Read Tangkhul Naga ISAIAH 60 Bible Online

ISAIAH 60 - Tangkhul Naga bible

ISAIAH 60

¹Ngakarthuilu, horlu; kaja nawui kahor rāshunghaira, kala PROHOwui tekhamatei nawuitungli tāshungmihaira.

²Kaja yanglu, tangkhamangna okathuili farorhaora, mibingli tangmangtinghai ngasakra; kha PROHOna nawuitungli awui kahor tāshungmira, kala awui tekhamatei nawuitungli theira.

³Kala yurbingna nawui kahorli rāra, kala awungabingna nawui reikasangwui kahān chili rāra.

⁴Namik kuimareida kapeikāyanglu; athum saikora kazipkhuida nawuili rāli; nanaomayarabing katāva̱wui eina ungra, kala naongalava̱ ngarāli pāngtheili vamungra.

⁵Chi nana theida mathānlākhaora, naning ringphāda mathānra; khikhalajila shamadruwui makhavāt chi nali ngareiungmira, kala yurbingwui lan nawuili rāserhaora.

⁶ Ut sorngasaida nali kuinamra, Midianwui, Ephahwui kala Shebawui eina utnao saikora nali khuirāserra. Athumna sina kala frankincense khuirāra, kala PROHOli sokachikat phongshokra.

⁷Kedarwui yaoshang saikora kazipkhuida nali khuirāra, Nebaiothwui yaovābingna nali otram ngatha̱ra; iwui hanphutli chibing chi khuisangkapai ngasāra, kala iwui tekmateilak kahai shim chi ina tekmatei ngasakra.

⁸Muiyā thāda phankazat, nāsha̱ thāda charfali yongkazat khipālong?

⁹Kaja shamadrupheili khaleibingna ili ngaraira, Tarshishwui marikhongna rimeikapta, katāva̱wui eina nanao ngarāli khuiungra, athumwui lupāsa eina sina athumli ngasoda nawui Vare PROHO mingwui vang, kala Israelwui Katharapawui vang; kaja ana nali tekmatei ngasakhaira.

¹⁰Yur kateibingna nawui phākho sakāmira, athumwui wungnaobingna nali otram ngatha̱ra; kaja iwui malungkhavātli ina nali shaowa, kha iwui ngahānkhangai lungli ina nali lumashanmi.

¹¹ Nawui ngaveibing shoshon shothaira; ngashun ngayā mashunghaimara; chithāda mibingna miyurbingwui lan chi nali khuirāpaira, athumwui awungabingna thānrāra.

¹²Kaja nali otram mangatha̱ki kaji yur kala wungrambingla shimānra; chikathā yurbingli zakshilāk eina sāshimānra.

¹³Lebanonwui tekhamatei nawuili rāra, cypressthingla, mafathingla, matangla, iwui kathara shim mathā ngasak khavai; kala iphei haikhavai pam tekmatei ngasakra.

¹⁴ Nali rekakharekbingwui naomayarabing nali ngahamlaga rāra, kala nali ningkakachai saikorana napheizingli ngakhumsangda rākhorumra; athumna nali PROHOwui keinung hora, Israelwui Katharapawui Zion hora.

¹⁵Nali ningkachaida horhailala, khipākha marākānlala, Ina nali mashimānda khayā kāngasakra; thot-thotwui khamathān ngasā ngasakra.

¹⁶Yurbingwui seina̱ nana mangra, awungabingwui ana̱ nana zimra; kala I PROHO, nawui Huikhame, Ngatangkhame, kala Jacobwui Pangshapa china da nana theikhuira.

¹⁷Pithraiwui mahut ina sina khuiungmira, mariwui mahut lupāsa khuiungmira; thingwui mahut pithrai, ngalungwui mahut mari: Ina nawui yangkhamebingli chingri kahai, kashinabingli khangarong mira.

¹⁸Nawui ngaleili khonkazār, sākakathān, kala sākakazamla nawui tharilungli mashāluimara; nana nawui phākhobingli Huikhami, kala nawui Ngaveili Masot da hora.

¹⁹ Ngashun zimikna nawui kahor masāluimara, lah kachāngnala ngayā horkhavai nali ngayā kahor mamiluimara; kha PROHOna nawui makashimān kahor sāra, kala Varena nawui tekhamatei sāra.

²⁰Nawui zimik katun mavailuimara, kala nawui kachāngla kathi mavailuimara; khikhalajila PROHOna nawui makashimān kahor sāra, kala nawui sikafa tanghaora.

²¹Nawui mi saikora khangarong ngasāra; athumna mashimānda lam chili pānra, ina lingsang kahaiwui akhar, ipāng eina sākahai china ili tekmatei ngasakra.

²²Ngazanmeikap kajena shang akha ngasāra, kala teomeikap kajena kapanga miyur akha ngasāra; I PROHOna, atam hi ina thaklāk eina rāngasakra.