Read Tangkhul Naga PĀNGMONSHI 1 Bible Online

PĀNGMONSHI 1 - Tangkhul Naga bible

PĀNGMONSHI 1

¹PROHOna Mosesli kazip khavai kachonshimwui eina hoshokta hānga,

²Israelnaobingli hānglu, kachikathāna PROHOli chigat khavai khuikharā tharan, nathumwui kachigat chi sei ashangva̱, lah yao ashangva̱wui eina khuirāranu.

³Awui rikkatā kachigat chi seishangwui eina ngasāsaakha, achuk kapei avā chigatranu, kala PROHOna khuisangmi khavaiwui vang kazip khavai kachonshimwui khāmongli khuirāranu,

⁴rikkatā kachigat chiwui kuitungli ana pāng parra, chieina ali pheomida khuisangmira.

⁵Chiwui thili ana mukkā chi PROHOwui mangāli taithatra, kala Aaronwui naomayara ngarā pāngmonbing china kazip khavai kachonshimwui khāmongpheili khalei hanphutpamli kuimareida ashee chi ikrorra.

⁶Kala rikkatā kachigatwui sā chi ahui hemlaga amarimrim sātāra,

⁷kala Aaronwui naomayara ngarā pāngmonbingna hanphut chiwuitungli mei sākāra kala meitungli thing khari-khanao sāda semlaga ngachamlak eina khorra.

⁸Kala Aaronwui naomayara pāngmonbingna sāmarimla, akuila kala athaola khari-khanao sāda hanphutwui meitungli ngachamlak eina haira.

⁹Kha chiwui akhari-akharā eina akhobing ana tara̱ eina pheofara. Kala mei eina rikkatā kachigatwui pha̱kaphayā sāda pāngmon china hanphuttungli riktāra; hi PROHOna ningyāng khaunga nganamkaphā otna.

¹⁰Kalikha awui kachigat chi rikkatā kachigatwui vang yaoshangwui yao, lah meakha, achuk kapei avā chigatranu;

¹¹PROHOwui mangāli ana hanphutwui atungshong taithatra kala Aaronwui naomayara pāngmonbingna ashee chi hanphut kuimareida ikrorra.

¹²Kala ana akuila kala chiwui athaola, asā chi amalim sālaga pāngmonna hanphut thing khorkahai chiwuitungli khari-khanao sāda ngachamlak eina haira;

¹³kha akharibing eina akhobing chi ana tara̱ eina pheora. Chiwui thili pāngmon china katonga chi hanphutli riktāra, hi rikkatā kachigat, PROHOli ningyāng khaungwui nganamkaphā otna.

¹⁴Kalikhada ana PROHOli kachigat chi vānaoyur rikkatā kachigatakha, ana awui kachigat chi nāsha̱ lah kha̱na̱ eina chigatranu.

¹⁵Kala chi pāngmonna hanphutli khuivāda akahung shireishatra, kala hanphutli riktāra; kala chiwui ashee chi hanphuttungwui ayarli ikrorra;

¹⁶kala ana achihon eina vānaohābing chi khuilaga hanphutwui zingshoshong hotla horkhavaipamli horhaora;

¹⁷ana chiwui angachāng shireishatkhuira, kha asā mangakaikhaimara. Chi hanphutthing khorkahaitungli pāngmonna riktāra. Hi mei eina rikkatā kachigatna, PROHOli ningyāng khaungwui nganamkaphā otna.