Read Tangkhul Naga ISAIAH 6 Bible Online

ISAIAH 6 - Tangkhul Naga bible

ISAIAH 6

¹Awunga Uzziah thikum, juilak eina khāngchikat kahai wungpamkhong akhali PROHOna kapam chi ina thei; kala awui katuma sārina khorumshim chi pema.

²Awui atungli seraphimbing chi nganinga; ava̱va̱na angachāng tharukrip kai; khani eina amai fakhama, khani eina aphei fakhama kala khani eina ana yonga.

³ Akhana akhali hongarokta hānga: “Kathara, kathara, kathara chi saikorawui PROHOna; okathui tongda awui tekhamateina pema.”

⁴ Kala awui vaokashokhon china khamong shimphungbing chi nganuka, kala shim chi meikhutna pemtinghaowa.

⁵Chieina ina hānga, “Iyavo I kalākashi! I shimānchaohaira; kaja iva morchai makathar mina, kala morchai makathar miwui ngachaili okthuida lei; kala imikna saikorawui Awunga PROHOli theihaira!”

⁶Chiwui thili seraphim akhana apāngli changjee eina hanphutwui meithā akha singlaga pairai.

⁷Kala ana ikhamorli sāza̱da hānga: “Yanglu, hina namorchaili saza̱haira; kala nawui khayon khuithuimihaira, kala nawui morei pheomihaira.”

⁸Kala PROHOna hithāda kahāngkhon chi ina shai, “Ina khipāli ina chihorakhala, kala khipāna ithumwui vang vārakhala?” Chieina ina hānga, “I hili leili! Ili chihomilu.”

⁹ Kala ana hānga, “Vada mibing hili hānglu: ‘Shāshāhaira, kha makhuisangmana; theitheihaira, kha mamachukhuimana.’

¹⁰Mibing hiwui wuklung thaongasaklu, kala athumwui khanā ritngasaklu, mik khamimihaolu; athumwui mik eina theihaipaishina, kala athumwui khanā eina shāhaipaishina, kala athum wuklung eina theikhuida ning ngateida kharai samphanghaipaishina.”

¹¹Chieina ina “O PROHO, karankharakhala?” da ngahāna. Chieina ana hānga, “Keinungbing mi maleila maramphoranglakha, kala shimli mi mangavāla kala lam chi ngachakyāng majichaoranglakha eina tangda,

¹²kala PROHOna mibing katāva̱li khuithuihaida, kala apam chili horkahai lam kachungkha maleiraranglakha eina tangda.

¹³Kala akhum tharāwui akha chi leisalala chila chuitaluihaora, terebinth lah shirimthing thāda, ta̱tek kahai tharan angunrummang nganingda khalei thara.” Kathara atha chi angunrum china.