Read Tangkhul Naga PĀNGMONSHI 13 Bible Online

PĀNGMONSHI 13 - Tangkhul Naga bible

PĀNGMONSHI 13

²Kachikathā mi akhawui phasāli khawor kathā, lah khavāt, lah chukkhara̱da awui phasāwui ahuili phārreiwui yur sathuihaiakha, Aaronwuili nilala, anaomayara pāngmonbingwuili nilala khuirālu,

³kala athumna ahui kazāt chi munlak eina yangra; kala kakazāpam chiwui ahā charhairasa, kala khangachāwui ahuili thukmeihairasaakha chi phārreina; pāngmonna yangkahaiwui thili a makatharana da chishāthaora.

⁴Kha awui phasāwui ahuili kakā apam chi charlala ahuili thukmeida matheisākha kala chiwui ahā chi macharakha, kazāt khaleipa chili pāngmonna shinithang shungnarhaora;

⁵kala kashinethang pāngmonna yangra; kala kazāt chi awui mikyanli chichingakha, kala ahuili mamanvāsakha shinithang shungnarluira.

⁶Kala kashinethang pāngmonna yangluishitra, kala kazāt chi thengsanghaisakha, kala ahuili mamanvāsakha, pāngmon china katharna da chishātra; hiya ahui khavātmānga, ana awui kashankachon ngasa̱da tharhaora.

⁷Kha pāngmonna yangkahaiwui thili, ahui khavāt chi manvāhaisakha pāngmonli achitheiluishitra;

⁸kala ana yanglaga khavāt chi ahuili manvaakha pāngmonna matharmana da chishātra; chi phārreina.

⁹Mi akhali phārrei kazāhaiakha, ali pāngmonwui mangāli khuivāra;

¹⁰kala pāngmonna ali yangra, yanglaga ahuili khawor chi charakha, kala ahā chi charhaiakha, kala khawor chi sānui shonakha,

¹¹chiya phārrei khangaphārna, kala pāngmona ali matharmana da chishātra; kala ali manarmara, kaja a matharmana.

¹²Kala pāngmonna yanglaga phārrei phasā tumda akui eina thuilaga aphei eina tangda kazāsaakha, pāngmonna yangfara,

¹³pāngmonna munlak eina yanglaga asā tumda charsaakha kakazāpa chi thara da chishātra; kaja charserhaiakha tharkahaina.

¹⁴Kha sānui shonakha a hi matharmana.

¹⁵Kala pāngmonna sānui kashon chi yanglaga, matharmana da chishātra; kaja sānui kashinon hi matharmana, chi phārreina.

¹⁶Kha sānui kashinon chi char-ungluishitakha, ana pāngmonli achitheira,

¹⁷kala pāngmonna munlak eina yanglaga kazāt chi thenghaida charungakha thara da chishātra; a thara.

¹⁸Kachikathā akhawui phasāli moksā shoklaga raihailaga,

¹⁹apam chili charda worshokakha, lah hung-charda shokakha pāngmonli achitheira.

²⁰Kala pāngmonna munlak eina yanglaga ahuili thukmeida kazaakha kala ahā charakha, moksāpamli phārrei kashokna, chieina mi chi matharmana da chishātra.

²¹Kha munlak eina yanglaga ahā macharakha kala ahuili thukta makazāmada thenghaiakha shinithang shungnarhaora;

²²kha china ahuili manvāhaiakha, kazātkashina, chieina matharmana da chishātra.

²³Kha kakazā chi leilala mamaivaakha chiya moksāwui khangakhaina, chieina pāngmonna thara da chishātra.

²⁴Lha meina phasā chuida ahuipamli charda, lah hungda sāsan shokakha,

²⁵pāngmon china munlak eina yanglaga ahā char kala ahuili thukta kazāsaakha chi phārreina; meikachui khangakhaili phārrei kashokna; chieina pāngmon china matharmana da chishātra.

²⁶Kha munlak eina yanglaga ahāla machar, ahuilila thukmeida makazāmada thenghaiakha, shinithang shungnarhaora,

²⁷kala kashinethang pāngmonna yangluilaga ahui kateili manvāhaiakha pāngmonna matharmana da chishātra, kaja hi phārrei kazātna.

²⁸Kha ahui kateili mamaivāla thenghaida kakazā matheiakha mei kachui china khaworna, chieina thara da chishātra; kaja chi mei kachuiwui khangakhaimaya.

²⁹Sha̱nao nilala, mayarnao nilala akuili, lah morhāli kakazā leiakha,

³⁰pāngmonna kazāt chi munlak eina yangra, kala ahuili thukmeida kazā kala ahā manipta hung-zikhaiakha matharmana da chishātra; kaja chi kuiwui, lah morhāwui phārrei khamuiya yur akhana.

³¹Khamuiya kazāt chi pāngmonna munlak eina yanglaga ahuili mathukmeiakha kala ahā kazik maphorsaakha kakazāpa chili shinithang shungnarhaora,

³²kala kashinethang pāngmonna munlak eina yangluilaga khamui chi mamanvaakha, mahungchar kala khamuia chi ahuili mathukmeiakha,

³³khamuipam chi maningla ahā simiserhaora, kala khamui khaleipa chili shinithang shungnarluira.

³⁴Kashinethang pāngmonna munda yanglaga khamui chi mamansangakha, kala ahuili mathukmeiakha, pāngmonna thara da chishātra; kala awui kachon ngasa̱ ngasakta tharra.

³⁵Kha tharkahaiwui thili khamui chi maisanghaiakha kala ahuili thukmeihaiakha,

³⁶pāngmonna ali yangluira, kala kalikhada ahuili maisangakha, ahā kahung makahung mayangluila a makatharna da chishātra.

³⁷Kha awui mikyanli khamui chi thenghaida ahā kazik phorakha, chi raikahaina, tharkahaina, chieina pāngmonna thara da chishātra.

³⁸Sha̱nao, lah mayarnaowui phasāli kachar chukkhara̱da leiakha,

³⁹pāngmonna munlak eina yangra, kala phasāwui ahuili chukkhara̱ chi morthuthaiakha chi phārtheng kakazāna; a thara.

⁴⁰Mi akhawui kuisam pa̱haiakha, kui ngakoklala thara.

⁴¹Mi akhawui sam khaveiwui eina nilala, najeewui eina nilala pa̱haida ngakokhailala thara.

⁴²Kha khaveili nilala, kuili nilala khangakok pamli hungrisi charisida kakazāchon leiakha chi akuili kala khaveili phārrei kashokna.

⁴³Pāngmonna munlak eina yanglaga khavei kahingli nilala, kuikhangakokli nilala hungrisi charrisida kakazā chi ahuili phārrei kakazā thāda worshoksakha,

⁴⁴a phārrei kakazā mina, awui akuili kakazāna, pāngmonna a matharmana da chishātmiphalungra.

⁴⁵Phārrei kakazā mina chonshi kakāk ngavaira, kala awui kuisam masekmara, morchai ato eina tangda kuirunra kala “MakathSar, makathar!” da vaora.

⁴⁶Kazāt chi leilakha eina tangda mipa chi matharchingmana, a hi makatharana; kala rāmrah kanshokta amāng vasomra.

⁴⁷Phārrei kazāt kakā sāri leiakha, sahā lah tāwon sāri nilala,

⁴⁸lah kachikathā tāwon lah sahā kachon, maningakha sāhui, lah sāhui eina sākakhuiwui ot akai akhali,

⁴⁹kazāt chi matekrisi, lah hungrisi da theiakha, chi phārrei kazātna kala chi pāngmonli chitheiphalungra.

⁵⁰Pāngmonna kazāt chi munlak eina yangra kala kazāt kakā ot chi shinithang shungnarhaora,

⁵¹kala ana kashinethang yangluira. Kalikhada kazāt chi zairanranu, zaiparranu, sāhui eina kasā otranu, kazāt chi maisangakha, makaphā kazātna, makatharana.

⁵²Sahā kachon nilala, tāwon kachon nilala, sāhuiranu, sāhui eina sākakhui otranu, riktāhaora, chi manpailak kahaiya phārreina, meili riktāphalungra.

⁵³Kha Pāngmonna munlak eina yanglaga, chonsā chili kala sāhui eina sākakhui kachon chili mamaisangakha,

⁵⁴kazāt kakā kachon chi ngasa̱ khavai pāngmonna kasora, kala shinithang shungnarhaira.

⁵⁵Kala kazāt kakā ot chi ngasa̱ kahaiwui thili pāngmonna munlak eina yangluira, kazāt chi mamaisanglala, kazāt chi mangacheiakha, chi matharmana; phārrei kazāt chi khanukliranu, mangāliranu, nathumna meili riktāhalungra.

⁵⁶Kha pāngmonna yangluishitlaga, ngasa̱ kahai thili shimān mamanhaiakha, kachon nilala, sāhui nilala kazātpam chi serkhuihaora,

⁵⁷kala kazāt chi zairanlala, zaipharlala kachon chili hanluida rāshokakha, chi mansangdalei; kazāt kakazāpam chi riktāhaora.

⁵⁸Kha zairan nilala, zaiphar nilala, kachonla, sāhui eina sākakhuila, ngasa̱ kahaiwui thili kazāt chi shimānhaiakha, kakhane sāda ngasa̱luishitra, kala tharhaora.

⁵⁹Hithāda sāda, sāha kachonranu, tāwon kachonranu, zairanlila, zaipharlila, sāhui eina kasā otlila kathar makathar theikhui khavai hi phārrei kakazāli ngarang khavai ainna.