Read Tangkhul Naga ISAIAH 54 Bible Online

ISAIAH 54 - Tangkhul Naga bible

ISAIAH 54

¹ Laa sālu, O naokashumva̱, nao makhavaiva̱; laa sāda panglāk eina vaolu; nao khara̱wui kachotli mazangrang kajiva̱! Kaja horkahaiva̱wui naongarāna, fakathuiva̱wui naongarāli chungmeira da PROHOna hānga.

²Nathumwui kachonshim mashāsang ngasaklu, kala nathumwui pamkhavai chonrān ngakhunvālu; matiphaialu, khara̱ sāngsang ngasaklu kala pākra̱ makang ngasaklu.

³Kaja nathumna uishong yāshong hakmeida phayaishokra, nawui ara̱-azāna miyurbing khuira, ngachakyāng kahai keinungbing mi pamluishit ngasakra.

⁴Mangacheealu, na mai mashimara; mapa̱ngapālu, nathumli mamaishi ngasakmara; kaja yaronlakhawui maikashi chi na malaihaora; kala ra̱khameiwui khamashāt chi maphaningungluimara.

⁵Khikhalajila nawui Kasā Akhavā chi nagaharana, saikorawui PROHO chi awui mingna; Israelwui Kathara chi nawui Ngatangkhamena, ali okathui saikorawui Vare hoi.

⁶Kaja chiho kahaia wukkakhananga preiva̱li, yāronshapawui kasham kahai preiva̱li hokakhui thāda PROHOna nathumli hokhuihaira da nawui Varena hānga.

⁷Kasha̱khawui vang ina nali horhaowa, kha lumashanlāk eina ina ngakuikhuira.

⁸Malungkhavātna pemhaida kasha̱khawui vang imai nawui eina ngareithui kahaina, kha katang makhavai leikashi eina ngasoda nali lumashanmira da nathumwui Ngatangkhame, PROHOna hānga.

⁹ “Kaja iliva hi Noahwui thotli kashok kathāna: Noahwui tara̱ chi okathuili maphongluimara da ina ngashit kahai thāda, nathumlila I malungmavātluimara kala makhararluimara da ina ngashithaira.

¹⁰Kaja phungreibing pākthuihaipai kala phungrābing khuithuihaipai, kha iwui makhangachei leikashi nathumwui eina mapākthuimara; kala iwui chingri kahaiwui tuingashit chi makhuithuilakmara,” da nathumwuitungli lumashankhame PROHOna hānga.

¹¹ “O kakhanangna, siphan zingrotli chotchāng kahaida maringpha khangasakabing, yanglu, nali aman kasak lungguibing eina sākāmira, kala sapphire ngalung eina shimphunga sākāmira.

¹²Nawui khamato aton agate ngalung eina sāmira, ngaveila carbuncle eina sāmira, kala phākho katonga aman kasaka ngalung eina sāmira.

¹³ “Nanaomayarabingli PROHOna tamchitheira, naomayarabingwui mataikasang hakmahāra.

¹⁴Khamashung khangarongwui alungli nathumli sākāra; nathum rekakharekwui eina tāthuihaora, kaja nathumna mangacheemara; kala kachipā chi nathumli marānganaimara.

¹⁵Kachikathāna khanganang shokngasaklala chi iwui eina maningmana; nathumli nganang khangasaka chi nathumwui vang eina kongluira.

¹⁶“Yanglu, sharkha̱ hurlaga ot ava̱va̱wui sāvai khavai khutlai sākashoka mari kasa mi ina sākhuihaira, shimān khavai sākakazama chila ina sai;

¹⁷nathumli ngazai khavai khutlai kasema chi mamataisangmara, kala bichar kasāli nathumli mamayāmada ngakarkathui yur chi nguiya da nathumna ngahānkāra. Hi PROHOwui raobingwui shimlui ngasāra, kala iwui eina athumwui mashun phākhamina,”