Read Tangkhul Naga ISAIAH 51 Bible Online

ISAIAH 51 - Tangkhul Naga bible

ISAIAH 51

¹“Ili nganālu, Huikhami kharomkazatbing, PROHOli kaphābing nathum; nathumli shānshok-khavai lunghar, kala nathumli harkhui khavai lungkotpam chili yanglu.

²Nashāvā Abrahamli, kala nathumli kapharāva̱ Sarahli yanglu; kaja amāng khalei tharan ina hokakhuina, kala ina ali somida kachungkha sāngasaka.

³Kaja PROHOna Zionli ning lumngasakra. Chiwui ramchopam saikorali ana ning lumngasakra, chiwui lamhāng Eden thāngasakra, chiwui siwukla PROHOwui yāmgui thāngasakra; chili ringkaphā, khamathān, ningkashi khami, kala laakhon kashā samphangra.

⁴“Ili nganālu, iwui mibing; iwui yur, ili nāshunglu; kaja iwui eina ain akha shokra, iwui mashun mibingwui vang kahor akha sāda rara.

⁵Iwui ngatangkhami rānganaishunhaira, Iwui huikhami rāhaira, mibingli iwui pāngthei eina mungra; shamadrupheibingna ili ngaraidalei, kala iwui pāngli chihānpamda lei.

⁶ Kazingramli namik yangkālu, kala azingshong okathuili yangtālu; kaja kazingram meikhut thāda shimānhaora, okathuina chonshi thāda tāngurhaora, kala chili kapambing hāmi thāda thihaora. Kha iwui huikhami leichingra, kala iwui ngatangkhami katang mavaimara.

⁷“Khangarong kathei nathum, ili nganālu, wuklungli iwui ain khalei mibing, miwui kakhararli mangacheealu, kala athumwui khamashātli ning masuitaalu.

⁸Kaja kachon thāda makungna athumli shaihaora, kala kalomna athumli sahā thāda shaihaora; kha iwui kanshokkhami leichingra, iwui huikhami thot kachida vāshungra.”

⁹Thuilu, thuilu, yāng shokngasaklu, O PROHOwui pāngthei; achālakhawui thāda, thuikahai atamwui thāda thuilu. Rahabli akha̱ sāmi kahai kala dragonli rungkathat chi na maningmala?

¹⁰Hakkhamahā kathukawui tara̱ kala shamadru chi theng khangasak chi na maningmala; kathuka shamadruwui shongfa sāmida ngatangkhui kahaibing kān khangasak chi na maningmala?

¹¹Kala PROHOwui ngatangkhui kahaibing khamathān laa sāda Zionli latungra; katang makhavai khamathān athumwui kuitungli leira; khamathān ringkaphā athumna samphangra, kakhanang ringkashi athumwui eina yāmthuihaora.

¹²“Nathumli ringpha khangasaka chi ina; thikapai mibingli khangachee, kala khawo thāda sākhui kahai miwui naomayarabingli khangachee,

¹³nawui PROHO Kasā Akhavāli malai kahaia, kazingrambing phayaishokkhame, okathuiwui shimphungabing kasema, rekakharekawui malungkhavāt china, nali shiman khavai kasawui vang, langpongda ngacheekapama na khipakhala? Rekakharekawui malungkhavāt kali leikhala?

¹⁴Ngakhumshām ngasak kahaia chili thāklāk eina chihomira; a mathimara kala chomli mazangmara, kashakazāla mavātmara.

¹⁵“Kaja shamadruli mathotkhuida khangaphao ngarungninghai khangask, PROHO nathumwui Varena, saikorawui PROHO chi awui mingna.

¹⁶Kala iwui tui nakhamorli sangmihaira, ipāngwui khaya̱li thumihaira, kazingram phayaishokta, okathuiwui shimphunga rungkhuida, ‘Nathum iwui miyurna’” da Zionli hānga.

¹⁷ Nakhalatta thuimathuklu, khalatta thuimathuklu, nganingkālu, O Jerusalem, PROHOwui pāngli marip kahaia na, awui malungkhavātwui tengkot, akhan tāshungda mangsanghaira, yuichāchāng kahaiwui khorāmna.

¹⁸Ana pharākakhui naomayara saikorawui alungli ali thānmi khavai akhala malei; ana nganaokakhui naongarā saikorawui alungli apāng thara̱zat khavai akhala malei.

¹⁹Khanini hi nawuitungli tārorhaira— khipāna nali hāngphanepra?— sākakhayāng eina sākakathān, chām eina raighai; khipāna nali ninglumngasakra?[12]

²⁰Nawui mibing vānhaira, seichui khalenli khaman thāda athum shongfa ngapāk kajida pisanga; athum PROHOwui malungkhavāt, nathumwui Varewui kakharar china pemtinghaira.

²¹Chieina nganālu, nathum kachotabing, khamaripabing, kha zam eina makhamaripbing;

²²PROHO, nathumwui PROHO, nathumwui Vare, awui mibingwui vang phayetkhame china hithāda hānga: “Yanglu, nathum pāngwui eina yuichachang kahaiwui khorām; iwui malungkhavātwui khoklui ina khuithuimihaira; nathum mamangluimara;

²³kala nathumli rekakharekawui pāngli ina sangmira, ‘Ngakhumsanglu, nathumwuitungli ithum naikāra’ da kahāngbingli; kala nathumwui khumkhor ngalei thāda kala athumwui vang shongfa thāda sākhamibingli mihaora.”