Read Tangkhul Naga ISAIAH 66 Bible Online

ISAIAH 66 - Tangkhul Naga bible

ISAIAH 66

¹ PROHOna hithāda hānga: “Kazingram iwui wungpamkhongna, okathui iphei naikhavaina; iwui vang nathumna khishim sāmikida, kala iwui ngasām khavaipam kali leida?

²Ot saikora chi ipāng eina sākhui, chieina ot saikora hi iwuina da PROHOna hānga. Kha ina yangki kaji mi chiya, malungkhanim kala ningkhangatei, kala iwui tuili ngacheeda kakathira china.

³“Mukkā taikathat mi chila mi shaokathat kathāna; yaonao shar kasaa chi fawui akahung sātekmi kahai kathāna, muisakchigat kasā mi chila hokshee kachigat kathāna; phaningkhaungwui frankincense kachigat mi chila meoma̱li kaso kathāna. Hibing hi athum khalattawui shongfa kaphā mina, kala athumwui manglāna ningkakachai chili ningkachāngbingna.

⁴Inala athumwui vang khanang khavai phākhuira, kala athumwui khangachee athumwuitungli rāngasakra; khikhalajila ina kaho tharan, khipākha mangahuimana, ina khamatui tharan, athumna manganāsangmana; kha iwui maiyanli makhayā [15] otmāng sai, kala ina maningkachāng ot chi athumna kapangkhui,”

⁵PROHOwui tui nganālu, awui tuili kakathira nathum; “Imingwui vang ningkachaida nathumli horshok kahai nachinā ngarāna hānga, ‘PROHOli tekmateiranu, chieina ithumnala nathumwui ringkaphā chi theira; kha maishi ngasakki kaji chi athumlina’.

⁶ Nāshunglu! keinungwui khangawun! Khorumshimwui eina akhon akha! Yangkashibingli athut hāngsangkhami, PROHOwui khon.

⁷ “Nao khara̱wui kachot ali maleiranglakha ana pharai; awui kachot marāranglakha mayarnao akha pharātai.

⁸Hikatha otsak khipāna shāhaira? Hikatha otsak khipāna theihaira? Ngalei akha thangkha eina pharākhuila? Yur akha mikkhayipkhawui alungli khuishokpaila? Kaja Zionna nao ra̱khaleoda ana nao kachungkha pharai.

⁹Nao kapharā atam rāshunglaga ina mapharāshok ngasakmarala?” da PROHOna hānga. Pharā khavai kasaa ina naopam shungmihaorala? da nathumwui Varena hānga.

¹⁰Jerusalemli mathānngarumlu, awui vang ringphālu, ali leikashebing nathum saikora; khamathānlungli ali ringphāngarumlu, awuitungli chapkhangachā nathum saikora;

¹¹chithāda awui ningkhalum na̱ chi nathum mangda ningyāng ungpaira; awui tekhamateiwui khavāt makhaleiwui eina nathumna ningyāngunglak eina kala chirchomri eina mangkhuipaira.

¹²PROHOna hithāda hānga: “Yanglu, kong thāda ina ali mataisang ngasakra, kala miyurbingwui lan kong pemkatha̱ thā ngasakra. Nathumna awui na̱ mangra, nathumli khumkhorli phungra, kala awui khuksaotungli khāngkhalongpamra.

¹³Ava̱na ning lum khangasak thāda, inala nathumli ning lumngasakra. Nali Jerusalemli ning lumngasakhaora.

¹⁴Nathumna theilaga ningli mathānra; nathumwui ara̱kui khawo thuikaphā thāra, kala PROHOwui pāng awui raobingli ngasomi kaji theikhuira, kala awui malungkhavāt awui yangkashebingli lei.”

¹⁵Kaja yanglu, PROHOna mei eina rāra, awui siguigari sur kakhaning thāra, awui malungkhavāt chitheira, awui kakahar meiwui meiwon eina ngasora.

¹⁶Kaja PROHOna mei eina bichar sāra, kala asā khavai saikorali raighai eina bichar sāra, kala PROHOna shaokathat mi kachungkhara.

¹⁷Yāmgui lungli zangkhavai khalatta tharngasakta kala sākhariklaga, chiwui alungli akhali shurda, hokwui asā shaida kala makathara kashaia, shiok kashaia athum shimānrumserra da PROHOna hānga.

¹⁸Kaja ina athumwui ot kasā kala kaphaning theisera, kala miyur saikora, tuiyur saikora kazipkhui khavai ina rārāli, kala athumna iwui tekhamatei rātheira.

¹⁹Kala ina athumwui alungli khamachut akha haira. Kala athumwui eina ringda khaleibing kaikha chi miyurbingli chihovāra: Tarshishli, Putli, kala Ludli; malā kahuna, Tubal eina Javan, ngayiphei katāva̱li khalei, iwui mingkhamayāng mashārang kaji lah iwui tekhamateila matheirang kajebingli; athumna yur saikorali iwui tekhamatei phongmira.

²⁰Israelanaobingna tharzāri kahai khongsai eina athumwui muisakchigat PROHOwui shimli khuikharā thada, athumna yur saikorawui eina nachinā ngarā katongali PROHOli kachigat sāda athumli sigui eina, siguigari eina, dolai eina, gadhā eina, kala ut eina iwui kathara phungrei Jerusalemli khuirāra da PROHOna hānga.

²¹Athum kaikhali pāngmon kala Levibing sākhavai ina kapangkhuira da PROHOna hānga.

²² “Kaja kazingram kadhar, okathui kadhar na sākhuiki kaji chi, iwui mangāli leichingra da PROHOna hānga; chithāda nawui ara̱-azā kala nawui ming leira.

²³Chāngwok eina thuilaga changwok; sabbath eina thuilaga sabbath eina tangda, asā khavai saikora iwui mangāli rākhorumra da PROHOna hānga.

²⁴ “Kala athumna vāda ili ngakaikashe mibingwui kathingun chi ayangra; kaja athumwui kachai mathimara, athumwui mei mamitmara kala athum chi asā khavai saikorawui ningkakachaiya ngasāra.”