaowa.

³Chieina ara, O Jerusalemwui ramnaobing, kala Judahwui mibing; athei yāmgui iniwui ngachaili bichar sāmilu.

⁴Iwui yāmgui hili ina sāphalungki kaji khi makasā leikhala? Ina drakhāthei matheira da yangpamlaga, khi sāthuda ramwui samkāngra̱thei khamatheikhala?

⁵Ara iwui yāmguili ina khi sarakhala kaji ina nathumli hangga. Chiwui ngaveithing ina pheihaora, kala chi sākathānhaora; chiwui phākho ina sākhailaga chi naikazamhaora.

⁶Ina chi rampho ngasakra; aphāng makatatmimara, kachangla machangmimara, kala phānāng eina ka̱shāt kharshokra; muiyālila chiwuitungli kazing marotaalu da ina kasora.

⁷Kaja saikorawui PROHOwui yāmgui chi Israel shimkhurna, kala Judahwui mibing yangkhangai akharna; ana mashun phai, kha yanglu, ashee katāmāng; khangarong phai, kha yanglu, chapkhangachā samphang!

⁸[2]Apam mangaziranglakha eina tangda, shim pharonsangmamān kaje, lui ngarumsangmamān kaje, lam chili nathummāng pamra da kasā athumli kakhanang ngasāranu!

⁹Saikorawui PROHOna iwui nāshātli tuingashit sāhaira, “Kachangkhat eina shim kachungkha ngachakyānghaora, kahaka kala khamathāthā shimbing mi mapānmara.

¹⁰Drakhā yāmgui acre tharāwui eina liter chishatmāng khuira, kala theimaji shungkhana khuilukhamāng khuira.”

¹¹Ngathorthakva̱ zamshei thuikaphābing, zingyinlam eina tangda kakharombing zamna phasā maminranglakha eina tangda kakhanang ngasāranu!

¹²Athumna morkasongli lyre, tingteilā, kortar, kala sipa̱la zam eina ngasoda singa, kha athumna PROHOwui otsakli matheimimana; awui pāngna sākahai otbing mayangsangmana.

¹³Chiwui vang eina iwui mibingna theikakhui khavātwui vang raithā kahaina; athumwui khayākakābing kakhum eina thiki jihaira, kala athumwui mibing ra̱kachangna kaorenghaira.

¹⁴Chiwui vang Kathewui ramwui kathai mataisanghaira; kala khamorla mangatamkharar sāda makātaranga, kala Jerusalemwui khangamkhareibing, kala awui yarui katonga, awui mibing kala ali kasobing chili tāzangaa.

¹⁵Mikumoli mashunzangda, mai shingasaka, kala hiksor kahaibingli khayak ngasaka.

¹⁶Kha saikorawui PROHOli mashunlungli sochikata, kala Kathara Varena khangarong lungli tharchithei.

¹⁷Chiwui thili athumwui seihomphungli yaobingna phākashai thāda chili phāshaira, keikhamathao kala yaonaobingna ngayāng kahai chiwui alungli phāshaira.

¹⁸Mikhanamwui khara̱ eina khayonkhamāng ngakhun kakhuibing, morei seipeng eina hokkakhuibing kakhanang ngasāranu,

¹⁹athumna hānga, “Ali thākngasaklu, ithumna theikhavai awui ot kasā chi thākngasaklu; Israelwui Katharapa chiwui kharin chi rānganairanu, kala chi rāranu ithumna theikhavai”

²⁰Kashili kaphā ho, kaphāli kashi[3] ho, kahorli tangkhamang sā, tangkhamangli kahor sā, kashimwui vang kakhā sangkhame, kakhāwui vang kashim sangkhamebing kakhanang ngasaranu!

²¹Khalatta thangmeiada kaphaningbing, ngakaishitingting kahaibing, kakhanang ngasāranu!

²²Zam khamang kapangbing, zamshei manātkhamangli malung kapingbing,

²³khayonali pheizā khuilaga chiho kahai, kala khayon makhalei mili athumwui samphangrān masamphang khangasak athum chi kakhanang ngasāranu.

²⁴Meiwonna mafakung chuikatā thāda, kala khawo katheng meili kashimān thāda, athumwui angayung shuihaora, athumwui awon chifa sāthuihaora, kaja athumna saikorawui PROHOwui ain makhuisangmana, kala Israelwui Katharapawui tuili ningkachaihaowa.

²⁵Chiwui vang eina PROHOna awui mibingli malungvāthaowa, kala ana awui pāng katingvāda athumli shaowa; kala phungreibingna nganuka; kala athumwui kathinguna shongfa kachida thothap horkahai thai. Saikora hiwui vang awui malungkhavāt chi masuitāranga, kala awui pāng arui eina tangda katingdalei.

²⁶Katāva̱li khalei yur akhali ana machut chitheira, kala okathui akatangawui eina masikhon eina hokhuira; kala yanglu, ngalāngda thaklāk eina rai!

²⁷Khipākha makhanangmana, khipākha phei mangaphokmana, khipākha masingutmana, kapila mapivāmana, shānneira̱la mangachomana, pheihop khara̱la machatmana,

²⁸athumwui malāthing zanlaka, malāthing saikora hunhaira, athumwui siguisho lunghaila thai, kala athumwui kāngpheina sur kakhaning thai.

²⁹Athumwui khon kazingkha̱ kakhangang thai, kazingkha̱nao thāda khanganga; athumna nirda sāshai tukshai, tukthuihaida khipānakha mangapaikhuirarmana.

³⁰Yirei khangaphaokhon thāda chithanghon athumna chiwuitungli nirrāra. Kala kachikathāna ngalei kathengli yangakha tangkhamang eina kakhanang theira; kala kahor chi chiwui muiyāna tangmangphinhaora.