Read Tangkhul Naga ISAIAH 64 Bible Online

ISAIAH 64 - Tangkhul Naga bible

ISAIAH 64

¹Iyavo, nana kazingram serkhākta hili tasi kaja, nali theida phungreibing nganukra—

²luishā mei kachui thāda, meina tara̱ ngatar khangasak thāra— nawui yangkashebingli naming theingasak khavai, kala yurbingna nawui mangāli kathira.

³Ithumna maphaningkasa khangachee ot nana kasā tharan, nana katā eina phungreibing nawui mangāli nganuka.

⁴ Achalakha eina thuida, khipākha khanā einala mashālakmana, na maningla mik eina Vare khangatei matheiranga; ali ngaraida khalei athumli otram khangatha̱bing.

⁵Khangarong otli mathānthup eina kasā mi chili nana samphanga, nawui apongli phaningkhaunga mili. Yanglu, ithumna morei kasāwui vang nana malungvāta; ithum moreilungli sāngnā pamhaira, ithumli huimipairala?

⁶Ithum hupta makathara mi thāserhaira, ithumwui khangarong kasāsā saikora khamakhao chonshi thāserhaira. Ithum saikora thingnā thāda pa̱tāhaira, kala ithumwui khayonkhamāngna, masi thāda, ithumli phanthuiserhaira.

⁷Namingli khangakao mila akhala malei, nali ngavap khavai khalatta ning khangatha̱ mi akhala mazang; kaja ithumwui eina namai thumhaowa, kala ithumwui khayonkhamāngwui pāngli ithumli horsangmihaowa.

⁸Chithālala, O PROHO, na ithumwui Avāva̱na; ithum leikhonna, na ithumwui ham kasaana; ithum nawui pāngsaksera.

⁹O PROHO, malungvātshun kahai masāmialu, kala khayonkhamāng phaningching majimialu. Yanglu, machukmilu, ithum nawui misera.

¹⁰Nawui kathara keinungbing lamhāng sāthuiserhaira, Zion lamhāng sāthuihaira, Jerusalem ramcho sāhaira.

¹¹Iwui kathara kala khamathā shim, ishāvā ngarāna nali masotkhami apam chi meina chuitāserhaira; ithumwui yirkhamayei apam saikora ngayāng kahai ngasāserhaira.

¹²O PROHO, otsakbing hili na kasaikha khāngpamrala? Nava kasaikha pamda ithumli chotchānglaklu kajila?