Read Tangkhul Naga ISAIAH 8 Bible Online

ISAIAH 8 - Tangkhul Naga bible

ISAIAH 8

¹PROHOna ili hānga, “Kapisang khavai kahaka lungphek akha khuilaga chiwuitungli saikorana kathei ‘Maher-shalal-hashbaz wui’ mayek eina kapilu.”

²Kala iwui vang nganingmi khavai shitsangkapai shākhi khani, pāngmon Uriah eina Jeberechiahwui naomayara Zechariah samphanga.

³Kala ina marānva̱li angasoi, kala ana nao vaida mayarnao akha pharai. Chiwui thili PROHOna ili hānga, “Awui ming Maher-shalal-hashbaz holu,

⁴kaja nao china ‘Ava̱’ lah ‘Avā’ da mahotheiranglakha Damascuswui lan kala Samariawui ngaponkakhui chi Assyriawui awungawui mangāli khuivāhaora.”

⁵PROHOna ili hāngluishita,

⁶“Khikhalajila chingri eina khalonga Shiloahwui tara̱ mibing hina khalanhaowa, kala Rezin eina Remaliahwui naomayarawui mangāli khangacheena menga;

⁷chiwui vang eina yanglu, PROHOna Kong chiwui tara̱ kachungkha hakmahālak eina, Assyria awunga kala awui tekhamatei chi athumwuitungli khuirāra; kala chiwui ra̱shong katonga pemkāda kongpheilila vāshungra;

⁸kala china Judahli phongshilongvāra, phongshilongvāda akahung eina tangda kāshungra; kala chiwui angachāng hārkashok china nawui ngalei aret pemra, O Immanu-el.”

⁹Ngayānghaolu, mibing nathum, kala ning suitāhaolu; nganālu, katāva̱li khalei ngalei nathum; raisāri shaksākhuilaga maishihaolu; raisāri shaksākhuilada maishihaolu.

¹⁰Ngasanngarumlu, kha china khikha mashokmara; tui akha matuilu, kha kakhalat maleimara; kaja PROHOna ithumli ngasomida lei. [7]

¹¹Kaja PROHOna awui kapanga pāng eina ili sāza̱da hānga, kala mibing hiwui shongfali mazat khavai hithāda hāngmathina:

¹² “Mibingna mithit khalentui khamatui da kaho chili mithit khalentui khamatui da maholu, kala athumna khangachee chili ning chipāda khangacheela mangacheelu.

¹³Kha saikorawui PROHOli katharana da phaningki kajina; nana ngacheeki kaji kala nganaki kaji chi a ngasaranu.

¹⁴ Kala ana katharapam ngasāda, nganingkakham lunggui, Israelwui shimkhur khaninili phei ngaphok khavai lunghar, kala Jerusalemwui mibingli mankhavai khalen ngasāra.

¹⁵Kachungkhana chili ngaphokra; kongluida kaikazamhaora; athumli khalen sangda khuithuihaora.”

¹⁶Pao hi kazipkhuilu, iwui sākhangatha̱bingwui alungli tamkachithei hi mahor namhaolu.

¹⁷ Jacob shimkhurwui eina mai thumhaida khalei PROHOli ina ngaraira, kala ina ali chihānra.

¹⁸ Yanglu, ila kala PROHOna mikahaiya naongarābing hila, Zion kaphungli pamda khalei saikorawui PROHOwui eina khami hi Israelli kachithei kala khamachutbingna.

¹⁹Kala athumna, “Kapumkakaseowa kazei kazangbingli kala khanongbingli ngasanlu” jiakha, miyur akhana athumwui Vareli mangasan ngayimala? Kharingbingli maningla kathebingli ngasanrala?

²⁰Tamkachithei kala shākhili yanglu! Athumna matuida khalei tui chili zingthan maleimana.

²¹Athumna chotlak eina kala thailak eina ngalei chi kānvara; kala athumna thaikahai tharan, athumna malungvātshunhaora kala athumwui awunga eina Vareli khonshira, kala athumwui mai atungshong ngareikāra;

²²kala athumna okathuili yangra, kha yanglu, kachotmāng, tangkhamangmāng, sipkasāwui khangamimāng theira; kala athumli ngamiting kahai chili horsang haora.