Read Tangkhul Naga PĀNGMONSHI 10 Bible Online

PĀNGMONSHI 10 - Tangkhul Naga bible

PĀNGMONSHI 10

¹Chiwui thili Aaronwui naomayara Nadab eina Abihuna meishārkhong akharip mei machonlaga nganamkaphā thao heisangda PROHOwui mangāli ana salu da makakaso makathara mei sai.

²Kala PROHO khaleipamwui eina mei shokta anili chuithathaowa, ani khanini PROHOwui mangāli thihaowa.

³Chieina Mosesna Aaronli hānga, “PROHOna hithāda kahāngna ‘Ili rākhanganaibingli ina iwui kathar chitheida mibing saikorawui mangāli ili tekmatei ngasakra.’ ” Chieina Aaron kasaikha pamhaowa.

⁴Mosesna Aaronwui avāgato Uzzielwui naomayara Misha-el eina Elzaphanli hokhuida hānga, “Rāmeilu, kathara rāmrah pamwui eina nachinā khanili ayarshong khuishokhaolu.”

⁵Mosesna kahāng athishurda anina zangda achinā khanili kachichāwui kachon ngavaimida rāmrahwui ayarli khuishokhaowa.

⁶Kala Mosesna Aaron eina anaomayara khani Eleazar eina Ithamarli hānga, “Nathumwui kuisam makhalaalu; kachonla maserkhakalu, nathum thihaipaishina, mibingwuitungli malungkhavāt rāpaishina, kha PROHOna chuingasakta chuikathat hiwui vang nachinā ngarā Israel shimkhur katongana sifaranu.

⁷Nathum kazip khavai kachonshimwui khāmong makānshokalu, nathum thipaishina, kaja PROHOwui thao neokhami chi nathumwuitungli lei.” Chieina athumna Moseswui kahāng athishurda sai.

⁸Kala PROHOna Aaronli hithāda hānga,

⁹“Nathumna kazip khavai kachonshimli khavā tharan; naranu, nanaomayararanu, drakhāra̱ lah zamshei mamangalu, thipaishina; nawui naothot peichaoda hi makashimāna shiyan-chikanna.

¹⁰Nathumna Varewui kathar eina mikumowui makathar kala kathar eina khamakhaowui khangatei theiphalungra.

¹¹Kala PROHOna Moseswui pāng eina khami shiyan-chikan saikora chi nathumna Israelnao saikorali tamchitheira.”

¹² Mosesna Aaronli kala ringda khalei nao khani Eleazar eina Ithamarli hānga, “Mei eina riktāda hanphutli tharāzāt kachigat katai chi khuilaga khawok mazangla hanphut ngalemli shailu, kaja hi tharmathengmeikap kaji otna.

¹³Nathumna hi katharapamli shaiki kajina, kaja hi na kala nanaomayara ngarāwui yarna, mei eina riktāda PROHOli hanphut kasāwui eina nathumna samphangkhangayina da ili kaso kahaina.

¹⁴ Kha pha̱phayāda chigat kahai asuk eina akhaishāng chiya katharpam akhali shaipai, nala nanaomayarala, kala sha̱naola shaipai; kaja Israelnaobingwui ningyatchigatwui eina hi nawui vang nanaomayara ngarāwui vang yar sakahaina.

¹⁵Chigat kahai aphei kala khayitchigat kahai asuk chi athumna riktāda kachigat athao chieina ngasoda PROHOwui mangāli khayitta kachigatwui vang khayitra, kala chi PROHOna kaso kahai athishurda nawui vang kala nanaomayara ngarāwui yar mashimānda leichingra.”

¹⁶Kala suihamchigat mewui pongli Mosesna ningsangda khangathing eina, yanglu, chi chuihairasai! Chieina ana Aaronwui katai naomayara khani Eleazar eina Ithamarli malungvātta hithāda hānga,

¹⁷ “Nathumna khisāda suihamchigat sā chi katharapamli mashaimakhala, tharmathengmeikap kaji ot hi nathumli mikahaina kaja yarui ashangva̱wui morei phungmida PROHOwui mangāli athumwui khayonwui vang pheomi khavai maningmala?

¹⁸Yanglu, nathumna chiwui ashee chi katharapamli makhuizangmana kala ina kahāng thāda nathumna katharapamli shaihaoki kajina.”

¹⁹Chieina Aaronna Mosesli hānga, “Yanglu, aja athumna PROHOwui mangāli athumwui suihamchigatla, rikkatā chigatla chigathaira, laga iwuitungli hikathā rāshokhaira! Ina aja suihamchigat sā shaihaisāsi kaja, PROHOwui miktāli khuisangpairala?”

²⁰Kala Mosesna chi shālaga, mashungada khui.