Read Tangkhul Naga ISAIAH 63 Bible Online

ISAIAH 63 - Tangkhul Naga bible

ISAIAH 63

¹ “Edomwui eina kharā, Bozrah keinungwui eina kahunga kachon khangavaia, sāri tekmateilak kahai ngavaida, pangshaplak eina zatrārāda khalei chi khipākhala?” “China ina, mayonmana da vaomalānkhamina, huimishapana.”

²“Khisāthuda awui sāri hungpinghao, kala drakhāra̱ kasurawui sāri thāhaokhala?”

³ PROHOna ngahānkai, “Ina yurbingli drakhāthei thāda naikazama, kha khipākha ngachon khavai marāmana. Iwui malungkhavāt eina athumli naikazama, kala athumwui ashee iwui sārili chakkāserhaira, chiwui vang iwui sāri chukra̱ser kahaina.

⁴Iwui mibingli ngatangkakhui atam rāhaira kaji iningli machukhuihaira, athumwui yangkasheli khayon mikhavai atamna.

⁵Ina kapeiyanga, kha ili ngachonmi khavai khipākha maleikasā theilaga I matakhakhaowa, chieina I khalattawui pāng eina khayui samphangda iwui malungkhavātna zungkhuimi.

⁶Malungkhavātwui lungli yurbingli ina naikazamtai, iwui lungvāt lungli ina athumli marip ngasaka, kala ngaleitungli athumwui kharinga ashee ina heirora.”

⁷PROHOwui makhangachei leikashi chi ina phaningchingra, ithumli PROHOna khami saikora chiwui athishurda PROHOli masot michingra, kala awui lukhamashan athishurda Israel shimkhurli, kaphā hakkhamahā mikahai chi, awui makhangachei leikashiwui makhavāt athishurda khamina.

⁸Kaja ana hānga, Kachangkhat eina athum iwui mibingna, kapikta masāki kaji naongarāna; kala ana athumwui Huikhame ngasai.

⁹Athumwui kakhanang saikorali ala khananga, kala awui mangāli khalei kazingraona athumli huimi; awui leikashi kala lukhamashanlungli ana athumli ngatangmi; achālakhawui eina athumli khāngkāda phungzata.

¹⁰Kha athumna ngakaishida, awui kathara Manglāli khanang ngasaka; chiwui vang a athumwui yangkashe sāthuihaowa, kala akhalatta athumli ngarara.

¹¹ Chiwui thili achālakhawui atam, awui rao Moseswui pongli phaningunga. Awui yaoshangli homkhamebing shamadruwui eina thānkashoka chi kali lei? Awui kathara Manglā athumli sangkhame chi kali lei?

¹²Awui tekmateilak kahai pāngthei Moseswui yapāngli sangkhame chi, awui vang makashimān ming leikhavai athumwui mangāli tara̱ ngalākhaimi,

¹³kathukalungli athumli khipāna thānda makānkhala? Siwuklungli sigui thāda, athumna mangaphokmana.

¹⁴Leiwukli sha̱kei sei homkapam thada, PROHOwui Manglāna athumli ngasāmkhui ngasaka, chithāda nawui mibingli nana thānzata, Nakhalatta nawui ming tekhamatei khavai.

¹⁵Nawui kathara kala tekhamateipam, kazingram eina yangtāda katheimilu. Nawui sāngairareo kahai kala pangshap kali leili? Naningna ningkachāng kala lukhamashan chi iwui eina khuithuihaowa.

¹⁶Kaja na ithumwui Avāva̱na, Abrahamna ithumli matheisālala, Israelna ithumli makhuisangsālala; O PROHO, na ithumwui Avāva̱na, achālakhawui eina thuida naming chi ithumwui Ngatangkhamena.

¹⁷O PROHO, nawui apongwui eina khisāda ithumli lāng ngasakhaokhala? Khisāda ithumli ning marar ngasakhaida nali mangachee ngasakthu? Nawui shimluikat shangbing, naraobingwui mangā eina kha-ngareiungmilu.

¹⁸Nawui katharabingna kasha̱khawui vang nawui kathara shim khuisai, chi ithumwui yangkashebingna naikhaitā kahaina.

¹⁹Ithumla nana mamunglakrang kaje athum kathā thāhaira, naming eina makaho athum kathā thāhaira.