Read Tangkhul Naga ISAIAH 57 Bible Online

ISAIAH 57 - Tangkhul Naga bible

ISAIAH 57

¹Khangaronga mi shimāna, laga khipānakha ningli sakta makhuimana; wuklung kathar mi khuithuihaowa, khipānakha matheishingkakhui atamli. Kaja unshimuiwui eina khangarong mili khuithuihaoda,

²ana chingri kahaili zanga; mashungrik eina kazatbingli ngasoda athumwui petli pihaowa.

³Kha, laivā kathemawui naobing, nathum hili rānganailu, shāmkasā kala khayorva̱̱wui ara̱-azābing.

⁴Nathum khipāli ngareonganaoli, khipāli mamayāmada khamor makāda, male ngasatshokli? Nathum khalāng ot kasāwui naongarā, mikhanamwui ara̱-azā maningmala?

⁵Shirimthing phapheili kala thing khaya̱ya̱li khamathang-khamarang kasābing; lunghar kajujuiwui azingli, kala tampākli nanaongarāli khipāna shaothatkhala?

⁶Leiwukli nganaipat eina khalei ngalunggui chili nathumwui yar lei. Chi, chibing chi, nathumwui kalāna; athumwuitungli nathumna ra̱shakchigat kharekrora, kala nathumna muisakchigat khuirai. Hikathawui vang ina ningyāng ungrala?

⁷Phungrei kajui khamashonli nathumna pet sāhai, kala pha̱phayā khavai chili kai.

⁸Khamongwui khanukshong, khāmongthingli nathumwui machut khavai sāhai; kaja, ili horhailaga nathumwui pet lānlaga chili kāpiya, nathumna mashāmeida sai, kala nathum khalattawui vang athumli ngasoda leih sāzai; nathumna athumwui petli leishihaira, khamahong chili nathumna yanghaira.[13]

⁹Nathumna Molechli thao khuivāda nathumwui anganam mataisang ngasaka; nathumwui paophungmebing katāva̱li chihovai, Kathewui ram eina tangda chihotai.

¹⁰Nathumwui kasākhavā chiwui vang nathum ngachāngchathaira, kha nathumna, “Kachihān maleipaithura” da mahāngmana; nathum ringkhavai pheikhuihaoda ngachāng machatmana.

¹¹Nathumna khipāli ngacheengachā haoda chiwui vang kapikta, ili maphaningungla, akhanidala ili machukkhamajakhala? Ina kasāngkhawui vang khikha mathāla mayangmimala? Chiwui vang eina nathumna ili makhangacheela?

¹²Nathumwui khangarong kala otsak ina hāngmira, kha chibingna nathumli mangachonmimara.

¹³Nathumna ringkhangā tharan, nathumna kazipkhui kahai meoma̱bingna kanmiranu! Athumli masina phanthuihaora, khaksuina khuithuihaora. Kha ili ngayinkakhuiabingna ngalei chi samphangra, kala iwui kathara kaphungwui shimlui kāra.

¹⁴Kala hithāda hāngra, “Sakālu, sakālu, shongfa ngarānlu, iwui mibingwui shongfali makhārkaphin khalei saikora khuithuihaolu.”

¹⁵ Kajuiya khamaso kala mashimānda khalei Kathara kahopa china hithāda hānga, “Kajuiya katharapamli ina pama, ning ngateida hamkasanga ali ngasoda; hamkasangabingwui manglā thuimathuk khavai, ning khangateibingwui wuklung mathuk ngasak khavai sāmi.

¹⁶Kaja ina mangahātchingmara, kala ina malungla vātching majimara; kaja manglā iwui eina shoka, kala kharingwui khaksui ina sākhuiya.

¹⁷Awui kākharāmwui morei kasāwui vang ina malungvātsai, ina ali shaowa, kala imai thumhaida I malungvātsai; kha chithalala khalattawui ningkachāngli sa̱na̱thuihaowa.

¹⁸Ina awui apongbing theihaira, kha ina ali raimira; ina ali thānmida ningnganung khavai sāmira, awui vang chapkhangachābinglila ning khanganung mira.

¹⁹ Khanailila, katālila chingrihairanu, kala ina ali raimira da PROHOna hānga.

²⁰Kha makhayā chiya shamadru khangaphao thai; kaja china chingri mahairarmana, kala chiwui tara̱na situi kala leitui ngaphaoshoka.

²¹ Makhayāwui vanga chingri kahai mavaimana da iwui Varena hānga.”