Read Tangkhul Naga ISAIAH 61 Bible Online

ISAIAH 61 - Tangkhul Naga bible

ISAIAH 61

¹ Proho VAREwui Manglā chi iwuitungli lei, khikhalajila PROHOna ili thao neomihaira; kaja kakhanang kachotbingli paokaphā khuirāmi khavai, ana ili chihokharāna kaja kaphaning kakaibingli ngahāmi khavai, narkahaibingli ningkhān vaomalānmi khavai, kala khalap kahaibingli phātop shomi khavai,

² CHAPKHANGACHĀBING SAIKORALI RINGPHA NGASAK KHAVAI Varena athut hāngsangmi kaji PROHOwui lukhamashan zingkum vaomalānmi khavai,

³Zionli chapkhangachā athumli— hotlāwui mahut wonrui ngachāmi khavai, chapkhangachāwui mahutli ringkaphā thao neomi khavai, ning vānkahaiwui mahutli masotwui kashankachon ngavaimi khavai; kaja athumli khangarongwui shirimthing hokhavai, PROHOwui lingsang kahai, chieina ali tekmateingasak khavaiwui vangna.

⁴Achālakhawui sākhayāng kahai chi athumna sākāra, kharewui sāshimān kahaibing chi athumna khaningkāra; sākhayāng kahai keinungbing athumna chiphora, thot kachungkhawui sāshimān kahai chi.

⁵Yangkashebingna ngakarthuida nathumwui yao homra, yur kateibingna nathumwui seiot singmira kala drakhārong sāmathāmira.

⁶ Kha nathumle PROHOwui pāngmonbing hora, nathumli Varewui otram khangatha̱bingna da mibingna ngazekra; yurbingwui lan nathumwui kashakazā sāra, athumwui kashāng chi eina nathumna hekmaheira.

⁷Nathum maikashiwui mahutli sharuk khani shida samphangra, maikashi wui vang khamathān nathumwui yar ngasāra. Chiwui vang eina nawui lamli nana yar khani shida samphangra; kala nathumwui khamathān katang mavaimara.

⁸Kaja PROHO iva mashun ningchānga, khali kasa̱ kala khangui ina ningkachai; athumli ningtonglak eina athumwui sāman mira, kala ina athumli makashimān tuingashit akha sāra.

⁹Athumwui ara̱-azā miyurbingwui ngachaili theira; athumwui naotun mibingwui ngachaili theimira; chiya PROHOna somi kahai yur akhana da kathei saikorana mayāra.

¹⁰ PROHOwui lungli ina mathānlakra, Iwui Varewui lungli imanglāna sochikatra; kaja ana ili huikhamiwui kachon ngavaimi, khamashung khangarongwui sāri shaksāmi, ngalā shakazāpāna awon khangachā thāda, shakazā ngalāva̱na sāri khongnang shakasā thāda.

¹¹Ngaleina akhar kharshok khangasak thāda, kala yāmguilungli yaosang kahai chi karshok khangasak thāda, miyur saikorawui mangāli Proho VAREna khangarong eina masot shokngasakra.