Read Tangkhul Naga ISAIAH 9 Bible Online

ISAIAH 9 - Tangkhul Naga bible

ISAIAH 9

¹[8] Kha sipkasāwui alungli leikasāpa̱vawui vang matangmangluimara. Khare kachāng Zebulun eina Naphtali ngaleili yonhaira da ana khuisai, kha khanaowui atamli shamadruwui apong Jordan kānda khalei miyurbingwui Galilee chi tekmatei ngasakra.

² Tangkhamangli zatkasābingna kahaka kahor akha theihaira; tangmangting kahai ramli okthuikasabing, athumwuitungli kahor hormihaira.

³Nana miyur chili mayāsang ngasakhaira, athumwui ringkaphā nana mataisangmihaira. Mā kahātli ringkaphā thāda, ngaponkakhui ot khangayar tharan mibingna ringkaphā thāda, athumna nawui mangāli mathāna.

⁴Kaja, awui otphun kashai, awui yārtuili parkahai khāmshui, ali rekakharekawui lijei, Medenaowui atamwui thāda nana sātekmihaira.

⁵Kaja raiwui khonkazarli naikazamzat khavai raikapingawui pheihop kachiva̱, kala ashee neokahai kashankachon kachiva̱, meiwui vang thing kharik thāda riktāhaora.

⁶Kaja, ithumli nao akha pharāmihaira, ithumli naomayara akha mihaira; kala shorkar ana phungra, kala awui ming, “Matakkhakkahai Machinme, Pangshapa Vare, Katangmakhavai Avāva̱, Chingrikahai Wungnao” da hora.

⁷ Awui shorkar mataikasang, kala chingri kahai katang maleimara, Davidwui wungpamkhongtungli kala awui wungramtungli, chi semkā khavai, kala chi mashun eina ngasoda kala khangarong eina ngasoda arui atam eina thuida katang mavaila leichingra. Saikorawui PROHOna sāmikhangai china hi ungshungra.

⁸PROHOna Jacobwuitungli makhamayāwui tui akha chihorāhaira, kala china Israelwuitungli horngasakra;

⁹kala mi saikorana theira, Ephraim kala Samariali kapambing, lāngkaso kala khayāning khanganing tui khamatui athumna hithāda hānga:

¹⁰“Chekbing minkhaihaira, kha ithumna shānkakhui lungguibing eina sākāra; sycamorethingbing ta̱tekmihaira; kha chibingwui mahut cedarthing sangra.”

¹¹Chiwui vang PROHOna athumli makhamayā yangkashebing shokngasaka, kala athumwui yangkashebingli malung thuingasaka.

¹²Zingshoshong Syrianaobingna, zingtunshong Philistinenaobingna khamor makāda Israelli mayuisanghaowa. Saikora hiwui vang awui malungkhavāt mavānranga, kala awui pāng katingchingda lei.

¹³Mibingna athumli kashaowa chili malatungmana; kala saikorawui PROHOli kaphāla maphāmana.

¹⁴Chiwui vang PROHOna Israelwui eina akui eina akhamei, khaneirong eina titi thangkhali katatshata—

¹⁵arara kala khayākakāpā chi akuina, kala kakapik tamkachitheia marān chi akhameina;

¹⁶Kaja mibing hili kathānbingna athumli thānnguihaowa, kala thānthui kahai athumli mayuisanghaira.

¹⁷Chiwui vang athumwui yaronnaobingwuitungli PROHOna ningyāngkhaung maleimana; kala avāva̱ makhalei eina ra̱meinaobingwuitungli lukhamashan maleimana; kaja mi kachiva̱ dharma maleimana; makaphā kasā misera; khamor kachiva̱na mangkhama̱ tui matui. Saikora hiwui vang awui malungkhavāt mavānranga; kala apāng katingchingda lei.

¹⁸Kaja makaphā makhayā mei thāda chui, phānāng eina ka̱shāt chuitai; ngahong kashāshā thottai; kala meikhut atang eina khaluikai.

¹⁹Ashangva̱wui PROHOna malungkhavātwui vang ngalei chi chuitāhaowa, kala mibing meiwui vang thing thai; khipānakha achināli mashākhaimana.

²⁰Athumna yāshong takkhui, kha thaichinga; uishong mayuisang kha kapen masamphangmana; athum kachiva̱ khongnainaowui asā yonshaiya.

²¹Manasseh Ephraim, kala Ephraim Manasseh ngarumda Judahli mamayāmana. Saikora hiwui vang awui malungkhavāt mavānranga; kala awui pāng katingching dalei.