Read Tangkhul Naga ISAIAH 55 Bible Online

ISAIAH 55 - Tangkhul Naga bible

ISAIAH 55

¹ “Hei, ra̱kachanga kachiva̱, tara̱ chili rālu! kala pheisā makhalei a chi, rālu, lokhuida zālu! Rālu, pheisa kala aman mazangla drakhāra̱ kala seina̱ rālokhuilu.

²Kashakazā makhaninga chiwui vang khisāda nana pheisā shimān ngasakkhala, kala mathokapai chiwui vang khisāda ngalang zārkhala? Ningmazinglak eina ili nganākhuida khamathā chi zālu, kala nakhalatta phasā phākhavai chili kahaolu.

³ “Khanāli shākhuingairareo ili rālu, manglā ringkhavai nganākhuilu; kala iwui makhangachei Davidli leikashiwui vang, nathumli iwui katang makhavai tuingashit akha sāra.

⁴Yanglu, ali ina mibingbingwui vang shākhi akha ngasā ngasaka, mibingwui vang kathāna kala akhoka akha sāngasaka.

⁵Yanglu, nana makathei yurbingli nana hokhuira, kala nali makathei yurbingna nawuili yāmrāra; kaja PROHO nathumwui Vare kala Israelwui Katharawui vangna, kaja ana nali tekmatei ngasakhaira.”

⁶Samphangpailakha PROHOli phālu, nganailakha ali ngakaolu;

⁷makhayā mina awui shongfa horhaida, kala makhamashunga mina awui kaphaning horhailaga; ana lumashanmipai khavai ithumwui PROHO Vareli latungranu, kaja ana mavātlakla pheomira.

⁸Kaja “Iwui kaphaning nathumwui kaphaning mathāmana, iwui shongfala nathumwui shongfa mathāmana da PROHOna hānga.

⁹Kaja kazingrambingna okathuili juikhamei thāda, iwui apongnala nathumwui apongli, kala iwui kaphaningna nathumwui kaphaningli juimei.

¹⁰ “Kaja zingrotra̱ eina horāmna kazingramwui eina tāda, malatkāluila okathuili tara̱ chaimida, akhar kharda reisang khangasak, khayaowa chili athā khami kala mili kashakazā khami thada

¹¹Iwui khamorwui eina kashok iwui tuila chithāra; khamasai eina ili malatungmara, kha ina khangarān chi ungshung ngasakra, ina kachiho chiwui athishurda reisang ngasakra.

¹²“Kaja nathumna mathānda shokra, kala chingri kahailungli thānzatra; nathumwui mangāli khalei phungrei phungrābingna laa sāshokra, luiwui thingrong saikorana athumwui pāng kaphera.

¹³Ka̱shātwui mahut cyprus thingrong phorra, kashātrongwui mahutli myrtle thingrong phorshokra; kala hi PROHOli phaningung khavaiwui vangna, makatathailakla leichingki kaji khamachut akhawui vangna.”