Read Tangkhul Naga ISAIAH 59 Bible Online

ISAIAH 59 - Tangkhul Naga bible

ISAIAH 59

¹Yanglu, huimi khavai PROHOwui pāng masha̱nāmana; shākhavai khanāla mangazanmana;

²kha nathumwui khayonkhamāng china Vare eina nathumwui ngachaili ngatei ngasak kahaina, kala nathumwui moreina awui mai nathumwui eina thumhaowa, chiwui vang ana makashāna.

³Kaja nathumwui pāng asheena sākhamānghaira, pāngmareng morei kasāna makhao ngasakta lei, nathumwui morchai eina kakapik tui matui, male eina makhayā tui hānga.

⁴Khipakha mashun eina bicharli mavāmana, khipakha ningtharda ainli mavāmana; athumna arema kaphayatli chihamda kakapik tui matui, makaphā ning phaningpamda morei pharāshoka.

⁵Athumna chaoshaira̱ pumkhui, karkaopan rānkhui; athumwui ara̱ kazābing chi thi, kala sakhai kahai chiwui eina phara̱ sha̱shoka.

⁶Athumwui karkaopanna kachon mangasāpaimara, athumna sākakhui chi mibingna athum khalatta mangavaipaimara. Athumwui otsak moreiwui otsakmānga, athumwui pāngli khangashao otmāng lei.

⁷ Athumwui phei makaphāli yongzata, khayon makhaleiwui ashee katāli athumna thaklāka, athumwui ningphanin morei ningmānga, athumwui chānreili ngachakyāng kahai shaokakhai shaokatekmānga.

⁸Chingri kahai apong athumna matheimana, athumwui shongfali mashun maleimana; athumwui shongfa makhuikazam ngasaka, athumli khavābing chingri kahai masamphangmana.

⁹Chiwui vang mashun ithumwui eina katāva̱li lei, khangarongna ithumli marāshungthuwa; ithumna kahorwui vang ngashāna, kha tangkhamang thei; kahānwui vang yangakha ngamiting kahaili zata.

¹⁰Khangapeo thāda ithumna phākho phāzata, mik makakā thāda kachupzata; yupyapsapli kazat thāda ngashunung ngaphokzata; kapangpangwui alungli ithuma kathi thāhaowa.

¹¹Ithum saikora singom thāda ngawozata, nāsha̱ thāda ningyuiri eina chapngachai; mashunwui vang phai, kha akhala maleimana; huikhamiwui vang, kha ithumwui eina chi tālakhaowa.

¹²Nawui mangāli ithumwui khayon mataisanghaowa, kala ithumwui moreina ithum khalattali phongshoka; kaja ithumwui khayonkhamāngna ithumli ngasozata, kala ithumwui khalāng ithumna thei:

¹³PROHOli mamayāmada khalāng ot kasā, kala ithumwui Vareli kashurwui eina ngateithui kahai, rekakharek, khangararwui tui khamatui, phaningphāphai kala wuklungwui eina kakapik tui matuipama.

¹⁴Mashun ngareithuihaida, khangarong katāva̱li nganingli; khamashung kayāng-khareili tātunghaida, mashungrik kahai mazangpaithuwa.

¹⁵Khamashung vāthaira, kala makaphāwui eina yāmkashoka a chi; khalattana sāshai ngasā ngasakhaowa. Hi PROHOna thei, kala china ali maringphā ngasakthuwa, kaja mashun maleithuwa.

¹⁶ Mi khipākha makhalei chi ana thei, kala hāngmi khavai khipākha makhalei chi theida matakhakhai; chiwui thili akhalattawui pāngna khayui khuirāmi, kala awui khangarongna ali khāngkhuimi.

¹⁷ Ana khangarong chi thikhom thāda ngavai, huikhamiwui kuihon akuili ngahona; athut kakhuiwui kachon eina sāri sai, kala malungkhavāt eina faror khavai thāda shaksai.

¹⁸Athumwui kasāsā athishurda ana sāman mira; khangahātbingli malungkhavāt, yangkashibingli athut kakhui, ngayipheili khaleibingli athut hāngsangra.

¹⁹ Chithāda zingtunshongwui eina PROHOwui mingli ngacheera, zingshoshongwui eina awui tekhamateili; kaja PROHOwui masina phankazat kongrāwui tara̱ thāda ana rāra.

²⁰ “Kala ngatangkhame sāda Zionli ana rāra, sākhalāng shongfawui eina ngareikathui Jacobwui mibingli rāra da PROHOna hānga.

²¹“Iwui vanga, hi athumli ina tuingashit kasāna da PROHOna hānga: nathumwuili khalei imanglā, kala nathumwui khamorli sangmi kahai iwui tui chi nathum khamorwui eina mapākthuimara, nanao ngarāwui khamorwui einala kala nanao naongarāwui naongarāwui khamor einala, aja eina thuilaga khanao eina tangda mapākthuimara da PROHOna hānga”.